ម្ដាយ​​ មិន​គួរ​ឆាប់​បំបែក​កូន​ទៅ​បន្ទប់​ផ្សេង​ពេក​ទេ​

ម្ដាយគេងជាមួយកូន

យោងតាមរបាយការណ៍ពីការស្រាវជ្រាវថ្មីបំផុតមួយ បានឲ្យដឹងថា ទារកទាំងឡាយគួរគេងជាមួយម្ដាយរបស់ពួកគេរហូតដល់អាយុយ៉ាងតិច៣ឆ្នាំ។

ក្រុមអ្នកស្រាវជ្រាវបានបញ្ជាក់ថា ការគេងជាមួយម្ដាយនៅវ័យដំបូងរបស់កូន គឺល្អជាងការបណ្ដោយឲ្យពួកគេគេងផ្សេងពីម្ដាយ។ បេះដូងរបស់ទារកនោះ នឹងស្ថិតក្នុងភាពស្រ្ដេសប្រសិនបើគេងតែម្នាក់ឯង។

ការគេងម្នាក់ឯង បានធ្វើឲ្យទារក និងម្ដាយមិនសូវមានភាពស្និទ្ធស្នាលនឹងគ្នា ហើយក៏បានបំផ្លាញខួរក្បាលរបស់ទារក ដែលអាចនាំទៅដល់ការមានអត្តចរិតមិនប្រសើរពេលពួកគេចម្រើនវ័យធំដឹងក្ដី។

លោកវេជ្ជបណ្ឌិត Nils Bergman ដែលមកពីសាកលវិទ្យាល័យ Cape Town នៃប្រទេសអាហ្វ្រិកខាងត្បូង បាននិយាយថា ការអភិវឌ្ឍរបស់ទារកដែលមានសុខភាពល្អ គឺគួរតែឲ្យពួកគេនៅជិតទ្រូងម្ដាយក្នុងរយៈពេលពីរបីសប្ដាហ៍ដំបូង។ បន្ទាប់ពីនេះ ពួកគេគួរតែត្រូវបានដាក់ឲ្យគេងនៅលើគ្រែជាមួយម្ដាយ រហូតដល់មានអាយុ ៣ឆ្នាំ ឬ ៤ឆ្នាំ។

ទោះបីជាយ៉ាងនេះក្ដី ការសិក្សានេះ ការគេងគ្រែជាមួយម្ដាយយូរពេកក៏អាចជះឥទ្ធិពលមិនល្អដែរ ពោលគឺអាចបង្កឲ្យទារកស្លាប់បាន។ ការសិក្សានៅអង់គ្លេសកាលពីពេលថ្មីៗនេះ បានបង្ហាញថា ស្ទើតែជិតពីរភាគបីនៃការស្លាប់របស់ទារក គឺកើតឡើងដោយសារគេងគ្រែជាមួយម្ដាយ។

យ៉ាងណាមិញ លោកវេជ្ជបណ្ឌិតខាងលើ បានជំទាស់ចំពោះការសិក្សារបស់អង់គ្លេសនោះ ដោយនិយាយថា ការស្លាប់របស់ទារក គឺមិនមែនដោយសារតែម្ដាយដែលគេងជាមួយនោះទេ តែដោយសារកត្តាផ្សេងទៀត ដូចជា ផ្សែងពុល ផ្សែងបារី គ្រឿងស្រវឹង ខ្នើយធំពេក ឬគ្រឿងលេងដ៏គ្រោះថ្នាក់ផ្សេងៗ។

សរុបមកវិញ ការសិក្សារបស់ក្រុមអ្នកស្រាវជ្រាវអាហ្រ្វិកខាងត្បូងចុងក្រោយនេះ គឺចង់បញ្ជាក់ថា ទារកមិនគួរត្រូវបានបំបែកពីគ្រែម្ដាយឆាប់ពេកទេ ដោយអាចបណ្ដាលឲ្យពួកគេ ខ្វះមនោសញ្ចេតនាជាមួយម្ដាយ មានអារម្មណ៍ស្រេ្ដស និងមានអត្តចរិតមិនល្អពេលធំឡើង។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕