កាត់​បន្ថយអំបិល​ ល្អ​ចំពោះ​សុខភាព

អំបិល

កាលពីពេលថ្មីៗនេះរដ្ឋាភិបាលអាមេរិក បានផ្សព្វផ្សាយនូវវិធីសាស្រ្ដកំណត់របបអាហារថ្មី ដោយជម្រុញឲ្យប្រជាជនអាមេរិកទាំងអស់កាត់បន្ថយការទទួលទានអំបិលប្រចាំថ្ងៃចំនួនមួយភាគបី ហើយចំពោះមនុស្សចាស់អាយុលើស៥០ឆ្នាំ ត្រូវបន្ថយឲ្យបានច្រើនជាងនេះទៀត។

លោករដ្ឋមន្រ្ដីក្រសួងកសិកម្មរបស់អាមេរិក Tom Vilsack បាននិយាយនូវក្នុងសេចក្ដីថ្លែងការណ៍ថាគោលការណ៍ណែនាំថ្មីនៃរបបអាហារដែលចេញនៅពេលនេះ គឺជាពេលដែលភាគច្រើននៃក្មេងជំទង់ និងមួយភាគបីនៃកុមារគឺមានការធាត់លើសទម្ងន់។

គោលការណ៍ណែនាំដែលតែងតែកែសម្រួលរៀងរាល់៥ឆ្នាំម្ដងនេះ បានបញ្ចុះបញ្ចូលឲ្យជនជាតិអាមេរិកាំងទាំងអស់បន្ថយនូវអាហារដែលសម្បូរជាតិកាឡូរីខ្ពស់ និងត្រូវហាត់ប្រាណ។

គោលការណ៍ថ្មីនេះក៏បានផ្ដល់យោបល់ឲ្យប្រជាជនទាំងអស់កាត់បន្ថយនូវការទទួលទានអំបិលប្រចាំថ្ងៃ ដោយមួយថ្ងៃមិនឲ្យលើស ២,៣០០មីលីក្រាម ឬមួយស្លាបព្រាកាហ្វេ ហើយសម្រាប់មនុស្សអាយុលើស ៥០ឆ្នាំវិញមួយថ្ងៃមិនឲ្យលើសពី ១,៥០០មីលីក្រាមនោះទេ។

មជ្ឈមណ្ឌលគ្រប់គ្រងជម្ងឺរបស់អាមេរិក បានធ្វើការប៉ាន់ស្មានថា ប្រជាជនអាមេរិកពេលបច្ចុប្បន្ននេះទទួលទានអំបិលប្រហែល ៣,៤៦៦មីលីក្រាម ឬប្រហែលមួយស្លាបព្រាកាហ្វេកន្លះ ដែលចំនួនអំបិលច្រើននេះអាចធ្វើឲ្យកម្រិតឈាមឡើងខ្ពស់ និងជម្ងឺទាក់ទងនឹងបេះដូងជាច្រើនទៀត។

ក្រៅពីតម្រូវឲ្យកាត់បន្ថយអំបិល គោលការណ៍ថ្មីនេះក៏បានឲ្យទទួលអាហារក្នុងកម្រិតមួយល្មម ហើយត្រូវមានផ្លែឈើ និងបន្លែនៅក្នុងអាហារនោះផង ហើយជាពិសេសគឺទទួលទានទឹកឲ្យបានច្រើន និងកាត់បន្ថយភេសជ្ជៈនានា។

ចំណែកឯស្រ្ដីទីមួយរបស់អាមេរិក លោកជំទាវមីស៊ែល អូបាម៉ា ក៏បានចូលរួមផ្សព្វផ្សាយយុទ្ធនាការហាត់ប្រាណដើម្បីកាត់បន្ថយការធាត់លើសទម្ងន់ផងដែរ ហើយលោកជំទាវក៏បានសំណូមពរឲ្យប្រជាជនអាមេរិកទាំងអស់ជាពិសេសក្មេងៗ ងាកមកបញ្ចេញញើសតាមរយៈការហាត់ប្រាណ ហើយនឹងទទួលទានអាហារឲ្យបានត្រឹមត្រូវ។ ហើយកាលពីខែមុននេះ លោកជំទាវក៏បានចុះហត្ថលេខាជាមួយក្រុមហ៊ុមផលិតអាហារដ៏ធំមួយ ដោយសហការគ្នាផលិតចំណីរអាហារដែលមានជាតិស្ករ និងអំបិលតិចផងដែរ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕