ផើងរុក្ខជាតិ
ជាលទ្ធផលក្រុមអ្នកស្រាវជ្រាវមួយក្រុមបានរកឃើញថា ការដាក់តាំងផើងផ្កា ឬផើងរុក្ខជាតិនៅលើតុការិយាល័យរបស់អ្នក អាចជួយឲ្យអ្នកកាត់បន្ថយនូវអារម្មណ៍តានតឹងផ្លូវចិត្ត ស្ងួតបំពង់ក ឈឺក្បាល ក្អក និងស្បែកស្ងួតបានផងដែរ។
ការស្រាវជ្រាវដ៏ថ្មីស្រឡាងនេះ ត្រូវបានដឹកនាំដោយលោកវេជ្ជបណ្ឌិត Tina Bringslimark អ្នកជំនាញខាងចិត្តវិជ្ជា រួមជាមួយនឹងសហសេវិករបស់គាត់ដែលមកពីសាកលវិទ្យាល័យវិទ្យាសាស្រ្ដជីវិត Norwegian និងសាកលវិទ្យាល័យ Uppsala នៃប្រទេសស៊ុយអែត។
ការសិក្សាដែលធ្វើឡើងដល់ទៅ
ពីរដងដើម្បីឲ្យកាន់តែច្បាស់នេះ បានធ្វើការត្រួតពិនិត្យទៅលើអត្រាសុំច្បាប់ឈប់សម្រាក និងចំនួនផើងដាក់រុក្ខជាតិនៅលើតុបុគ្គលិកម្នាក់ៗ។ ជាលទ្ធផលបានបង្ហាញថា អ្នកដែលមានតាំងផើងរុក្ខជាតិនៅលើតុ មានអត្រាអវត្តមានតិចតួចបំផុត។ការអះអាងបែបនេះ គឺមិនមែនមើលតែលើការរកឃើញតែមួយមុខនេះទេ តែបូករួមទាំងជំនាញខាងចិត្តសាស្រ្ដរបស់អ្នកស្រាវជ្រាវទាំងនេះផងដែរ។ ការពន្យល់មួយរបស់អ្នកស្រាវជ្រាវម្នាក់បានឲ្យដឹងថា រុក្ខជាតិ និងសារធាតុមីក្រុបនៅក្នុងដីក្នុងផើង គឺជាសារធាតុមួយដ៏ល្អ ព្រោះមានសារធាតុរ៉ែដែលល្អចំពោះសុខភាព។
ហើយបើគិតពីចិត្តវិទ្យាវិញ មនុស្សបានជឿជាក់ថារុក្ខជាតិគឺជាអ្វីដែលធ្វើឲ្យអារម្មណ៍របស់យើងស្រស់ថ្លា និងកាន់តែមានសុទិដ្ឋិនិយម នេះបើតាមការឲ្យដឹងពីលោកវេជ្ជបណ្ឌិត Bringslimark ដដែល។ កាន់តែពិសេសជាងនេះទៀត ផើងដាក់រុក្ខជាតិ ក៏ផ្ដល់ប្រយោជន៍ចំពោះបន្ទប់ការិយាល័យណាដែលគ្មានបង្អួចបានផងដែរ។
ចំណែកឯនៅអាមេរិកវិញ ក៏មានការស្រាវជ្រាវរកឃើញដែរថា បុគ្គលិកដែលមានផើងផ្កានៅលើតុ មានផលិតភាពការងារខ្ពស់ជាងបុគ្គលិកដែលមិនមានផើងនៅលើតុ ដល់ទៅ១២%។ ពួកគេមានអារម្មណ៍ស្រ្ដេសតិច និងមានសម្ពាធឈាមទាប។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment