ទូរសព្ទដៃប៉ះពាល់ដល់ខួរក្បាល

ការស្រាវជ្រាវពីវិទ្យាស្ថានសុខភាពជាតិ នៅសហរដ្ឋអាមេរិក បានរកឃើញថា ទូរសព្ទចល័តអាចប៉ះពាល់ដល់ខួរក្បាល។ របាយការណ៍នៃការស្រាវជ្រាវនេះបានបង្ហាញថា ក្រោយពេលចំណាយពេលរហូតដល់ ៥០នាទីក្នុងការនិយាយទូរសព្ទ នោះខួរក្បាលរបស់យើងនឹងមានផលប៉ះពាល់ដោយសារសេវារបស់ប្រពន័្ធទូរសព្ទ ។

ចាប់តាំងពីទូរសព្ទដៃត្រូវបានប្រើពីមនុស្សស្ទើរទាំងអស់គ្នា បានធ្វើឲ្យមានការចាប់អារម្មណ៍ជាច្រើនពីផលប៉ះពាល់របស់វាលើរាងកាយមនុស្ស។

ការសិក្សាដ៏ធំមួយលើអ្នកប្រើទូរសព្ទចំនួន ៤២ម៉ឺននាក់ នៅប្រទេសដាណឺម៉ាក បានបង្ហាញថា មិនមានទំនាក់ទំនងណាមួយរវាងទូរសព្ទ និងជំងឺមហារីកនោះទេ ប៉ុន្ដែការសិក្សាមួយផ្សេងទៀត បានរកឃើញថាដែនម៉ាញ៉េទិចរបស់អង់តែនទូរសព្ទ បានធ្វើឲ្យប៉ះពាល់ដល់ខួរក្បាលរបស់មនុស្ស។

លោកសាស្រ្ដាចារ្យ ប៉ាទ្រិក ហាហ្កាត (Patrick Haggard) មកពីសាកលវិទ្យាល័យឡុនដុន បាននិយាយថា នេះគឺជាលទ្ធផលនៃការស្រាវជ្រាវដ៏គួរឲ្យចាប់អារម្មណ៍ ប៉ុន្ដែផលប៉ះពាល់របស់ទូរសព្ទមកលើខួរក្បាលគឺនៅតែមិនទាន់ច្បាស់នៅឡើយ។

ទោះបីជាយ៉ាងណាក៏ដោយការសិក្សាស្រាវជ្រាវផ្សេងទៀតក៏បានបង្ហាញដែរថា សេវារបស់បណ្ដាញទូរសព្ទដៃ មានផលប៉ះពាល់ដល់ផ្នែកខ្លះនៃខួរក្បាល ដែលចាំបាច់ត្រូវធ្វើការតាមដានបន្តទៀត។

ចំណែកឯសាស្រ្ដាចារ្យវេជ្ជបណ្ឌិត Malcolm Sperrin ប្រធានមន្ទីពេទ្យ Berkshire បានប្រាប់ដែរថា គាត់ចាប់អារម្មណ៍ចំពោះការស្រាវជ្រាវនេះត្រង់របាយការណ៍ដែលនិយាយអំពីការកើនឡើងនូវម៉េតាប៉ូលីសនៅក្នុងខួរក្បាល ដោយសារការប្រើប្រាស់ទូរសព្ទដៃ។

លោកបានបន្តថា ចាំបាច់ត្រូវទាមទារឲ្យមានការបង្កើតនូវការសិក្សាផ្សេងៗទៀត ដើម្បីដឹងពីទំនាក់ទំនងរវាងថាមពលខួរក្បាល និងហានីភ័យសុខភាព ដោយសារតែទូរសព្ទដៃ។ វាសមហេតុផលណាស់ក្នុងការសន្មតថា ខួរក្បាលអាចរងផលប៉ះពាល់ដោយសារតែការនិយាយទូរសព្ទយូរ។ ប៉ុន្ដែការស្រាវជ្រាវបច្ចុប្បន្ននេះ មិនបានបង្ហាញថាទូរសព្ទដៃនបង្កផលប៉ះពាល់ចំពោះសុខភាពនោះទេ ក្រៅពីប៉ះពាល់ខួរក្បាល។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕