គោល​ការណ៍​សុវត្ថិ​ភាព​សម្រាប់​អ្នក​ប្រើ​ទូរស័ព្ទ​

ទូរសព្ទគឺជាបច្ចេកវិជ្ជាមួយដែលផ្ដល់ភាពងាយស្រួលជាច្រើនសម្រាប់មនុស្សជាតិ។ ប៉ុន្ដែទូរសព្ទក៏បានផ្ដល់ផលអវិជ្ជមានជាច្រើនដល់សុខភាពរបស់អ្នកប្រើប្រាស់វាផងដែរ ដូចដែលខ្មែរសារិកាធ្លាប់ផ្សាយជូនប្រិយមិត្តរួចមកហើយ ដូចជាទូរសព្ទប៉ះពាល់ខួរក្បាលជាដើម។ កម្រិតហ្រ្វេកង់រលកវិទ្យុរបស់ទូរសព្ទដៃ ដែលបានមកពីអង់តែន បានធ្វើឲ្យមានផលប៉ះពាល់យ៉ាងខ្លាំងចំពោះសុខភាពមនុស្ស។

វិទ្យាស្ថានជំងឺមហារីករបស់អាមេរិក បាននិយាយថា មានផលប៉ះពាល់ជាច្រើននៅពេលដែលយើងចំណាយពេលច្រើនក្នុងការនិយាយទូរសព្ទ។ វិទ្យាស្ថាននេះ បានបន្ថែមទៀតថា ការនៅជិតនឹងអង់តែនទូរសព្ទពេក នឹងធ្វើឲ្យយើងអស់កម្លាំងល្ហិតល្ហៃ។

ប្រសិនបើនៅកាន់តែឆ្ងាយពីអង់តែនដ៏ខ្ពស់ៗទាំងនោះ នោះវានឹងកាន់តែល្អសម្រាប់ខ្លួនយើង ព្រោះតំបន់ដែលមានអង់តែន គឺជាតំបន់ដែលរលកវិទ្យុនៃទូរសព្ទដៃ ធ្វើចរាចរយ៉ាងមមាញឹក។

អង្គការក្រុមអ្នកធ្វើការដើម្បីបរិស្ថាន (EWG) បានផ្ដល់នូវវិធីសាស្រ្ដសុវត្ថិភាពមួយចំនួនចំពោះអ្នកប្រើប្រាស់ទូរសព្ទដៃទាំងអស់ដូចតទៅ ៖

ប្រើកាស ឬ បើកស្ពីកឃើ នៅពេលនិយាយទូរសព្ទ

ស្ដាប់ឲ្យបានច្រើនជាងនិយាយ ព្រោះទូរសព្ទនឹងកើននូវកម្រិតជាតិវិទ្យុសកម្មកាន់តែច្រើននៅពេលយើងនិយាយ ដូច្នេះត្រូវស្ដាប់ឲ្យបានច្រើនជាងនិយាយដើម្បីកាត់បន្ថយផលប៉ះពាល់។

ប្រសិនបើអាច ផ្ញើរសារជាអក្សរ ប្រសើរជាងការនិយាយឆ្លើយឆ្លងគ្នា

ប្រសិនបើទូរសព្ទរបស់លោកអ្នកមានសេវាខ្សោយ សូមកុំនិយាយឲ្យសោះ ព្រោះនៅពេលសេវាខ្សោយ ហ្រ្វេកង់វិទ្យុរបស់ទូរសព្ទនឹងធ្វើការកាន់តែខ្លាំងដើម្បីចាប់យកនូវសេវា។
ប្រការដែលចាំបាច់មួយទៀត គឺមិនគូរឲ្យកុមារប្រើទូរសព្ទច្រើនពេកទេ ព្រោះខួរក្បាលរបស់កុមារងាយនឹងប៉ះពាល់ជាតិវិទ្យុសកម្មរបស់ទូរសព្ទ ជាងមនុស្សពេញវ័យ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕