ក្បាច់តៃជិ ល្អចំពោះអ្នកកើតជំងឺបេះដូង

អ្នកហាត់ក្បាច់តៃជិ

ក្រុមអ្នកស្រាវជ្រាវមកពីសាកលវិទ្យាល័យវេជ្ជសាស្រ្តហាវើត សហរដ្ឋអាមេរិកបានរកឃើញថា ការហាត់ក្បាច់តៃជិរបស់ចិន អាចបង្កើននូវគុណភាពជីវិតចំពោះអ្នកដែលកើតជំងឺបេះដូង។

ការហាត់ប្រាណបែបបុរាណចិនដែលគេហៅថា តៃជិនេះគឺជាការធ្វើចលនាយឺតៗ និងថ្មមៗ ដែលទាមទារឲ្យមានការធ្វើសមាធិឲ្យអារម្មណ៍ស្ងប់។

អ្នកស្រាវជ្រាវដដែល បានលើកឡើងថា តាំងតែពីយូរមក អ្នកដែលគាំងបេះដូង គឺជាមនុស្សដែលមានការហាត់ប្រាណតិចតួច ប៉ុន្ដែចាប់ពីចុងទសវត្សឆ្នាំ១៩៨០មក ការហាត់ប្រាណត្រូវបានហាមឃាត់សម្រាប់ពួកគេទៀត។ ហើយគិតមកទល់ពេលនេះ មិនទាន់មានការសិក្សាឲ្យបានច្បាស់លាស់អំពីផលប្រយោជន៍នៃការហាត់ប្រាណបែបតាំងសមាធិ ចំពោះអ្នកជំងឺគាំងបេះដូងនៅឡើយទេ។

ក្រុមអ្នកវិទ្យាសាស្រ្តមកពីមជ្ឈមណ្ឌលវេជ្ជសាស្រ្ត

Harvard and Beth Israel Deaconess បានជ្រើសយកអ្នកជំងឺបេះដូងធ្ងន់ធ្ងរចំនួន ១០០នាក់ ហើយបានចាត់ពួកគេជាពីរក្រុម (មួយក្រុម ៥០នាក់)។ ក្រុមមួយ ត្រូវធ្វើការហាត់ក្បាច់តៃជិតាមកម្មវិធីកំណត់ចំនួន ១២សប្ដាហ៍ ហើយក្រុមមួយទៀតមិនហាត់ក្បាច់តៃជិនោះទេ ដោយគ្រាន់តែរៀនពីចំណេះដឹងផ្សេងៗទាក់ទងនឹងជំងឺបេះដូង។ ក្រុមនីមួយៗត្រូវមកចូលរួមតាមការកំណត់ ពីរដងក្នុងមួយសប្ដាហ៍។

ជាចុងបញ្ចប់នៃការសិក្សាស្រាវជ្រាវនេះ ក្រុមអ្នកជំងឺដែលបានអនុវត្តន៍ក្បាច់តៃជិ មានការរីកចម្រើនយ៉ាងច្រើនផ្នែកជំងឺបេះដូងរបស់ពួកគេ ដែលអាចធ្វើឲ្យពួកគេអាចធ្វើសកម្មភាពប្រចាំថ្ងៃផ្សេងៗនៅផ្ទះ ប្រកបដោយទំនុកចិត្តខ្ពស់ ព្រមទាំងមានអារម្មណ៍ស្រស់ស្រាយជាងមុន បើធៀបជាមួយអ្នកដែលមិនបានចូលរួមហាត់តៃជិ។

ក្រៅពីមានប្រយោជន៍ចំពោះអ្នកជំងឺបេះដូង ទម្រង់នៃក្បាច់តៃជិនេះ គឺពិតជាមានប្រយោជន៍ណាស់ចំពោះអ្នកដែលមានអារម្មណ៍តានតឹង និងដោះស្រាយចំពោះអ្នកខ្វះសមត្ថភាពហាត់ប្រាណទៀតផង។

ការស្រាវជ្រាវនេះ ត្រូវបានបោះពុម្ភកាលពីថ្ងៃទី ២៥ ខែមេសាម្សិលម៉ិញនេះ នៅក្នុងព្រឹត្តបត្រវេជ្ជសាស្រ្ត។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕