ស្ករគ្រាប់ជួយឲ្យអ្នកមានរាងស្វ៊ែលស្អាត

ស្រ្ដីទទួលទានស្ករគ្រាប់

ការសិក្សាថ្មីមួយបានរកឃើញថា អ្នកដែលទទួលទានស្ករគ្រាប់ និងស្ករសូកូឡា អាចធ្វើឲ្យពួកគេមានចង្កេះតូចជាងមុន ស្រកទម្ងន់ និងមានសន្ទស្សន៍ម៉ាស់របស់ដងខ្លួន (BMI) ទាបជាងមុន។

បន្ថែមលើនេះទៀត អ្នកដែលទទួលទានស្ករគ្រាប់ និងសូកូឡាអាចកាត់បន្ថយហានីភ័យនៃជំងឺលើសឈាមបាន ១៤ភាគរយ និងអាចកាត់បន្ថយគ្រោះថ្នាក់នៃជំងឺបេះដូង និងការដាច់សរសៃឈាមក្នុងខួរក្បាលបាន ១៥ភាគរយថែមទៀតផង។

ទោះជាយ៉ាងណាក៏ដោយ ការស្រាវជ្រាវនេះ មិនបានសំណូមពរឲ្យមនុស្សគ្រប់គ្នាទទួលទានស្ករគ្រាប់តែមួយមុខដើម្បីស្រកទម្ងន់នោះទេ។ បន្ថែមលើស្ករគ្រាប់ ត្រូវហាត់ប្រាណដើម្បីកាត់បន្ថយនូវកម្រិតកាឡូរីដែលចូលក្នុងខ្លួនផងដែរ។

អ្នកស្រី ការ៉ូល អូនៀល (Carol O’Neil) ដែលជាអ្នកស្រាវជ្រាវម្នាក់មកពី

សាកលវិទ្យាល័យកសិកម្ម Louisiana State បាននិយាយថា អ្នកដែលចូលរួមក្នុងការស្រាវជ្រាវនេះ បានទទួលទានស្ករគ្រាប់មិនសូវជាច្រើនទេ ពោលជាមធ្យម ១,៣អោនស៍ (៣៧ក្រាម) ក្នុងមួយថ្ងៃ។

អ្នកស្រាវជ្រាវផ្សេងទៀត បានចង្អុលបង្ហាញថា ការស្រាវជ្រាវនេះគឺធ្វើឡើងដោយសួរអ្នកចូលរួមឲ្យប្រាប់ថា តើពួកគេបានទទួលទានអ្វីនៅមុនការសួរនេះមួយថ្ងៃ។

អ្នកស្រី អូនៀល និងសហការីរបស់គាត់បានវិភាគនូវចម្លើយរបស់មនុស្សពេញវ័យជនជាតិអាមេរិក ច្រើនជាង ១៥,០០០នាក់ អាយុចាប់ពី ១៩ឆ្នាំឡើងទៅ។ ជាលទ្ធផល មាន២០ភាគរយនៃអ្នកចូលរួមបានឆ្លើយថា ពួកគេទទួលទានស្ករគ្រាប់គ្រប់ប្រភេទ ដែលរួមមានស្ករគ្រាប់សូកូឡា និងស្ករគ្រាប់ផ្អែម។ ការស្រាវជ្រាវនេះក៏រកឃើញដែរថា មនុស្សពេញវ័យមិនទទួលទានស្ករគ្រាប់ច្រើនដូចកូនក្មេងនោះទេ។ អ្នកដែលឆ្លើយថា បានញ៉ាំគ្រាប់ទាំងនោះ មាន BMI ចំនួន ២៧,៧ជាមធ្យម ខណៈដែលអ្នកមិនញ៉ាំស្ករគ្រាប់មាន BMI ២៨,២។

ជាចុងក្រោយការស្រាវជ្រាវនេះក៏បានបញ្ជាក់ដែរថា អ្នកដែលទទួលទានស្ករគ្រាប់មានរាងស្វ៊ែលស្អាត ដោយសារតែអ្នកទាំងនោះទទួលទាននូវអាហារសម្រន់ផ្សេងៗបានត្រឹមត្រូវ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕