មនុស្ស​ចាស់​ផឹក​ស្រា​ល្មម អាច​​កាត់​បន្ថយ​ជំងឺ​រវើ​រវាយ​

មនុស្សចាស់ប្រជុំគ្នាផឹកស្រាបៀ

យោងតាមការសិក្សាស្រាវជ្រាវថ្មីបំផុតមួយបានរកឃើញថា មនុស្សចាស់ដែលបន្តរីករាយនឹងការទទួលទានជាតិអាល់កុលក្នុងកម្រិតល្មមជារៀងរាល់ថ្ងៃ អាចជួយឲ្យពួកគាត់កាត់បន្ថយជំងឺរវើរវាយ ភ្លេចភ្លាំងបាន។

ក្រុមអ្នកវិទ្យាសាស្រ្ដបានរកឃើញថា មនុស្សចាស់ដែលមានវ័យចាប់ពី ៧៥ឆ្នាំឡើងទៅ ដែលប្រឈមនឹងការភ្លេចភ្លាំងច្រើន ឬក៏រវើរវាយនោះ អាចកាត់បន្ថយការប្រឈមនេះ ប្រសិនបើទទួលទានស្រាមួយកែវក្នុងមួយថ្ងៃ ប្រៀបធៀបជាមួយអ្នកមិនទទួលទានសោះ។

ក្រុមអ្នកស្រាវជ្រាវដែលមកពីវិទ្យាស្ថានសុខាភិបាលនៃប្រទេសអាល្លឺម៉ង់ បានធ្វើការសិក្សាទៅលើមនុស្សចាស់អាយុ លើស៧៥ឆ្នាំចំនួនជាង ៣២០២នាក់។ ក្រោយពីបានធ្វើការត្រួតពិនិត្យសុខភាព

ចំនួនពីរដង ក្នុងរយៈពេលបីឆ្នាំរួចមក បានឲ្យអ្នកស្រាវជ្រាវរកឃើញថាអ្នកដែលបានផឹកគ្រឿងស្រវឹង (ស្រា ឬស្រាបៀ) ក្នុងកម្រិតតិចល្មមជារៀងរាល់ថ្ងៃមានអត្រាជំងឺភ្លេចភ្លាំង រវើរវាយតិចជាងអ្នកមិនផឹកសោះ ចំនួន៣០ភាគរយ។

មិនមែនតែការស្រាវជ្រាវនេះមួយទេ ដែលបានរកឃើញលទ្ធផលបែបនេះ មានការស្រាវជ្រាវមុនៗនេះ ក៏បានរកឃើញលទ្ធផលស្រដៀងគ្នានេះដែរ ដែលធ្វើឲ្យមានការណែនាំឲ្យមនុស្សចាស់វ័យ ៧៥ឆ្នាំឡើង គួរតែទទួលទានជាតិអាល់កុលក្នុងកម្រិតមួយតិចល្មមប្រសើរជាងអត់សោះ។

ក្នុងរយៈពេល ៣១ឆ្នាំចុងក្រោយនេះ ភាពទាក់ទងគ្នារវាងការផឹកជាតិអាល់កុលក្នុងកម្រិតសមល្មម ជាមួយនឹងជំងឺរវើរវាយ ត្រូវបានគេយកមកសិក្សាជាច្រើន ដែលក្នុងនោះ ការស្រាវជ្រាវស្ទើរតែទាំងអស់ បានបង្ហាញពីប្រសិទ្ធភាពនៃការផឹកគ្រឿងស្រវឹងក្នុងកម្រិតតិចល្មម អាចកាត់បន្ថយជំងឺនេះបាន។

ដោយសារតែមានលទ្ធផលនៃការស្រាវជ្រាវជាច្រើនបានបង្ហាញស្រដៀងគ្នាបែបនេះហើយ ទើបគេអាចសន្មតបានថា ជាតិអាល់កុលក៏ល្អចំពោះសុខភាពមនុស្សចាស់ដែរ ប៉ុន្ដែត្រូវស្ថិតក្នុងកម្រិតមួយតិចល្មម។

លទ្ធផលនៃការស្រាវជ្រាវចុងក្រោយនេះ ត្រូវបានបោះពុម្ភក្នុងព្រឹត្តបត្រ Age and Aging។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕