ទទួលទានសាច់ក្រហមរាល់ថ្ងៃកើតមហារីកពោះវៀន

សាច់ក្រហម

ដំណឹងនេះប្រហែលជាមិនល្អនោះទេសម្រាប់អ្នកដែលចូលចិត្តទទួលទានសាច់ក្រហម។ របាយការណ៍ពីការស្រាវជ្រាវថ្មីមួយដែលធ្វើឡើងដោយវិទ្យាស្ថានស្រាវជ្រាវរបស់អាមេរិក និងមូលនីធីស្រាវជ្រាវជំងឺមហារីកពិភពលោក ដែលបានចេញផ្សាយកាលពីថ្ងៃច័ន្ទដើមសប្ដាហ៍នេះបានឲ្យដឹងថា ការទទួលទានសាច់ក្រហមជាច្រើនពេកធ្វើឲ្យបង្កើនហានីភ័យនៃការវិវឌ្ឍទៅរកជំងឺមហារីកពោះវៀន។

ជំងឺមហារីកពោះវៀន គឺជាជំងឺដ៏គ្រោះថ្នាក់មួយដែលកើតឡើងដោយសារការរីកលូតលាស់នៅក្នុងពោះវៀនធំ, ចុងពោះវៀន និងខ្នែងពោះវៀន។ វាជាប្រភេទជំងឺមហារីកលំដាប់ថ្នាក់ទីបួន ដែលបានឆក់យកជីវិតមនុស្សជិត ៦៥៥,០០០នាក់ក្នុងមួយឆ្នាំនៅទូទាំងពិភពលោក។

របាយការណ៍នៃការស្រាវជ្រាវដែលមាន ៨៥០ទំព័រនេះ បាន

ណែនាំឲ្យមនុស្សកាត់បន្ថយ ឬក៏កម្រិតបរិមាណនៃការទទួលទានសាច់ក្រហមដូចជាសាច់គោ សាច់ចៀម ឬសាច់ជ្រូកជាដើម និងក៏ត្រូវជៀសវាងទទួលទានសាច់កែឆ្នៃដែលមានដូចជា ហ៊ែម និងសាច់ក្រកសាឡាមីជាដើម (salami)។

បរិមាណដែលសមស្របក្នុងការទទួលទានសាច់ក្រហម គឺ៥០០ក្រាម (៥ខាំ) ក្នុងមួយសប្ដាហ៍ ឬលើសនេះបន្ដិចបន្តួច។

មូលនីធីជំងឺមហារីកពិភពលោកបានលើកឡើងថា ការសិក្សា២៥គម្រោងផ្សេងគ្នា បានរកឃើញដូចគ្នាពីភស្ដុតាងនៃសាច់ក្រហមបង្កជំងឺមហារីកពោះវៀន។

របាយការណ៍ដដែលនេះក៏បានបញ្ជាក់ពីវិធីការពារជំងឺមហារីកពោះវៀនផងដែរ ដែលក្នុងនោះតម្រូវឲ្យមនុស្សគ្រប់រូបកែប្រែទម្លាប់រស់នៅប្រចាំថ្ងៃ ដោយងាកមកហាត់ប្រាណឲ្យបានទៀងទាត់ កាត់បន្ថយគ្រឿងស្រវឹង ទទួលទានអាហារដែលត្រឹមត្រូវ គ្រប់គ្រងទម្ងន់ជាដើម នឹងធ្វើឲ្យកាត់បន្ថយករណីជំងឺមហារីកពោះវៀនបានដល់ទៅ ៤៥ភាគរយ ឬក៏ស្មើនឹង ៦៣០០០ករណីក្នុងមួយឆ្នាំ។

ជំងឺមហារីកពោះវៀនមិនមានរោគសញ្ញាព្រមានជាមុននោះទេ នៅពេលជំងឺនេះកើតឡើងអ្នកនឹងឃើញមានរោគសញ្ញាមួយចំនួនដូចជា ឈាមក្នុងលាមក ឈឺពោះខ្លាំង មានអាការៈទល់លាមក ឬក៏រាគ ស្រកទម្ងន់ ឬហត់ល្ហិតល្ហៃអស់កម្លាំង។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕