ជំងឺស្រ្ដូក​កើត​ភាគ​ច្រើន​​នៅ​ពេល​គេង​លក់​

ស្រ្ដូកភាគច្រើនកើតពេលគេង

របាយការណ៍របស់ការស្រាវជ្រាវថ្មីមួយ បានបង្ហាញថា អ្នកដែលមានជំងឺស្រ្ដូក (ដាច់សរសៃឈាមក្នុងខួរក្បាល) ជិត១៥ភាគរយមានការពិបាកក្នុងការជួយសង្រ្គោះ ដោយសារតែជំងឺនេះ កើតឡើងកំឡុងពេលពួកគេកំពុងលង់លក់ក្នុងដំណេក។

លោកវេជ្ជបណ្ឌិត Jason Mackey មកពីសាកលវិទ្យាល័យ ស៊ីនស៊ីណាទិ សហរដ្ឋអាមេរិក បានពន្យល់ថា ឱសថអាចការពារភាពពិការជាអចិន្រ្ដៃយ៍ក្រោយពេលកើតស្រ្ដូក ប៉ុន្ដែឱសថនេះត្រូវផ្ដល់ឲ្យអ្នកជំងឺយ៉ាងយូរបំផុត ៤ម៉ោងកន្លះក្រោយពេលអការៈនៃជំងឺនេះចាប់ផ្ដើម។ ជាសំណាងអាក្រក់ មនុស្សដែលកើតអការៈស្រ្ដូក ពេលគេងលក់ មិនអាចដឹងនោះទេ ដែលធ្វើឲ្យពួកគេមិនអាចទទួលការព្យាបាលបានទាន់ពេលវេលា។

លោកវេជ្ជបណ្ឌិតរូបនេះ បានបង្ហាញក្ដីកង្វល់ថា

អ្នកជំងឺដែលមានអការៈជំងឺស្រ្ដូកនាពេលគេងលក់ បានធ្វើឲ្យពួកគេមិនអាចលេបថ្នាំបាន ដែលនេះជាបញ្ហាធំបំផុត។ ប្រការល្អបំផុតគឺត្រូវចេះការពារខ្លួនកុំឲ្យកើតជំងឺនេះ ដោយត្រូវថែរក្សាសុខភាពឲ្យបានល្អ ទប់ស្កាត់មិនឲ្យសម្ពាធឈាមឡើងខ្ពស់ ទទួលទានអាហារដែលត្រឹមត្រូវ ធ្វើការហាត់ប្រាណឲ្យបានទៀតទាត់ និងត្រូវត្រួតពិនិត្យកម្រិតកូឡេស្ដេរ៉ូលឲ្យបានជាប្រចាំ។

វេជ្ជបណ្ឌិត Mackey បានបន្ថែមទៀតថា ជំងឺស្រ្ដូកអាចព្យាបាលបាន ប្រសិនបើមនុស្សយើងដឹងពីវាបានរហ័ស។

ជំងឺស្រ្ដូក គឺជាជំងឺកំពូលទីបីដែលបានសម្លាប់ជីវិតមនុស្សនៅក្នុងសហរដ្ឋអាមេរិក បន្ទាប់ពីជំងឺបេះដូង និងមហារីក។

នៅក្នុងការស្រាវជ្រាវនេះ ក្រុមអ្នកស្រាវជ្រាវបានធ្វើការពិនិត្យលើទិន្នន័យរបស់អ្នកជំងឺស្រ្ដូកដែលបញ្ជូនមកបន្ទប់សង្គ្រោះបន្ទាន់ នៅក្នុងសហរដ្ឋអាមេរិក។ ពួកគេបានរកឃើញថា ក្នុងចំណោមអ្នកជំងឺស្រ្ដូក ១៨៥៤នាក់ មាន២៧៣នាក់ហើយ (១៥ភាគរយ) មានអការៈជំងឺស្រ្ដូកពេលកំពុងតែគេង។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕