ស្រាក្រហមពិតជាមានប្រយោជន៍មែនទេ?

ស្រាក្រហម

ប្រជាជនអាមេរិកភាគច្រើនជឿជាក់ថា ការទទួលទានស្រាក្រហមពិតជាល្អចំពោះសុខភាពបេះដូងរបស់ពួកគេ ប៉ុន្ដែពួកគេមិនបានដឹងឲ្យបានគ្រប់ជ្រុងជ្រោយពីស្រាក្រហមនោះទេ។ យោងតាមសមាគមន៍បេះដូងអាមេរិកាំង (AHA) បានឲ្យដឹងថា ការខុសឆ្គងក្នុងការកម្រិតនូវបរិមាណស្រាក្រហមដែលត្រូវផឹក អាចនាំឲ្យពួកគេជួបប្រទះនូវបញ្ហាសុខភាពធ្ងន់ធ្ងរ។

ការស្រាវជ្រាវមួយ ដែលធ្វើការស្ទង់មតិចំពោះមនុស្សពេញវ័យចំនួន ១០០០នាក់ ដែលរៀបចំឡើងដោយសមាគមន៍បេះដូង AHA បានរកឃើញថា គោលគំនិតចម្បងដែលធ្វើឲ្យប្រជាជនអាមេរិកចូលចិត្តស្រាក្រហម គឺដោយសារពួកគេយល់ថា ស្រាក្រហមល្អចំពោះសុខភាពបេះដូងរបស់ពួកគេ។

AHA បានថ្លែងឲ្យដឹងទៀតថា ការផឹកនូវប្រភេទនៃគ្រឿងស្រវឹងគ្រប់ប្រភេទ រួមទាំងស្រាក្រហមផងដែរ គួរតែកំណត់នូវកម្រិតមួយដែលត្រឹមត្រូវ ពោលគឺមិនឲ្យលើស

ពីរកែវក្នុងមួយថ្ងៃសម្រាប់បុរស និងមួយកែវសម្រាប់ស្រ្ដី។

សមាគមន៍ដដែលបាននិយាយនៅក្នុងរបាយការណ៍របស់ខ្លួនថា ការទទួលទានគ្រឿងស្រវឹងលើសកម្រិត ដែលរួមមានទាំងស្រាបៀ ស្រា (អាចមានទឹកត្នោតជូរមួយទៀតបើនៅស្រុកខ្មែរ) អាចបណ្ដាលឲ្យបង្កើននូវកម្រិតជំងឺលើសឈាម គាំងបេះដូង ដាច់សរសៃឈាមក្នុងខួរក្បាល (ស្រ្តូក) ការធាត់លើសទម្ងន់ និងបញ្ហាសុខភាពដទៃទៀត។

ក្រៅពីបញ្ហាសុខភាព គ្រឿងស្រវឹងក៏អាចបណ្ដាលឲ្យមានបញ្ហាសង្គមដទៃទៀត ដូចជាគ្រោះថ្នាក់ចរាចរ សម្លាប់ខ្លួន អំពើហិង្សាជាដើម។

ប៉ុន្ដែសមាគមន៍បេះដូង AHA ក៏បាននិយាយដែរថា ការទទួលទានស្រាក្រហមក្នុងកម្រិតមួយល្មមសមស្រប (មិនលើសអ្វីដែលបានកំណត់ខាងលើ) ពិតជាល្អចំពោះសុខភាពបេះដូង។

អ្នកនាំពាក្យរបស់សមាគមន៍បេះដូងអាមេរិកគឺលោកវេជ្ជបណ្ឌិត Gerald Fletcher ដែលជាសាស្រ្ដាចារ្យផ្នែកជំងឺបេះដូង ក៏បានផ្ដល់យោបល់ឲ្យមនុស្សគ្រប់រូប គិតពីសុខភាពខ្លួនឯងជាចម្បង មិនត្រូវឲ្យគ្រឿងស្រវឹងបំផ្លាញសុខភាពនោះទេ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕