រកឃើញហ្សែនថ្មីទាក់ទងនឹងជំងឺបេះដូង

បេះដូងរបស់មនុស្ស

ក្រុមអ្នកវិទ្យាសាស្រ្តបានរកឃើញនូវ ហ្សែនប្រភេទថ្មី ចំនួន ១៣ ដែលបង្កឲ្យមនុស្សប្រឈមនឹងហានិភ័យនៃការវិវឌ្ឍទៅរកជំងឺបេះ ដូង ដែលជាឃាតករដ៏សាហាវលេខមួយលើលោក។

លោកវេជ្ជបណ្ឌិត Themistocles Assimes មកពីសាកលវិទ្យាល័យសុខាភិបាលស្ទែនហ្វត សហរដ្ឋអាមេរិក ដែលជាមនុស្សម្នាក់ក្នុងចំណោមអ្នកវិទ្យាសាស្រ្ដដ៏ទៃទៀតដែលសិក្សា លើករណីនេះបាននិយាយថា ការដឹងនូវព័ត៌មានថ្មីនេះ អាចឲ្យគេកំណត់ពីមនុស្សដែលអាចប្រឈមនឹងគ្រោះថ្នាក់នៃការកើត ជំងឺបេះដូងនៅពេលពួកគេនៅវ័យក្មេង ហើយអាចរកវិធីទប់ស្កាត់ពួកគេពីហានិភ័យនៃជំងឺដ៏សាហាវនេះ។

យោងតាមរបាយការណ៍របស់អង្គការសុខភាពពិភពលោក ជំងឺបេះដូងគឺជាឃាតករធំលំដាប់ទី១លើពិភពលោក ដែលបានឆក់យកជីវិតមនុស្សប្រមាណ ១៧,១លាននាក់ ក្នុងមួយឆ្នាំ។ ទឹកប្រាក់រាប់ពាន់លានដុល្លា ត្រូវបានចំណាយលើសម្ភារៈ និងឱសថសម្រាប់ព្យាបាលអ្នកជំងឺបេះដូង។

កត្តាមួយចំនួនដូចជា ការជក់បារី, ការផឹកគ្រឿងស្រវឹង, ការទទួលអាហារគ្មានសុវត្ថិភាព និងកង្វះការហាត់ប្រាណ គឺជាមូលហេតុដែលធ្វើឲ្យមនុស្ស ប្រឈមនឹងការកើតជំងឺបេះដូង និងជំងឺដាច់សរសៃឈាមក្នុងខួរក្បាល ប៉ុន្តែអ្នកវិទ្យាសាស្រ្តក៏បានធ្វើការសិក្សាលើ DNA ផងដែរ ដើម្បីរកនូវហ្សែន ដែលអាចបង្កឲ្យមនុស្សប្រឈមនឹងជំងឺបេះដូងក្នុងកម្រិតខ្ពស់។

អ្នក ស្រាវជ្រាវបាននិយាយថា លទ្ធផលរបស់ពួកគេបានបង្ហាញថា ក្នុងចំណោមហ្សែនសរុបចំនួន ១៣ ដែលទើបតែរកឃើញនោះ ហ្សែនចំនួន៧ មានទំនាក់ទំនងទៅនឹង សារធាតុខ្លាញ់នៅក្នុងឈាម ហើយហ្សែនផ្សេងទៀតទាក់ទងទៅនឹងកម្រិតសម្ពាធឈាមឡើងខ្ពស់ ដែលទាំងពីរនេះជាកត្តាដែលធ្វើឲ្យមានហានិភ័យនៃការកើតជំងឺបេះ ដូងខ្ពស់។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕