ការ​រៀប​ការ​អាច​ជួយ​ព្យាបាល​ជំងឺមហារីក​បាន​

គូស្វាមីភរិយាក្នុងថ្ងៃរៀបការ

អាពាហ៍ពិពាហ៍ត្រូវបានគេស្រាវជ្រាវរកឃើញថា ពិតជាមានប្រយោជន៍ជាច្រើនចំពោះសុខភាព ដែលក្នុងនោះមានទាំងសុខភាពផ្លូវកាយ និងផ្លូវចិត្តផងដែរ។ ហើយប្រសិនបើអាពាហ៍ពិពាហ៍នោះអាចនៅស្ថិតស្ថេរយូរអង្វែង នោះក៏នឹងអាចជួយឲ្យមានអាយុវែងទៀតផង។ រឹតតែពិសេសជាងនេះទៀត ការស្រាវជ្រាវថ្មីមួយរបស់សាកលវិទ្យាល័យ Penn State University និង Brigham Young University ក៏បានរកឃើញដែរថា មនុស្សដែលរៀបការហើយដែលមានផ្ទុកជំងឺមហារីកពោះវៀនធំ គឺនឹងអាចមានឱកាសច្រើនជាងអ្នកជំងឺដូចគ្នានេះដែលនៅលីវ ក្នុងការជាសះស្បើយ។

ការស្រាវជ្រាវដែលធ្វើឡើងដោយសាកលវិទ្យាល័យពីរផ្សេងគ្នានៅសហរដ្ឋអាមេរិកនេះ បានបញ្ជាក់ឲ្យឃើញថា អ្នកជំងឺមហារីកពោះវៀនធំអាចមានឱកាសនៃការជាសះស្បើយច្រើន ប្រសិនបើពួកគេរៀបការ។ ការស្រាវជ្រាវនេះ បានរកឃើញទៀតថា អ្នកជំងឺមហារីកពោះវៀនធំដែលរៀបការ មានអត្រាគ្រោះថ្នាក់ដល់អាយុជីវិតទាបជាងអ្នកនៅលីវ១៤%។

ដើម្បីចេញជាលទ្ធផលបែបនេះ អ្នកស្រាវជ្រាវដែលមកពីពីរសាកលវិទ្យាល័យនេះ បានធ្វើការវិភាគទៅលើទិន្នន័យនៃអ្នកជំងឺមហារីកពោះវៀនធំចំនួន ១២៧,៧៥៣នាក់ ដែលស្ថិតក្នុងដំណាក់កាលចុងក្រោយនៃជំងឺ។ ជាលទ្ធផល ក្នុងចំណោមអ្នកជំងឺទាំងអស់នេះ អ្នកដែលចាប់ផ្ដើមរៀបការ មានអត្រារួចផុតពីគ្រោះថ្នាក់ច្រើនជាងអ្នកដែលមិនរៀបការ។

លោក Sven Wilson ដែលជាសហដឹកនាំការស្រាវជ្រាវនេះមកពីសាកលវិទ្យាល័យ Brigham Young បាននិយាយថា ការមានដៃគូអាពាហ៍ពិពាហ៍ អាចជួយឲ្យអ្នកជំងឺជាបានឆាប់រហ័ស អាចបណ្ដាលមកពីផ្នែកចិត្តសាស្រ្ដ ដែលគិតថាប្ដី ឬប្រពន្ធរបស់អ្នកគឺជាអ្នកថែទាំជំងឺមួយដ៏ល្អ ដែលនៅជិតអ្នកស្ទើគ្រប់ពេលវេលា។ ហើយបើគិតតាមន័យធម្មតាក៏ត្រូវដែរ ព្រោះពេលមានប្ដី ឬប្រពន្ធ នោះអ្នកជំងឺហាក់ដូចជាមានគ្រូពេទ្យពេញម៉ោងម្នាក់នៅចាំថែរក្សាទាំងយប់ទាំងថ្ងៃដូច្នេះដែរ។

អ្វីទៅជាជំងឺមហារីកពោះវៀនធំ?

ជំងឺមហារីកពោះវៀនធំ គឺជាជំងឺដែលកើតឡើងនៅពេលដែលមានការរីកលូតលាស់ខុសប្រក្រតីនៃកោសិកានៅក្នុងពោះវៀនធំ ឬនៅផ្នែកខាងចុងនៃពោះវៀន។

មិនមានរោគសញ្ញាព្រមានទុកជាមុននៃជំងឺមហារីកប្រភេទនេះទេ។ ប៉ុន្ដែ នៅពេលដែលជំងឺនេះចាប់ផ្ដើមកើតឡើងហើយ រោគសញ្ញាមានដូចជា ឈាមនៅក្នុងលាមក ឈឺចុកចាប់នៅពោះ ផ្លាស់ប្ដូរទម្លាប់នៃការបន្ទោបង់ (ដូចជាទល់លាមក ឬរោគជាដើម) ស្រកទម្ងន់ដោយមិនដឹងមូលហេតុ ឬហេវហត់អស់កម្លាំង។

កត្តាហានីភ័យនៃជំងឺមហារីកពោះវៀនធំ គឺអាស្រ័យទៅលើហ្សែនរបស់អ្នកជំងឺ និងរបៀបនៃការរស់នៅ។ កត្តាហានីភ័យផ្សេងទៀតរួមមាន អាយុ (ចាស់) ជំងឺពោះវៀនផ្សេងទៀត និង ប្រវត្តិគ្រួសារ (ដែលមានអ្នកកើតជំងឺនេះឬអត់)។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕