ប្រេងអូលីវ
ជំងឺស្រ្ដូក ដែលជាជំងឺដ៏សាហាវមួយដែលបានសម្លាប់មនុស្សអស់ជាច្រើនលាននាក់នៅទូទាំងពិភពលោក។ ជំងឺនេះកើតឡើងនៅពេលដែលសរសៃឈាមក្រហមនៅក្នុងខួរក្បាល ឬសរសៃឈាមក្រហមដែលនាំឈាមទៅកាន់ខួរក្បាល ត្រូវបានទប់ស្កាត់ ដោយឈាមកក។ នៅពេលនោះ ខួរក្បាលនឹងឈប់ដំណើរការ ហើយអាចនាំទៅដល់ការបាត់បង់ស្មារតី ឬក៏ស្លាប់ភ្លាមៗក៏មាន។
ការស្រាវជ្រាវដែលរកឃើញពីអត្ថប្រយោជន៍ប្រេងអូលីវនេះ គឺធ្វើឡើងចំពោះមនុស្សជាង ៧០០០នាក់ ចាប់ពីអាយុ ៦៥ឆ្នាំឡើងទៅ ហើយបានរកឃើញថា
អ្នកដែលប្រើប្រេងអូលីវដើម្បីចំអិនអាហារ មានអត្រាកើតជំងឺដ៏សាហាវនេះ តិចជាងអ្នកដែលមិនធ្លាប់ប្រើ។មិនត្រឹមតែអាចការពារជំងឺស្រ្ដូកបានប៉ុណ្ណោះទេ អ្នកស្រាវជ្រាវដែលមកពីវិទ្យាស្ថានសុខាភិបាលជាតិ និងមជ្ឈមណ្ឌលស្រាវជ្រាវឱសថបុកដូ របស់បារាំង ក៏បានអះអាងដែរថា មនុស្សចាស់អាចរស់នៅបានយូរ ប្រសិនបើពួកគាត់ទទួលទានអាហារដែលប្រើប្រេងអូលីវច្រើន។
លោក Cecilia Samieri មកពីសាកលវិទ្យាល័យបុកដូ ប្រទេសបារាំង ដែលជាអ្នកដឹកនាំការស្រាវជ្រាវនេះ បាននិយាយថា ជំងឺស្រ្ដូក គឺជាជំងឺដែលមនុស្សចាស់ត្រូវប្រឈមមុខ ហើយប្រេងអូលីវ នឹងក្លាយជាអ្នកការពារជំងឺនេះដ៏ល្អ និងមិនមានតម្លៃថ្លៃ។
យោងតាមរបាយការណ៍នៃការស្រាវជ្រាវនេះ បានបង្ហាញថា អ្នកដែលប្រើប្រេងអូលីវនៅក្នុងចំណីរអាហាររបស់ពួកគេ អាចកាត់បន្ថយគ្រោះថ្នាក់នៃការកើតជំងឺស្រ្ដូកបានចំនួន ៤១ភាគរយ បើប្រៀបធៀបជាមួយអ្នកដែលមិនប្រើ។
លោកវេជ្ជបណ្ឌិត Sharlin Ahmed មកពីសមាគមជំងឺស្រ្ដូកប្រទេសអង់គ្លេស ក៏បានថ្លែងដែរថា ប្រេងអូលីវត្រូវបានគេទទួលស្គាល់ពីគុណប្រយោជន៍ចំពោះសុខភាពជាយូរណាស់មកហើយ។ វាអាចទប់ស្កាត់ជាតិកូឡេស្ដេរ៉ូលខ្ពស់ ទប់ស្កាត់សម្ពាធឈាមឡើងខ្ពស់ និងជំងឺបេះដូងទៀតផង។
ទោះបីជាប្រេងអូលីវអាចជួយការពារជំងឺស្រ្ដូក ប៉ុន្ដែមិនមែនន័យថា ប្រេងអូលីវមួយមុខអាចការពារបាននោះទេ សំខាន់យើងត្រូវចេះថែរក្សាសុខភាពរបស់យើងចាប់ពីវ័យក្មេងនេះទៅ ដូចជាញ៉ាំអាហារត្រឹមត្រូវ ហាត់ប្រាណឲ្យបានទៀតទាត់ជាដើម។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment