វីធី​សាស្រ្ដ​ ៦យ៉ាង ​ការ​ពារ​កុំ​ឲ្យ​ងងុយ​គេង​ពេល​ថ្ងៃ​!

ងងុយគេងពេលម៉ោងធ្វើការ

ការមានអារម្មណ៍ងងុយគេងពេលថ្ងៃ គឺជាបញ្ហាដែលមនុស្សជាច្រើនបានជួយប្រទះ ជាពិសេសគឺសិស្សសាលា និងអ្នកធ្វើការ។ អារម្មណ៍ងងុយគេងនេះ ធ្វើឲ្យយើងមិនអាចផ្ដោតអារម្មណ៍រៀន ឬធ្វើការបានល្អនោះទេ ដែលមានពេលខ្លះគេងលក់នៅនឹងតុក៏មាននោះដែរ។ ការងងុយគេងនាពេលថ្ងៃ ឬការអស់កម្លាំងល្ហិតល្ហៃនេះ គឺបណ្ដាលមកពីកត្តាមួយចំនួនដូចជា ការគេងមិនទៀងម៉ោង មានសុខភាពមិនល្អ ញ៉ាំអាហារមិនទៀងពេល និងស្រ្ដេសជាដើម។

តើធ្វើដូចម្ដេចដើម្បីជៀសវាងការងងុយគេងពេលថ្ងៃនេះបាន?

ខាងក្រោមនេះ គឺជាវិធីសាស្រ្ដ៦យ៉ាង ដែលអាចជួយលោកអ្នកបាន៖

១- គេងពេលយប់ឲ្យបានគ្រប់គ្រាន់ ៖ ការគេងលក់ស្រួលដោយគ្មានការរំខាននាពេលយប់ ឲ្យបានពី៧ទៅ៩ម៉ោង ក្នុងមួយយប់ គឺពិតជាល្អប្រពៃណាស់។ អ្នកត្រូវចងចាំនូវពាក្យមួយឃ្លាថា " ឆាប់ចូលគេង និងឆាប់ភ្ញាក់ពីដំណេក" ។ ពិតណាស់ការគេងច្រើនពេក ក៏នឹងអាចធ្វើឲ្យប៉ះពាល់ដល់ការងារ ឬការសិក្សាបន្ថែមនៅផ្ទះរបស់អ្នកផងដែរ ប៉ុន្ដែបើអ្នកអាចធ្វើវាបាន នោះគ្មានផ្លូវដែលអ្នកត្រូវអង្គុយងោកនៅក្នុងថ្នាក់រៀន ឬនៅការិយាល័យនោះទេ។

២- ឈប់គេងលេងពេលថ្ងៃត្រង់ ៖ ការគេងពេលថ្ងៃត្រង់ ក៏អាចធ្វើឲ្យប៉ះពាល់ដល់ការគេងពេលយប់ផងដែរ។ ប្រសិនបើអ្នកចង់គេងឲ្យបានលក់ស្រួលនៅពេលយប់ នោះអ្នកគួរតែជៀសវាងការគេងនៅពេលថ្ងៃត្រង់។

៣- ជៀសវាងញ៉ាំអាហារថ្ងៃត្រង់ច្រើនជ្រុល ៖ ការញ៉ាំអាហារថ្ងៃត្រង់ឆ្អែតជ្រុល អាចបង្កើននូវចលនាឈាមរត់ទៅកាន់ក្រពះ ហើយបន្ទាបនូវចលនាឈាមដែលផ្គត់ផ្គង់នៅខួរក្បាល ដែលអាចធ្វើឲ្យអ្នកអស់កម្លាំង និងងងុយគេង ដូច្នេះអ្នកគួរតែកុំញ៉ាំច្រើនពេកអី។

មួយវិញទៀត ចំពោះអ្នកដែលអង្គុយរយៈពេលយូរ គួរតែញ៉ាំអាហារពេលល្ងាចឲ្យបាន ២ទៅបីម៉ោង មុននឹងចូលគេង ព្រោះវានឹងផ្ដល់ឲ្យរាងកាយរបស់អ្នករំលាយអាហារបានល្អ ហើយនឹងធ្វើឲ្យអ្នកគេងលក់ស្រួល។

៤- ធ្វើលំហាត់ប្រាណ ៖ ដូចដែលលោកអ្នកបានដឹងហើយថា ការហាត់ប្រាណពិតជាសំខាន់ណាស់ចំពោះរាងកាយរបស់យើងម្នាក់ៗ។ ចូរចាប់ផ្ដើមថ្ងៃថ្មីរបស់អ្នក ដោយស្ដាប់នូវតន្រ្ដីពិរោះៗ ហើយធ្វើការរត់ហាត់ប្រាណជុំវិញផ្ទះរបស់អ្នក។ ស្ដាប់ចម្រៀងបណ្ដើរ រត់តិចៗបណ្ដើរ នោះអ្នកនឹងទទួលបាននូវអារម្មណ៍ល្អពេញមួយថ្ងៃជាក់ជាមិនខាន។

៥- រៀបចំកន្លែងធ្វើការរបស់អ្នកឲ្យបានស្អាត ៖ ការធ្វើការនៅកន្លែងដែលគួរឲ្យធុញទ្រាន់ គ្មានសណ្ដាប់ធ្នាក់ ក៏នឹងមិនអាចជម្រុញឲ្យអ្នកមានទឹកចិត្តធ្វើការពេញមួយថ្ងៃដែរ ដូច្នេះអ្នកគួររៀបចំកន្លែងធ្វើការរបស់អ្នកឲ្យមានរបៀបរៀបរយ ដែលធ្វើឲ្យអ្នកមានអារម្មណ៍ជ្រះថ្លា មិនស្ពឹកស្រពន់។

៦- លុបមុខ និងទំពារស្ករកៅស៊ូ ៖ ប្រសិនបើអ្នកទំនេរពីការងារ ឬដល់ម៉ោងសម្រាកពីសិក្សា សូមធ្វើការលុបលាងមុខរបស់អ្នកចេញ ជាមួយនឹងទឹកត្រជាក់ៗ។ ការធ្វើបែបនេះ នឹងធ្វើឲ្យរាងកាយរបស់អ្នកដែលល្ហិតល្ហៃ បើកភ្នែកលែងចង់រួចនោះ ត្រឡប់មកជាសកម្មឡើងវិញ។ បន្ថែមលើនេះ អ្នកអាចទំពារស្ករកៅស៊ូ ព្រោះវាអាចជួយឲ្យខួរក្បាលយើងសកម្ម និងគិតបានលឿន។

សរុបមកវិញ កត្តាសំខាន់បំផុតដែលធ្វើឲ្យអ្នកមានអារម្មណ៍ងងុយគេងនាពេលថ្ងៃ គឺដោយសារតែអ្នកគេងពេលយប់មិនគ្រប់គ្រាន់។ អនុវត្តតាមវិធីខាងលើទាំង៦ នោះអ្នកនឹងអាចដោះស្រាយបញ្ហានេះបានហើយ។ ប្រសិនបើអ្នកមានវិធីអ្វីផ្សេងទៀត សូមចែកជូនជាបទពិសោធន៍ដល់អ្នកដទៃតាមរយៈ ប្រអប់ផ្ដល់យោបល់ខាងក្រោម!

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕