ស្នាម​ញញឹម​មិន​អាច​ទាក់​ទាញបេះ​ដូង​​នារីបាន​ទេ​

បុរសប្រើស្នាមញញឹមទាក់ចិត្តស្រ្ដី

ប្រសិនបើអ្នកគិតថាស្នាមញញឹមដ៏មានមន្តស្នេហ៍របស់អ្នកអាចឆក់យកបេះដូងនារីបាននោះ គឺអ្នកកំពុងតែគិតខុសហើយ។ ការស្រាវជ្រាវថ្មីមួយបានរកឃើញថា បុរសដែលពូកែញញឹម មិនមានភាពទាក់ទាញចំណាប់អារម្មណ៍ពីនារី ច្រើនដូចបុរសដែលស្ងៀមស្ងាត់ ក្រអឺតក្រទម និងម៉ឺងម៉ាត់នោះទេ។

ផ្ទុយពីចិត្តនារី ការសិក្សាដដែលនេះបានរកឃើញទៀតថា បុរសភាគច្រើនចង់បាននារីដែលមើលទៅសប្បាយៗ ញញឹមញញែមបែបសិចស៊ី ហើយមិនចូលចិត្តនារីដែលម៉ឺងម៉ាត់ និងមានមោទនភាពលើខ្លួនឯងពេកនោះទេ។

អ្នកស្រី Jessica Tracy មកពីសាកលវិទ្យាល័យប្រ៊ីតធីស កូឡុំប៊ី ដែលជាអ្នកដឹកនាំការស្រាវជ្រាវនេះបាននិយាយថា

ខណៈពេលដែលការបង្ហាញទឹកមុខរីករាយរបស់បុរស ត្រូវបានចាត់ទុកថាជាការទាក់ទាញនោះ លទ្ធផលមិនបានបង្ហាញបែបនេះឡើយ។

ការស្រាវជ្រាវនេះ បានបង្ហាញប្រាប់ថាបុរស និងស្រ្ដីមានការឆ្លើយតបផ្នែកអារម្មណ៍ខុសគ្នាចំពោះការញញឹមរបស់ភេទផ្ទុយគ្នា។

ដើម្បីទទួលបានលទ្ធផលនេះ ក្រុមអ្នកស្រាវជ្រាវបានធ្វើការសាកសួរមនុស្សពេញវ័យទាំងប្រុស ទាំងស្រីចំនួន ១០៤១នាក់ ឲ្យចាត់ចំណាត់ថ្នាក់ការចូលចិត្តទៅលើរូបថតរាប់រាយសន្លឹកនៃមនុស្សភេទផ្ទុយពីខ្លួន (បុរសមើលរូបថតស្រ្ដី, ស្រ្ដីមើលរូបថតបុរស)។ ក្រោយពីមើលរូបថតទាំងអស់នោះហើយ អ្នកចូលរួមត្រូវផ្ដល់ពិន្ទុពី១ ដល់ ៩ (ពីចូលចិត្តតិច រហូតដល់ខ្លាំង)ចំពោះរូបថតទាំងអស់នោះ។

រូបថតដែលដាក់ឲ្យនោះ គឺជារូបថតរបស់មនុស្សដែលបង្ហាញអារម្មណ៍ខុសៗគ្នា ដូចជារូបមនុស្សញញឹម ទឹកមុខម៉ឺងម៉ាត់ ឬអៀនប្រៀនជាដើម។

ជាលទ្ធផលបុរសភាគច្រើនបានផ្ដល់ពិន្ទុដល់រូបថតនារីញញឹមបែបរីករាយលើសពី៥ ខណៈដែលនារីដែលម៉ឺងម៉ាត់បានតិចបំផុត។ ចំណែកឯនារីវិញបានផ្តល់ពិន្ទុខ្ពស់ចំពោះរូបថតបុរសដែលម៉ឺងម៉ាត់ ខណៈដែលបុរសដែលញញឹមស្រស់ស្រាយបានតិចទៅវិញ។

ការសិក្សាស្រាវជ្រាវនេះក៏មានការឯកភាពពីអ្នកជំនាញច្រើនណាស់ដែរ ដូច្នេះអាចទទួលយកបានចំពោះលទ្ធផលនៃការស្រាវជ្រាវនេះ។ ដូច្នេះបុរសដែលចង់ឲ្យនារីធ្លាក់ក្នុងអន្លង់ស្នេហ៍របស់ខ្លួន មិនមែនធ្វើចរិតបែបញញឹមញញែមតែមួយមុខនោះទេ ចាំបាច់ត្រូវបង្ហាញប្រាប់នារីថាយើងជាបុរសមាំមួន ម៉ឺងម៉ាត់ មិនទន់ខ្សោយ។ ចំពោះនារីវិញក៏ត្រូវចេះបញ្ចេញចរិតជាស្រ្ដីដែលមានភាពទន់ភ្លន់ ស្រស់ស្រាយ រួសរាយរាក់ទាក់ ញញឹមញញែម ទោះបីជាយើងជាមនុស្សម៉ឺងម៉ាត់យ៉ាងណាក៏ដោយ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕