ក្មេងស្រី​ជំទង់ប្រើថ្នាំពន្យារកំណើតកាន់តែច្រើន

ថ្នាំពន្យារកំណើត

យោងតាមការសិក្សាស្រាវជ្រាវថ្មីមួយដែលចេញផ្សាយដោយក្រុមហ៊ុនថមសុនរ៉យទ័រកាលពីថ្ងៃព្រហស្បតិ៍សប្ដាហ៍នេះ បានឲ្យដឹងថា មានក្មេងស្រីជំទង់របស់អាមេរិកបាន និងកំពុងតែប្រើថ្នាំលេបពន្យារកំណើតកាន់តែច្រើនឡើង។

ការស្រាវជ្រាវនេះ បានរកឃើញថា ១៨ភាគរយនៃក្មេងជំទង់អាយុពី ១៣ឆ្នាំ ទៅ ១៨ឆ្នាំបានប្រើប្រាស់ថ្នាំលេបពន្យារកំណើត ដែលចំនួននេះមានការកើនឡើងដូចមេឃ និងដីបើប្រៀបធៀបទៅឆ្នាំ ២០០២។

ចាប់ពីឆ្នាំ ២០០២ រហូតមកដល់ឆ្នាំ ២០០៩ មានក្មេងស្រីដែលប្រើថ្នាំពន្យារកំណើតកើនឡើងរហូតដល់ ៥០ភាគរយ។ ក្នុងចំណោមនោះ ក្មេងជំទង់ដែលមានអាយុច្រើនប្រើច្រើនជាងក្មេងដែលមានអាយុតិច ពោលគឺក្មេងស្រីដែលមានអាយុ ១៨ឆ្នាំ មាន ២៧,១ភាគរយមានការពន្យារកំណើត ខណៈដែលក្មេងស្រីវ័យ ១៣ឆ្នាំមាន ៣,៧ភាគរយ។

របាយការណ៍ក្នុងការស្រាវជ្រាវដដែលក៏បានបញ្ជាក់ផងដែរថា

ថ្នាំពន្យារកំណើតម៉ាក Yaz ដែលផលិតដោយក្រុមហ៊ុនបាយើ គឺជាថ្នាំដែលពេញនិយមបំផុតសម្រាប់ក្មេងស្រី វ័យចាប់ពី ១៣ឆ្នាំ ដល់១៨ឆ្នាំ ។

ការសិក្សានេះ គឺធ្វើទៅតាមទិន្នន័យដែលបានមកពីកម្មវិធីផ្ទុកទិន្នន័យដាតាបែស របស់ថមសុនរ៉យទ័រ។ នៅក្នុងរបាយការណ៍នេះក៏ប្រាប់ដែរថា អ្នកដែលត្រូវកត់ត្រាចូលក្នុងទិន្នន័យ គឺចាប់ពីក្មេងស្រី១៣ឆ្នាំ ដល់ស្រ្ដីអាយុ ៣៣ឆ្នាំ ដែលបានប្រើថ្នាំពន្យារកំណើតយ៉ាងហោចណាស់ក៏៦ខែដែរ។

យោងតាមប្រភពដដែលខាងលើ ក៏អាចឲ្យយើងដឹងបានដែរថា ការចំណាយទៅលើថ្នាំពន្យារកំណើតមានចំនួន ១២,៧៩លានដុល្លារ ដែលកើនឡើងពី ១១,៩០លានដុល្លារកាលពីឆ្នាំ ២០០២។

សូមបញ្ជាក់ថា ថមសុនរ៉យទ័រគឺជាក្រុមហ៊ុនដ៏ធំ ដែលក្នុងនោះទីភ្នាក់ងារព័ត៌មានរ៉យទ័រក៏ស្ថិតនៅក្រោមក្រុមហ៊ុនថមសុនរ៉យទ័រផងដែរ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕