គុណ​ប្រយោជន៍​ផ្លែ​ស្ត្ររប៊ើរី

ផ្លែស្ត្ររប៊ើរី

ការសិក្សាថ្មីមួយបានបង្ហាញថា ការញ៉ាំផ្លែស្ត្ររប៊ើរីដែលគេបានបង្កកស្ងួតអាចមានតួនាទីមួយក្នុងការការពាររោគមហារីកបំពង់អាហារ។

អ្នកស្រាវជ្រាវឈានមុខគឺលោកស្រីបណ្ឌិត តុង ឆេង (Tong Cheng) ជាសាស្ត្រាចារ្យជំនួយការនៅផ្នែកដុំសាច់ពកវេជ្ជសាស្ត្រ នៃមហាវិទ្យាល័យឱសថសាស្ត្រខាងក្នុង សាកលវិទ្យាល័យរដ្ឋអូហាយូសហរដ្ឋអាមេរិកបានឲ្យដឹងថា ផ្លែស្ត្ររប៊ើរីអាចជាជម្រើសមួយឬអាចមានប្រតិកម្មល្អជាមួយថ្នាំការពារផលិតពីសារធាតុគីមីសម្រាប់ទប់ស្កាត់រោគមហារីក។

លទ្ធផលនៃការស្រាវជ្រាវនេះត្រូវបានបង្ហាញនៅឯកិច្ចប្រជុំប្រចាំឆ្នាំលើកទី១០២នៃសមាគម... អាមេរិកសម្រាប់ការស្រាវជ្រាវរោគមហារីកក្នុងរដ្ឋហ្វ្លរីដា។

លោកស្រី ឆេនបានបន្តថា យើងបានធ្វើការសរុបទិន្នន័យនៃការសិក្សានេះថា ការញ៉ាំស្ត្ររប៊ើរីចំនួនប្រាំមួយខែគឺមានសុវត្ថិភាព និង ងាយស្រួលក្នុងការញ៉ាំ។ លើសពីនេះទៀតនោះ ទិន្នន័យដំបូងៗរបស់យើងបានស្នើថាផ្លែស្ត្ររប៊ើរីអាចកាតបន្ថយកម្រិតជាលិកាមិនល្អ និង បន្ថយរោគមហារីកដែលពាក់ព័ន្ធដល់ដំណើរការរបស់ម៉ូលេគុល។

ក្នុងការសិក្សានេះ គេបានឲ្យអ្នកសិក្សាត្រូវញ៉ាំផ្លែស្ត្ររប៊ើរីកកហើយស្ងួតចំនួន៦០ក្រាមជារៀងរាល់ថ្ងៃក្នុងរយៈពេលប្រាំមួយខែ។ អ្នកស្រាវជ្រាវទទួលបាននូវគំរូជីវជាលិកាសាស្ត្រមុន និង ក្រោយពេលញ៉ាំផ្លែនេះរបស់អ្នកចូលរួមការសិក្សា។ លទ្ធផលបង្ហាញថា អ្នកចូលរួមចំនួន២៩នាក់ក្នុងចំណោម៣៦នាក់បានកាត់បន្ថយនូវកម្រិតជាលិកាមិនល្អក្នុងកំឡុងពេលនៃការសិក្សា។

ការប្រើប្រាស់ផ្លែស្ត្ររប៊រីកកហើយស្ងួតនោះមានសារសំខាន់ណាស់ពីព្រោះវាអាចបណ្ដេញជាតិទឹកចេញពីផ្លែនោះបាន និង អាចរក្សាសារធាតុការពារបានចំនួនដប់ដង នេះបើតាមលោកស្រី ឆេន។

រោគមហារីកបំពង់អាហារស្ថិតនៅក្នុងលំដាប់ទីបីនៃរោគមហារីកក្រពះ និង ពោះវៀនទូទៅ និង មានលំដាប់ទីប្រាំមួយនៃរោគមហារីកដែលបណ្ដាលឲ្យមានមនុស្សស្លាប់នៅក្នុងពិភពលោក។

លោកស្រី ឆេន និង ក្រុមស្រាវជ្រាវរបស់គាត់កំពុងតែសិក្សាលើកោសិកាមហារីកបំពង់អាហារដែលមានចំនួន៩៥%នៃករណីមហារីកបំពង់អាហារលើពិភពលោក។ ប្រទេសចិន ជាកន្លែងដែលការសិក្សានេះកំពុងតែដំណើរការមានអត្រារោគមហារីកនេះខ្ពស់ជាងគេបំផុត នេះបើតាមព្រឹត្តិបត្រ AAAS។

ក្នុងការសិក្សាមុនៗ លោកស្រី ឆេន និង ដៃគូបានរកឃើញថាផ្លែស្ត្ររប៊ើរីដែលកកហើយស្ងួតអាចរារាំងការវិវឌ្ឍនៃសាច់មហារីកបំពង់អាហារបាន។ ដោយផ្អែកលើលទ្ធផលនេះ ពួកគាត់បានបន្តការពិសោធដោយរួមទាំងអ្នកដែលមានជាលិកាមិនល្អដែលមានហានិភ័យខ្ពស់ក្នុងការវិវឌ្ឍទៅជារោគមហារីកបំពង់អាហារ។

លោកស្រីបណ្ឌិតបានបន្ថែមថា ការសិក្សារបស់យើងនេះមានសារសំខាន់ព្រោះវាបង្ហាញថាផ្លែស្ត្ររប៊ើរីអាចបន្ថយដំណើរការវិវឌ្ឍរបស់ជាលិកាដែលមានរោគមហារីក។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕