ពណ៌​ក្រហមជួយ​​បង្កើន​ថាម​ពល

ពណ៌ក្រហម

ការស្រាវជ្រាវដ៏ថ្មីបំផុតរបស់អាមេរិកបានរកឃើញថា ការមើលឃើញពណ៌ក្រហមនឹងធ្វើឲ្យសាច់ដុំធ្វើចលនាបានលឿនជាងមុន និងមានថាមពលជាងមុន។ ការរកឃើញនេះ អាចមានភាពសំខាន់សម្រាប់កីឡា និងសកម្មភាពផ្សេងៗទៀតដែលត្រូវការថាមពលខ្លាំង និងរហ័ស។

លោក Andrew Elliot ដែលជាអ្នកស្រាវជ្រាវ និងជាសាស្រ្តាចារ្យផ្នែកចិត្តសាស្រ្ដមកពីសាកលវិទ្យាល័យ Rochester បាននិយាយប្រាប់អ្នកសារព័ត៌មានថា ពណ៌ក្រហមគឺជាពណ៌ដែលធ្វើឲ្យមានការរំញោចអារម្មណ៍។

អ្នកស្រាវជ្រាវរូបនេះបានបន្តទៀតថា មានមនុស្សជាច្រើនមិនបានដឹងថាពណ៌ក្រហមមានការជះឥទ្ធិពលមកលើសកម្មភាពនៃរាងកាយនោះទេ។ ប៉ុន្ដែពេលនេះ យើងបានស្រាវជ្រាវឃើញប្រាកដហើយថា ពណ៌ក្រហមអាចធ្វើឲ្យមានការបង្កើនថាមពល ថែមទាំងអាចកាត់បន្ថយអារម្មណ៍ភ័យព្រួយ បារម្ភផងដែរ។

ការស្រាវជ្រាវដែលត្រូវបានបោះពុម្ភនៅក្នុងព្រឹត្តបត្រ Emotion នេះបានធ្វើការប្រៀបធៀបការរំញោចនៃសាច់ដុំរបស់សិស្សសាលា នៅក្នុងការពិសោធន៍ពីរផ្សេងគ្នា។

ជាលទ្ធផលបង្ហាញថា នៅក្នុងការពិសោធន៍ទាំងពីរនោះ បានឃើញថាពណ៌ក្រហមបានបង្កើននូវសកម្មភាពរបស់សិស្សទាំងពីរក្រុម។ ពួកគេមានការឆ្លើយតបរហ័សនៅពេលឃើញពណ៌ក្រហម។

អ្នកស្រាវជ្រាវដដែលនេះ ក៏បាននិយាយដែរថា ការស្រាវជ្រាវមុនៗ ក៏បានបង្ហាញដែរថា ពណ៌ក្រហមអាចជួយបង្កើននូវផលិតភាព និងការងារដែលប្រើខួរក្បាលផងដែរ។

ជាចុងបញ្ចប់ លោកគ្រូចិត្តសាស្រ្ដ Elliot បាននិយាយថា ពណ៌ពិតជាជះឥទ្ធិពលមកលើមនុស្ស ទៅតាមវិធីជាច្រើន។

ទោះបីជាយ៉ាងណាក៏ដោយ នេះគ្រាន់តែជាការស្រាវជ្រាវតែប៉ុណ្ណោះ ដូច្នេះមិនប្រាកដថាត្រូវទាំងអស់នោះទេ។ ប្រិយមិត្តអាចសង្កេតមើលខ្លួនឯងបន្ថែមអំពីអារម្មណ៍ពេលឃើញពណ៌ក្រហម។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕