កាហ្វេមួយពែងក្នុងមួយថ្ងៃ ល្អចំពោះស្រ្ដី

កាលពីពេលថ្មីៗនេះ ក្រុមអ្នកស្រាវជ្រាវជនជាតិស៊ុយអែត បានរកឃើញថា ស្រ្ដីដែលទទួលទានកាហ្វេមួយពែង ឬលើសពីនេះជារៀងរាល់ថ្ងៃ នឹងធ្វើឲ្យពួកគេកាត់បន្ថយនូវអត្រាគ្រោះថ្នាក់នៃជំងឺស្រ្ដូក ឬការដាច់សរសៃឈាមក្នុងខួរក្បាល បាន២៥ភាគរយ។ ក្រុមអ្នកស្រាវជ្រាវទាំងនេះ បានរកឃើញទៀតថា មិនត្រឹមតែកាត់បន្ថយហានិភ័យនៃជំងឺស្រ្ដូកទេ ថែមទាំងរកឃើញទៀតថា ស្រ្ដីដែលមិនទទួលទានកាហ្វេជាប្រចាំ នឹងធ្វើឲ្យពួកគេកើនឡើងនូវឱកាសនៃការកើតជំងឺស្រ្ដួកខ្ពស់ថែមទៀតផង។

អ្នកដឹកនាំការស្រាវជ្រាវ លោក ស៊ូសាណា ឡាសុន (Susanna Larsson) មកពីវិទ្យាស្ថានជាតិ ឱសថសាស្រ្ដ និងបរិស្ថានការ៉ូលីនស្កា (Karolinska) នៃទីក្រុងស្កុកហូម ប្រទេសស៊ុយអែត បានឲ្យដឹងថា

លទ្ធផលដែលបានមកពីស្រាវជ្រាវទៅលើស្រ្ដីនេះ បានបង្ហាញថា បរិមាណកាហ្វេ ១ទៅ ៥ពែងក្នុងមួយថ្ងៃ ស្មើនឹងការកាត់បន្ថយហានិភ័យនៃជំងឺស្រ្ដូកបានពី ២២ទៅ ២៥ភាគរយ បើប្រៀបធៀបទៅនឹងបរិមាណកាហ្វេតិចជាងមួយពែង។

ក្រុមអ្នកស្រាវជ្រាវនេះ បានធ្វើការវិភាគដោយត្រួតពិនិត្យលើស្រ្ដីចំនួន ៣៤,៦៧០នាក់ ចាប់ពីអាយុ ៤៩ទៅ ៨៣ឆ្នាំ រយៈពេលនៃការត្រួតពិនិត្យជាមធ្យម១០ឆ្នាំ។ គ្រប់ស្រ្ដីទាំងអស់បានចូលរួមយ៉ាងសកម្មក្នុងការស្រាវជ្រាវរយៈពេលវែងនេះ ដើម្បីឲ្យដឹងពីទំនាក់ទំនងរវាងរបបអាហារ របៀបរស់នៅ និងការវិវត្តន៍នៃជំងឺ។ ជាលទ្ធផលអំឡុងឆ្នាំ ១៩៩៨ ដល់ ២០០៨ ស្រ្ដីសរុប ១៦៨០នាក់ បានរងគ្រោះដោយសារជំងឺស្រ្ដូក។ ក្រុមអ្នកស្រាវជ្រាវ បានរកឃើញថា ស្រ្ដីដែលផឹកកាហ្វេ បានកាត់បន្ថយគ្រោះថ្នាក់ជំងឺស្រ្ដូកពី ២២ទៅ២៥ភាគរយ។ សារៈសំខាន់គឺមានប្រហាក់ប្រហែលគ្នារវាងការផឹក ១ទៅ២ពែង ឬ ៣ទៅ៤ពែង ឬ លើសពី៥ពែងក្នុងមួយថ្ងៃ ដែលប្រសើរជាងស្រ្ដីដែលផឹកតិចជាងមួយពែងក្នុងមួយថ្ងៃ។

ទោះបីជាយ៉ាងណាក៏ដោយ ក្រុមអ្នកស្រាវជ្រាវស៊ុយអែតនេះបានបញ្ជាក់ថា នេះគ្រាន់តែជាការស្រាវជ្រាវជាបឋមប៉ុណ្ណោះ ដែលមិនអាចធ្វើស្រ្ដីទាំងអស់ប្ដូរទំលាប់នៃការផឹកកាហ្វេបាននោះទេ។ បន្ថែមលើនេះទៀត អ្នកជំនាញម្នាក់បាននិយាយថា ដោយសារតែការស្រាវជ្រាវធ្វើឡើងតែចំពោះជនជាតិស៊ុយអែត ដូច្នេះវាមិនអាចតំណាងឲ្យប្រជាជនទាំងអស់បាននោះទេ។

ប៉ុន្តែកាលពីឆ្នាំមុននេះ ក្រុមអ្នកស្រាវជ្រាវជនជាតិអង់គ្លេស មកពីសាកលវិទ្យាល័យខេមប្រីជ ក៏បានរកឃើញទំនាក់ទំនងរវាងកាហ្វេ និងការថយចុះនៃគ្រោះថ្នាក់ជំងឺស្រ្ដូកផងដែរ។ ការស្រាវជ្រាវដែលធ្វើឡើងទាំងបុរស និងស្រ្ដី ចំនួន ២៣,៣០០នាក់នេះ បានបង្ហាញថា ការផឹកកាហ្វេ អាចធ្វើឲ្យហានិភ័យនៃជំងឺស្រ្ដូកថយចុះ ២៧ភាគរយ។ ដូច្នេះយើងអាចសន្និដ្ឋានបានថា ការទទួលកាហ្វេពិតជាល្អ ក្នុងការកាត់បន្ថយអត្រាគ្រោះថ្នាក់នៃជំងឺស្រ្ដូកពិតមែន។

សូមបញ្ជាក់ថា ជំងឺស្រ្ដូកជាជំងឺដ៏សាហាវលំដាប់ទី៣ក្នុងការសម្លាប់មនុស្សនៅសហរដ្ឋអាមេរិក បន្ទាប់ពីជំងឺបេះដូង និងមហារីក។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕