កុមារធាត់ជ្រុលអាចដោយសារការគេងតិច
យោងតាមរបាយការណ៍ពីការស្រាវជ្រាវមួយនៅប្រទេសញូវហ្សើលែនបានឲ្យដឹងថា កុមារដែលទទួលទានដំណេកតិចនៅពេលយប់ អាចនឹងប្រឈមនឹងហានីភ័យនៃការធាត់លើសទម្ងន់។
ការស្រាវជ្រាវដែលបានបោះពុម្ភផ្សាយនៅក្នុងគេហទំព័រ BMJនេះ បានធ្វើការស្រាវជ្រាវទៅលើកុមារចំនួន ២៤៤នាក់ ចន្លោះអាយុពី៣ ទៅ៧ឆ្នាំ។
ក្រុមអ្នកជំនាញមកពីចក្រភពអង់គ្លេសក៏បាននិយាយដែរថា ទំនាក់ទំនងរវាងការគេងតិច និងការប៉ះពាល់សុខភាព បានទទួលការចាប់អារម្មណ៍ជាច្រើនពីសំណាក់អ្នកស្រាវជ្រាវ។
កុមារទាំង២៤៤នាក់នោះ ត្រូវបានគេត្រួតពិនិត្យ
ទម្ងន់ កម្ពស់ និងភាពធាត់ ដែលជាលទ្ធផលទម្លាប់កុមារដែលគេងតិច មានហានីភ័យខ្ពស់ក្នុងការមានទម្ងន់ធាត់ជ្រុល។ទំនាក់ទំនងនៃភាពធាត់ និងការគេងមិនគ្រប់គ្រាន់នេះ បាននៅតែបន្ត ក្នុងភាពខុសគ្នារវាងភេទ និងសកម្មភាពផ្លូវកាយមួយចំនួន។
ហេតុផលដែលធ្វើឲ្យការគេងតិច ធ្វើឲ្យធាត់ គឺដោយសារតែកុមារមានពេលទំនេរច្រើន ក្នុងការញ៉ាំច្រើនជាងមុន និងមានការផ្លាស់ប្ដូរអ័រម៉ូន។
នៅក្នុងការវិភាគពីការស្រាវជ្រាវនេះ លោកសាស្រ្តាចារ្យ Francesco Cappuccio និងMichelle Miller ដែលមកពីសាកលវិទ្យាល័យ Warwick បាននិយាយថា ការស្រាវជ្រាវនាពេលអនាគតនឹងរកឃើញកាន់តែច្បាស់នូវវិធីសាស្រ្ដដែលអាចគ្រប់គ្រងម៉ោងពេលគេងរបស់កុមារ។
ចំណែកឯលោកវេជ្ជបណ្ឌិត Ian Maconochie ដែលមកពីសាកលវិទ្យាល័យសុខភាពកុមារនៅប្រទេសញូវហ្សើលែន ក៏បានថ្លែងដែរថា កុមារដែលមានអាយុក្រោម៥ឆ្នាំ ជាទូទៅមានពេលគេងជាមធ្យមចំនួន ១១ម៉ោងទាំងនៅពេលយប់ ទាំងពេលថ្ងៃ។
ទោះបីជាយ៉ាងណាក៏ដោយ កុមារចំនួន២០ភាគរយ បានជួបប្រទះនូវបញ្ហាគេងមិនគ្រប់គ្រាន់ ដែលមិនត្រឹមតែធ្វើឲ្យធាត់លើសទម្ងន់នោះទេ ប៉ុន្ដែថែមទាំងបាត់បង់នូវការចងចាំ និងរៀនខ្សោយផងដែរ។
ដើម្បីធ្វើឲ្យកុមារបានគេងគ្រប់គ្រាន់ឪពុកម្ដាយគឺជាមនុស្សដែលសំខាន់បំផុតក្នុងការគ្រប់គ្រងពេលវេលាចូលគេងរបស់កូនៗ។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment