ទទួល​ទាន​ស្រា​​​ល្មម​​ជួយ​ការ​ពារ​ពី​ជំងឺ​បេះដូង

ស្រាក្រហម

យោលទៅតាមលទ្ធផលនៃការស្រាវជ្រាវដែលបានបោះពុម្ពផ្សាយនៅក្នុងព្រឹត្តិបត្រវេជ្ជសាស្ត្រអង់គ្លេសកាលពីថ្ងៃពុធបានឲ្យដឹងថា ការទទួលទានស្រាក្នុងកម្រិតមួយល្មម អាចជួយកាត់បន្ថយហានិភ័យពីជំងឺបេះដូងរហូតដល់មួយភាគបួន។ អ្នកដែលទទួលទានជាតិអាល់កុលរៀងរាល់ថ្ងៃក្នុងចន្លោះពី ២,៥ក្រាម ដល់ ១៤,៩ក្រាមមានអត្រាពី ១៤ ទៅ ២៥% តិចជាងអ្នកមិនទទួលទានសោះ ដែលវិវឌ្ឍជាជំងឺបេះដូង។

តាមរយៈការសិក្សានេះផងដែរ ការទទួលទាននូវចំនួនជាតិអាល់កុលក្នុងចំនួនសមស្របអាចបង្កើនកម្រិតកូលេស្តេរ៉ូលល្អ ដែលបានការពារអ្នកផឹកពីជំងឺស្ត្រូក និងជំងឺដែលពាក់ព័ន្ធនឹងសរសៃឈាមបេះដូង។

ការសិក្សានេះបានផ្អែកលើលទ្ធផលដែលរកឃើញដោយក្រុម... អ្នកស្រាវជ្រាវនៅសាកលវិទ្យាល័យកាល់ហ្គារី (University of Calgary) ប្រទេសកាណាដា ដែលបានវិភាគនូវឯកសារស្រាវជ្រាវចំនួន ៨៨រវាងឆ្នាំ ១៩៨០ និង២០០៩យ៉ាងល្អិតល្អន់។

ទោះជាយ៉ាងនេះក្ដី លទ្ធផលនេះក៏មិនអាចជាមូលហេតុនៃការចាប់ផ្ដើមការផឹកស្រាសម្រាប់អ្នកដែលមិនធ្លាប់ផឹកសោះនោះឡើយ។

អ្នកស្រី កាធី រ៉ូស (Cathy Ross) ជាគិលានុបដ្ឋាយិកាជាន់ខ្ពស់នៅមូលនិធិបេះដូងអង់គ្លេសបានព្រមានថា អ្នកផឹកជោគជាំតែងតែងាយស្រួលក្នុងការវិវឌ្ឍជាជំងឺមានសម្ពាធឈាមខ្ពស់ ស្ត្រូក និងជំងឺមហារីកខ្លះ។ អ្នកស្រីក៏បានបញ្ជាក់ថែមទៀតថា ការទទួលទានស្រាល្មមនោះគ្រាន់តែជាវិធីមួយប៉ុណ្ណោះ តែការហាត់ប្រាណគ្រប់គ្រាន់ និងបរិភោគអាហារត្រឹមត្រូវក៏អាចមានលទ្ធផលល្អដែរ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕