មិនអាច​បិទ​ភ្នែក​ជា​រៀង​រហូត​ក្រោយ​វះ​កាត់​ផ្ទៃ​មុខ​

អ្នកស្រី Leisz មិនអាចបិទភ្នែកបាន

ស្រ្ដីម្នាក់មានឈ្មោះថា Marilyn Leisz ត្រូវបានរស់នៅក្នុងជីវិតដ៏លំបាករយៈពេល ៦ឆ្នាំមកហើយ ដោយសារតែការវះកាត់កែសម្ផស្សបរាជ័យមួយ។ ស្រ្ដីដែលរស់នៅសហរដ្ឋអាមេរិកមួយនេះ មិនអាចបិទភ្នែករបស់គាត់ជារៀងរហូតដោយសារការវះកាត់នេះ។ ទោះបីជាពេលមុជទឹក ពេលគេង ក៏អ្នកស្រីមិនអាចបិទវាបានដែរ ដែលធ្វើឲ្យអ្នកស្រីត្រូវជួបនៅសុបិន្តអាក្រក់នេះមួយជីវិត។ អ្នកស្រីបានព្យាយាមទៅវះកាត់ដើម្បីឲ្យភ្នែករបស់គាត់អាចបិទបើកបានធម្មតាជាង ៣០ដងមកហើយតែនៅតែមិនអាចកែខៃឲ្យដូចដើមបាន។

អ្នកស្រី Leisz បានប្រាប់សារព័ត៌មានថា ពេលដែលមុជទឹក អ្នកស្រីត្រូវ

ដាក់សារធាតុរំអិលម្យ៉ាងចូលទៅក្នុងភ្នែកដើម្បីកុំឲ្យទឹក និងសាប៊ូចូលភ្នែកបាន។ នៅពេលដែលមុជទឹកហើយ គាត់ត្រូវលាងភ្នែកគាត់ចេញ។ អ្វីដែលពិបាកជាងនេះទៀត គឺពេលអ្នកស្រីចូលដំណេក។ គាត់ត្រូវពាក់ម៉ាសនៅត្រង់ភ្នែក ដើម្បីកុំឲ្យមានវត្ថុអ្វីចូលភ្នែកគាត់ក្នុងពេលគេលក់។

កាលពីថ្ងៃពុធ សប្ដាហ៍មុននេះ អ្នកស្រីបានឈ្នះនៅក្នុងតុលាការ ដោយចៅក្រមបានផ្ដល់នូវជំងឺចិត្តដល់អ្នកស្រី ចំនួន ១១៥,០០០ដុល្លារ ក្រោយពីរកឃើញថា ការវះកាត់នេះបានធ្វើឲ្យអ្នកស្រីជួបប្រទះនូវបញ្ហាភ្នែកបើករហូតនេះ។ ប៉ុន្ដែចៅក្រមដដែលក៏បានបដិសេធនូវការទាមទាររបស់អ្នកស្រី ដែលថាអ្នកស្រីគួរតែបានច្រើនជាងនេះ ដោយសារតែអ្នកស្រីប្រឈមជាមួយនឹងគ្រោះថ្នាក់ខ្លាំង។

មេធាវីរបស់អ្នកស្រី Leisz ឈ្មោះ Roy Konray បាននិយាយថា គាត់គួរតែឈ្នះដូចអ្វីដែលបានរំពឹងទុក ព្រោះការវះកាត់នេះ ពិតជាធ្វើឲ្យអ្នកស្រីជួយប្រទះនូវបញ្ហាដ៏ធ្ងន់ធ្ងរនេះមែន។

សូមបញ្ជាក់ថា អ្នកស្រីបានជួបប្រទះនូវបញ្ហាបរាជ័យក្នុងការវះកាត់ផ្ទៃមុខនេះ ជាច្រើនឆ្នាំមកហើយ ប៉ុន្ដែពេលនេះតុលាការបានផ្ដល់សំណងជំងឺចិត្តដល់អ្នកស្រីតែបន្តិចបន្តួចប៉ុណ្ណោះ។ អ្នកស្រីបានទៅវះកាត់កែសម្រួលវាឡើងវិញ ជាង ៣០ដង ដោយការឈឺចាប់បំផុត តែអ្វីៗហាក់ដូចជាមិនបានផលទាល់តែសោះ។ ស្របជាមួយគ្នានេះដែរ អ្នកស្រីក៏មានការភ័យខ្លាចថា ភ្នែករបស់អ្នកស្រីនឹងមើលលែងឃើញក្នុងពេលណាមួយមិនខាន។

អ្នកស្រីបានប្រាប់ទីភ្នាក់ងារសារព័ត៌មានទាំងអារម្មណ៍ក្ដុកក្ដួលថា អ្នកស្រីមានអារម្មណ៍ថាជីវិតរបស់អ្នកស្រីត្រូវបានគេលួចយកទៅបាត់ទៅហើយ។

មិនមែនតែអ្នកស្រីប៉ុណ្ណោះទេ ដែលទទួលរងផលអវិជ្ជមានក្រោយពីការវះកាត់ផ្ទៃមុខ មានមនុស្សជាច្រើនទៀតក៏ជួបប្រទះនូវបញ្ហាផងដែរ ដូចជាធ្វើឲ្យខូចទម្រង់មុខទាំងមូលជាដើម។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕