បុរសទំពែកងាយកើតមហារីក

បុរសទំពែក

ការសិក្សាស្រាវជ្រាវរបស់អ្នកវិទ្យាសាស្រ្តជនជាតិបារាំងមួយក្រុម បានបង្ហាញថា បុរសដែលចាប់ផ្ដើមទំពែកពីអាយុ ២០ឆ្នាំទៅ អាចនឹងប្រឈមមុខខ្លាំងទៅនឹងគ្រោះថ្នាក់ជំងឺមហារីកក្រពេញប្រូស្តាតនៅពេលពួកគេចាស់។
ក្រុមអ្នកស្រាវជ្រាវដដែលបានធ្វើការប្រៀបធៀប បុរស ៣៨៨នាក់ដែលកំពុងទទួលការព្យាបាលមហារីកក្រពេញប្រូស្តាត ជាមួយនឹងបុរសដែលមានសុខភាពល្អចំនួន ២៨១នាក់ ហើយបានរកឃើញថា បុរសដែលកើតមហារីកនេះ មានចំនូនច្រើនជាងបុរសដែលមានសុខភាពល្អពីរដង ដែលបានឆ្លើយថាពួកគេបានទំពែកចាប់តាំងពីពួកគេមានអាយុ ២០ឆ្នាំមកម្លេះ។ ប៉ុន្តែប្រសិនបើពួកគេចាប់ផ្ដើមទំពែក ចាប់ពីអាយុ ៣០ ឬ ៤០ឆ្នាំ នោះហានិភ័យ នៃការកើតមហារីកក្រពេញប្រូស្តាត មានតិចដូចបុរសដែលមានសុខភាពល្អដែរ។
លោកវេជ្ជបណ្ឌិតដែលដឹកនាំការស្រាវជ្រាវនេះ បាននិយាយថា មិនមានការលំបាកក្នុងការកំណត់ថាមនុស្សប្រុសណាខ្លះ ដែលប្រឈមនឹងហានិភ័យខ្ពស់ក្នុងការកើតមហារីកក្រពេញប្រូស្តាតនោះទេ ។ ការទំពែកនៅអាយុ ២០ឆ្នាំអាចជាកត្តាងាយស្រួលចំណាំជាងគេ។
ការសិក្សាស្រាវជ្រាវមុនៗ ក៏បានរកឃើញនូវទំនាក់ទំនងរវាង ការទំពែក ជាមួយនឹងអ័រម៉ូន Androgens ដែលជាអ័រម៉ូនម្យ៉ាងដែលដើរតួនាទីសំខាន់ក្នុងការអភិវឌ្ឍឲ្យមានជំងឺមហារីកក្រពេញប្រូស្តាត។
ជំងឺមហារីកក្រពេញប្រូស្តាត ជាប្រភេទនៃមហារីកលំដាប់ទី២ ដែលកើតច្រើនជាងគេចំពោះបុរស បន្ទាប់ពីជំងឺមហារីកថ្លើម ហើយវាបានសម្លាប់ជីវិតមនុស្សប្រុសប្រមាណ ២៥៥.០០០នាក់ក្នុងមួយឆ្នាំៗ។
ការស្រាវជ្រាវបន្ថែម នឹងមានជាបន្តទៀត ដោយអាចធ្វើឡើងចំពោះក្រុមបុរសច្រើនជាងនេះទៀត ដើម្បីឲ្យដឹងកាន់តែច្បាស់ និងត្រឹមត្រូវ នៃទំនាក់ទំនងរវាង អ័រម៉ូន Androgens, ការទំពែក និងជំងឺមហារីកក្រពេញប្រូស្តាត។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕