កាហ្វេកាត់បន្ថយ​​មហារីកក្រពេញប្រូស្ដាត

កាហ្វេអាចជួយបុរសកុំឲ្យកើតមហារីកក្រពេញប្រូស្ដាតបាន

ការស្រាវជ្រាវថ្មីមួយបានរកឃើញថា បុរសដែលផឹកកាហ្វេជាប្រចាំ អាចកាត់បន្ថយហានីភ័យនៃជំងឺមហារីកក្រពេញប្រូស្តាតបាន។

អ្នកស្រីវេជ្ជបណ្ឌិត Lorelei Mucci ដែលមកពីសាលាវេជ្ជសាស្រ្ដសាធារណៈហាវើត (Harvard) និងជាអ្នកស្រាវជ្រាវ បានឲ្យដឹងថា នៅពេលដែលក្រុមអ្នកស្រាវជ្រាវពិនិត្យទៅលើទម្រង់ទាំងអស់នៃមហារីកក្រពេញប្រូស្ដាត បានឲ្យពួកគេឃើញថាអ្នកដែលផឹកកាហ្វេច្រើនបំផុត មានអត្រាគ្រោះថ្នាក់ទាបជាងអ្នកមិនផឹកកាហ្វេចំនួន២០ភាគរយ នៅកំឡុងពេលត្រួតពិនិត្យនោះ។

អ្នកស្រីបានប្រាប់សារព័ត៌មានសុខភាពនៅអាមេរិកមួយថា អត្រាគ្រោះថ្នាក់ទាបជាង២០ភាគរយនេះ ត្រូវបានរកឃើញចំពោះអ្នកដែលផឹកកាហ្វេលើសពី៦ពែងក្នុងមួយថ្ងៃ ប្រៀបធៀបជាមួយអ្នកមិនផឹកកាហ្វេសោះ។

មិនត្រឹមតែប៉ុណ្ណោះទេកាហ្វេក៏អាច

ប្រឆាំងនឹងមហារីកក្រពេញប្រូស្ដាតទម្រង់គ្រោះថ្នាក់បំផុតបានទៀតផង។ ក្នុងចំណោមអ្នកដែលផឹកកាហ្វេពីមួយ ទៅបីពែងក្នុងមួយថ្ងៃ អាចកាត់បន្ថយហានីភ័យនៃមហារីកក្រពេញប្រស្ដាតទម្រង់នេះ បានដល់ទៅ២៩ភាគរយ បើប្រៀបធៀបជាមួយអ្នកមិនផឹក។ លើសពីនេះទៀតបើផឹកកាហ្វេលើសពី៦ពែងក្នុងមួយថ្ងៃ មហារីកក្រពេញប្រូស្ដាតទម្រង់គ្រោះថ្នាក់បំផុតនេះ បានដល់ទៅ៦០ភាគរយឯណោះ។

លទ្ធផលនៃការស្រាវជ្រាវដ៏គួរឲ្យភ្ញាក់ផ្អើលនេះ ត្រូវបានបោះពុម្ភផ្សាយនៅក្នុងព្រឹត្តបត្ររបស់វិទ្យាស្ថានជាតិមហារីកនៃសហរដ្ឋអាមេរិក។

ការសិក្សាស្រាវជ្រាវផ្សេងទៀតក៏បានរកឃើញដែរថា កាហ្វេអាចកាត់បន្ថយគ្រោះថ្នាក់នៃជំងឺទឹកនោមផ្អែមប្រភេទ២ មហារីកសុដន់របស់ស្រ្ដី (អត្ថបទមុនរបស់ខ្មែរសារិកា) និងជំងឺមហារីកថ្លើមបានទៀតផង។

យោងតាមវិទ្យាស្ថានមហារីករបស់អាមេរិក បានបង្ហាញថា ករណីថ្មីនៃជំងឺមហារីកក្រពេញប្រូស្ដាតមានចំនួន ២១៧,៧៣០នាក់ក្នុងឆ្នាំ២០១០ ក្នុងសហរដ្ឋអាមេរិក។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕