ទារក​មាន​សមត្ថភាព​ចង​ចាំ​ចង្វាក់​ភ្លេង

ទារក និងម្ដាយ

យោងតាមការស្រាវជ្រាវថ្មីៗនេះបានឲ្យដឹងថា ទារកមានសមត្ថភាពចងចាំចង្វាក់ភ្លេងដែលពួកគេបានលឺកាលខ្លួននៅក្នុងស្បូនរបស់ម្ដាយ។

អ្នកវិទ្យាសាស្ត្របានចាក់ភ្លេងឲ្យអ្នកម្ដាយទារកស្ដាប់ចំនួនបីសប្ដាហ៍មុនពេលផ្ដល់កំណើត និងបានធ្វើតេស្តទារកនោះមួយខែក្រោយពីពេលដែលគេបានកើត។ ចង្វាក់បេះដូងរបស់ទារកបានថយចុះតាមអត្រាមួយដ៏អស្ចារ្យនៅពេលដែលគេបានលឺចង្វាក់ភ្លេងនៅពេលក្នុងពោះម្ដាយ នេះបើប្រៀបធៀបនឹងភ្លេងដែលគេពុំដែលបានលឺពីមុន។

ការរកឃើញនេះបានបន្ថែមការយល់ឃើញរបស់អ្នកវិទ្យាសាស្ត្រ... នូវផលប៉ះពាល់របស់ភ្លេងដែលគេបានលឺកាលនៅក្នុងពោះដោយរួមទាំងពីរបៀបដែលទារករៀននិយាយទៀតផង។ អ្នកចិត្តជីវវិទ្យា ការូលីន ក្រេន័រឌីហ្វឺរ (Carolyn Granier-Deffere) មកពីសាកលវិទ្យាល័យប៉ារីសដេកាត បានស្នើសុំឲ្យស្ត្រីដែលមានគភ៌ជិតគ្រប់ខែចំនួនហាសិបនាក់ស្ដាប់ចង្វាក់ព្យ៉ាណូពីរដងក្នុងមួយថ្ងៃ។ នៅពេលដែលក្មេងទាំងហាសិបនាក់នោះមានអាយុមួយខែ គេបានចាក់ភ្លេងទាំងនោះឲ្យក្មេងស្ដាប់។ ជាមធ្យមអត្រាចង្វាក់បេះដូងរបស់ទារកដែលកំពុងដេកបានពន្យឺតក្នុងរយៈពេលខ្លីចំនួនដប់ពីរដងក្នុងមួយនាទីជាមួយនឹងភ្លេងដែលគេធ្លាប់ស្ដាប់ បើប្រៀបធៀបនឹងភ្លេងដែលគេពុំធ្លាប់ស្ដាប់គឺចំនួនប្រាំឬប្រាំមួយដង។

លទ្ធផលនេះបង្ហាញថា ទារកទើបកើតបានយកចិត្តទុកដាក់លើភ្លេងឬចម្រៀងរបស់ម្ដាយខ្លួនជាង នេះបើតាមកញ្ញា ការូលីន ក្រេន័រឌីហ្វឺរដែលបានចុះក្នុងព្រឹត្តិបត្រកន្លងមក។

ការស្ដាប់របស់មនុស្សបានអភិវឌ្ឍក្នុងកំឡុងរយៈពេលបីខែចុងក្រោយនៅការមានគភ៌។ ក្នុងរយៈពេលប្រាំសប្ដាហ៍មុនពេលកើត រន្ធត្រចៀកជាធម្មតាមានលក្ខណៈពេញវ័យគ្រប់គ្រាន់។ ការរកឃើញទាំងនេះបានបន្ថែមភស្តុតាងដែលយល់ថា ការស្ដាប់លឺមុនពេលឆ្លងទន្លេអាចជួយឲ្យទារកដឹងពីសូរសំឡេងនៃការនិយាយ។

កញ្ញាបានបន្ថែមថា ការរកឃើញនេះពុំមានន័យថាស្ត្រីកំពុងមានគភ៌គួរតែច្រៀងឬស្ដាប់ភ្លេងខណៈពេលដែលកូនរបស់ខ្លួនកំពុងមានការវិវឌ្ឍន៍នៅក្នុងពោះនោះឡើយ។ នៅពេលដែលទារកក្នុងពោះនោះអាចស្ដាប់លឺបានគ្រប់គ្រាន់ហើយ ប្រហែលជាប្រាំសប្ដាហ៍មុនកើត វានឹងលឺគ្រប់សំឡេងទាំងអស់មាននៅក្នុងបរិស្ថានម្ដាយរបស់វា។ ពុំមានតម្រូវការផ្នែកជីវសាស្ត្របន្ថែមសម្រាប់ការស្ដាប់នោះឡើយ ប៉ុន្តែបើស្ដាប់ច្រើនគឺកាន់តែល្អជាពិសេសក្នុងកំឡុងពេលទារកកំពុងតែវិវឌ្ឍ។ ប្រសិនបើអ្នកម្ដាយទាំងឡាយចង់ឲ្យកូនចូលចិត្តស្ដាប់ចម្រៀង ពួកគេអាចចាប់ផ្ដើមនៅពេលដែលកូននោះកើតហើយ។ លើសពីនេះទៀតគួរចងចាំថា ឧបករណ៍ដែលម្ដាយទាំងឡាយដាក់ដោយផ្ទាល់លើស្បែករបស់ខ្លួនដើម្បីស្ដាប់តន្ត្រីអាចមានគ្រោះថ្នាក់ ដោយកញ្ញាបានណែនាំថា សំឡេងអាចមានគ្រោះថ្នាក់ដល់ត្រចៀករបស់ទារកក្នុងផ្ទៃប្រសិនបើវាលឺពេក ស្ដាប់យូរពេកឬម្ដាយបង្ខំស្ដាប់ពេកក្នុងដំណាក់កាលដំបូងនៃការវិវឌ្ឍផ្នែកខាងក្នុងត្រចៀករបស់ក្មេង។

ចម្រៀងរបស់អ្នកម្ដាយគឺជាសូរសំឡេងពីធម្មជាតិដ៏វិសេសបំផុត។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕