ផឹក​គ្រឿង​ស្រ​វឹង​លើ​ស​កំណត់​កើត​ជំងឺ​មហារីក​

ស្រ្ដីពីរនាក់កំពុងផឹកស្រាបៀ

មានមនុស្សជាច្រើនមិនបានដឹងទេថា ការផឹកគ្រឿងស្រវឹងលើសកំណត់អាចបណ្ដាលឲ្យពួកគេកើតជំងឺមហារីក។ ការស្រាវជ្រាវថ្មីៗនេះ បានបង្ហាញថា ការផឹកគ្រឿងស្រវឹងដែលមានជាតិអាល់កុលដូចជាស្រា និងស្រាបៀជាដើម លើសពីកន្លះលីត្រក្នុងមួយថ្ងៃ អាចបណ្ដាលឲ្យកើនឡើងគ្រោះថ្នាក់នៃជំងឺមហារីក។

ការស្រាវជ្រាវដ៏ធំនៅអឺរ៉ុបនេះ បានរកឃើញថា ១ក្នុងចំណោម១០នៃជំងឺមហារីកទាំងអស់ដែលកើតមានចំពោះបុរស និង១ក្នុង៣៣នៃជំងឺមហារីកទាំងអស់របស់ស្រ្ដី បណ្ដាលមកពីការផឹកគ្រឿងស្រវឹង។

ក្រុមអ្នកជំនាញខាងជំងឺមហារីកបាននិយាយថា មនុស្សគួរតែកាត់បន្ថយការផឹកជាតិអាល់កុល ឲ្យបានសមល្មម ដើម្បីកាត់បន្ថយហានីភ័យនៃជំងឺមហារីក។

ការស្រាវជ្រាវនេះ

បានត្រឡប់ទៅគណនាទិន្នន័យកាលពីឆ្នាំ ២០០៨ ហើយរកឃើញថា មានជំងឺមហារីកចំនួន១៣០០ករណីបណ្ដាលមកពីគ្រឿងស្រវឹង ក្នុងចំណោមជំងឺមហារីកទាំងអស់ចំនួន ៣០៤០០០ករណី។

ការសិក្សាស្រាវជ្រាវមុនៗ ក៏បានរកឃើញថា ការផឹកគ្រឿងស្រវឹងអាចបណ្ដាលឲ្យកើតជំងឺមហារីកជាច្រើនដូចជា មហារីកបំពង់អាហារ មហារីកថ្លើម មហារីកពោះវៀន និងមហារីកសុដន់ (ស្ដ្រី)។

មូលហេតុដែលបណ្ដាលឲ្យកើតជំងឺមហារីកគឺ នៅពេលដែលជាតិអាល់កុលចូលទៅក្នុងរាងកាយមនុស្ស វានឹងបង្កើតនូវជាតិគីមីម្យ៉ាង ដែលអាចបំផ្លាញ DNA ហើយវានឹងបង្កើនឱកាសក្នុងការអភិវឌ្ឍទៅជាជំងឺមហារីក។

ការស្រាវជ្រាវថ្មីបំផុតនេះ បានរកឃើញថា មនុស្សម្នាក់ដែលផឹកគ្រឿងស្រវឹងលើសពីចំនួនស្ដង់ដាពីរដង (ស្ដង់ដា=១២ក្រាមនៃជាតិអាល់កុល=១២៥មីលីលីត្រនៃស្រា=២៥០មីលីលីត្រនៃស្រាបៀ) ក្នុងមួយថ្ងៃសម្រាប់បុរស និងមួយដងសម្រាប់ស្រ្ដី គឺនឹងបណ្ដាលឲ្យប្រឈមនឹងការកើតជំងឺមហារីក។

ក្រុមអ្នកស្រាវជ្រាវក៏បានបញ្ជាក់ដែរថា ៤០ទៅ៩៨ភាគរយនៃជំងឺមហារីកដែលបណ្ដាលមកពីជាតិអាល់កុល គឺកើតឡើងចំពោះជនទាំងឡាយណាដែលផឹកលើកម្រិតកំណត់ខាងលើ ដល់កម្រិតអតិបរមា។

សូមបញ្ជាក់ថា ការស្រាវជ្រាវនេះគឺជាការស្រាវជ្រាវមួយដ៏ធំ ដែលធ្វើឡើងចំពោះមនុស្សស្រីប្រុសរហូតដល់ ៣៦៣៩៨៨នាក់ ចាប់ពីអាយុ ៣៥ឆ្នាំ ដល់៧០ឆ្នាំ នៅក្នុងប្រទេសអឺរ៉ុបចំនួន ៨ប្រទេស។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕