ទឹកផ្លែ​ឈ័រ​រី​ អាច​ជួយ​ឲ្យ​គេង​លក់ស្រួល​

ផ្លែ Cherry

ទឹកផ្លែឈ័ររី (Cherry) ដែលមានសារធាតុចិញ្ចឹមខ្ពស់ មានសារធាតុប្រឆាំងអុកស៊ីតកម្មដ៏ខ្លាំងក្លានោះ ត្រូវបានគេរកឃើញថា អាចព្យាបាលជំងឺគេងមិនលក់បានយ៉ាងមានប្រសិទ្ធិភាព។

យោងតាមក្រុមអ្នកស្រាវជ្រាវអន្តរជាតិមួយក្រុម បានបង្ហាញថា ការញ៉ាំនូវទឹកផ្លែឈ័ររីជាប្រចាំ នឹងជួយឲ្យវដ្ដនៃការគេងរបស់មនុស្សដំណើរការបានល្អ និងបង្កើនការគេងលក់សម្រាប់អ្នកដែលកើតជំងឺគេងមិនលក់។

ក្រុមអ្នកជំនាញបានអះអាងថា ទឹកផ្លែឈ័ររីអាចជួយដល់អ្នកគេងមិនលក់បាន គឺដោយសារតែវាមានផ្សំទៅដោយអ័រម៉ូនម៉េឡាតូនីន (Melatonin) ខ្ពស់។

អ្នកស្រាវជ្រាវម្នាក់ របស់ក្រុមដែលស្រាវជ្រាវពីបញ្ហានេះ មកពីសាកលវិទ្យាល័យ Northumbria បានឲ្យដឹងថា នៅពេលដែលរាត្រីកាលមកដល់ រាងកាយរបស់យើងបានផលិតនូវ ម៉េឡាតូនីន ដើម្បីជាសញ្ញាប្រាប់ថា នេះគឺជាពេលដែលត្រូវចូលគេង។ ទឹកផ្លែឈ័ររី បានបន្ថែមនូវម៉េឡាតូនីន ដូច្នេះវាបានបង្កើនសញ្ញានៃការគេងកាន់តែខ្លាំងថែមទៀត។

ដោយសារតែវាមានប្រយោជន៍បែបនេះហើយ ទើបវាត្រូវបានគេណែនាំឲ្យដល់អ្នកដែលកើតជំងឺកេងមិនលក់ ឬគេងលក់មិនស្កប់ស្កល់។

គួរបញ្ជាក់ផងដែរថា ផ្លែឈ័ររី គឺត្រូវបានគេចាត់ទុកថាជាផ្លែឈើដ៏មានប្រយោជន៍ចំពោះសុខភាពជាច្រើន ដោយវាមិនត្រឹមតែអាចកែខៃការគេងមិនលក់ប៉ុណ្ណោះទេ ប៉ុន្ដែវាក៏ជាផ្លែឈើដែលអាចកាត់បន្ថយហានីភ័យនៃជំងឺបេះដូង ជំងឺស្រ្ដូក និងជំងឺមហារីកបានទៀតផង។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕