បារី​សម្លាប់​មនុស្ស​ជិត​៦លាន​នាក់​ក្នុង​ឆ្នាំ​នេះ​

អ្នកជក់បារី

អង្គការសុខភាពពិភពលោក (WHO) បាននិយាយកាលពីថ្ងៃអង្គារសប្ដាហ៍មុនថា ថ្នាំជក់បានសម្លាប់មនុស្សជិត៦លាននាក់ក្នុងឆ្នាំនេះ ដែលរួមបញ្ចូលទាំងអ្នកមិនជក់បារីចំនួន ៦០ម៉ឺននាក់ផងដែរ។ WHO បានធ្វើការស្ដីបន្ទោសចំពោះការមិនសូវយកចិត្តទុកដាក់របស់រដ្ឋាភិបាលទាំងឡាយ ទៅលើការណែនាំឲ្យឈប់ជក់បារី និងការពារអ្នកដែលស្រូបផ្សែងបារី។

ចាប់តាំងពីមានការកើនឡើងនៃអ្នកចាប់ផ្ដើមជក់បារីមក បានធ្វើឲ្យអ្នកជក់ទាំងនោះជួបប្រទះនូវបញ្ហាសុខភាពជាច្រើន ដែលមកដល់ពេលនេះ ដល់ពេលដែលអ្នកឈឺទាំងនោះចាប់ផ្ដើមស្លាប់ហើយ។ បើគិតដល់ឆ្នាំ២០៣០ បារីនឹងអាចឆក់យកជីវិតមនុស្សរហូតដល់ទៅ ៨លាននាក់ឯណោះ។

ស្ថាប័នសុខភាពរបស់អង្គការសហប្រជាជាតិមួយនេះ បានទទូចឲ្យរដ្ឋាភិបាលទាំងអស់ ធ្វើការ

ត្រួតពិនិត្យថ្នាំជក់ឲ្យបានម៉ត់ចត់ និងបានព្រមានថាប្រសិនបើនិន្នាការនៃការជក់បារីនៅតែបន្តដូចសព្វថ្ងៃនេះ វានឹងធ្វើឲ្យមនុស្សរាប់ពាន់លាននាក់នឹងអស់ជីវិតដោយសារបារី នៅសតវត្សទី២១នេះ ខណៈដែលសតវត្សមុនចំនួនអ្នកស្លាប់មានចំនួន១០០លាននាក់។

គិតមកដល់សព្វថ្ងៃនេះមានប្រទេសចំនួន១៧២ និងសហគមអ៊ឺរ៉ុបផងដែរនោះ បានចុះហត្ថលេខាលើក្របខ័ណ្ឌអនុសញ្ញាស្ដីពីការត្រួតពិនិត្យថ្នាំជក់ ដែលចូលជាធរមានតាំងពីឆ្នាំ២០០៥មក។ ប្រទេសហត្ថលេខីទាំងអស់ នឹងត្រូវមានកាតព្វកិច្ចចាត់វិធានការកាត់បន្ថយអត្រាអ្នកជក់បារី ការពារអ្នកដែលស្រូបផ្សែងបារី (second-hand smoke) និងត្រួតពិនិត្យការផ្សព្វផ្សាយពាណិជ្ជកម្មថ្នាំជក់។

WHO ក៏បានកត់ចំណាំពីការខិតខំប្រឹងប្រែងថ្មីៗរបស់ប្រទេសមួយចំនួន ដូចជាប្រទេសអ៊ុយរុយហ្កាយបានធ្វើការបិទសារព្រមានស្ដីពីផលប៉ះពាល់សុខភាពលើកញ្ចប់បារីបាន៨០ភាគរយ (កម្ពុជាយើងក៏ធ្វើដូចគ្នានេះដែរ) និងប្រទេសចិន កាលពីខែមុនបានហាមឃាត់មិនឲ្យជក់បារីនៅតាមកន្លែងសាធារណៈ ដូចជាភោជនីយ៍ដ្ឋាន និងបារជាដើម។

WHO ក៏បានឲ្យដឹងទៀតថា ថ្នាំជក់បានសម្លាប់អ្នកប្រើប្រាស់វាអស់ចំនួនដល់ទៅពាក់កណ្ដាល ដែលធ្វើឲ្យវាក្លាយទៅជាការគម្រាមកំហែងសុខភាពសាធារណៈដ៏ខ្លាំងបំផុត ដែលពិភពលោកមិនធ្លាប់ជួបប្រទះពីមុនមក។ ថ្នាំជក់បានធ្វើឲ្យកើតជំងឺមហារីកសួត ហើយនឹងជំងឺផ្លូវដង្ហើមដទៃទៀត។ វាក៏ជាកត្តាហានីភ័យចម្បងសម្រាប់ជំងឺបេះដូង ដែលជាមេឃាតករលេខមួយលើលោកផងដែរ។

លើសពីនេះទៅទៀត WHO ក៏បានបន្ថែមជាចុងក្រោយថា ការជក់បារីគឺជាការរួមចំណែកមួយដ៏ធំជាងគេទៅលើជំងឺដទៃទៀត ដូចជាជំងឺគាំងបេះដូង ដាច់សរសៃឈាមក្នុងខួរក្បាល (ស្រ្ដូក), ជំងឺមហារីក ដែលទាំងអស់នេះគឺជាជំងឺដែលគ្រោះថ្នាក់ជាងគេលើលោក។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕