ជីវ៉ាន់​ស៊ុយ​ អាច​ប្រយុទ្ធ​ប្រឆាំង​នឹង​បាក់​តេរី​

ជីវ៉ាន់ស៊ុយ

របកគំហើញថ្មីមួយបានបង្ហាញថា ជីវ៉ាន់ស៊ុយ មានផ្ទុកទៅដោយសារធាតុប្រឆាំងនឹងមេរោគធម្មជាតិ និងមានប្រសិទ្ធភាពខ្ពស់ក្នុងការសម្លាប់ ឬក៏បង្អាក់ការរីកលូតលាស់នៃពពួកបាក់តេរីសាហាវៗចំនួន១២ប្រភេទ។

ក្រុមអ្នកស្រាវជ្រាវមកពីសាកលវិទ្យាល័យ Beria Interior នៃប្រទេសព័រទុយហ្កាល់ បានរកឃើញថា ជីវ៉ាន់ស៊ុយ មិនត្រឹមតែជាប្រភេទជីរដ៏ពេញនិយមប៉ុណ្ណោះទេ ប៉ុន្ដែថែមទាំងដើរតួនាទីយ៉ាងសំខាន់ក្នុងការប្រឆាំងនឹងពពួកបាក់តេរីជាច្រើន។ វាអាចប្រយុទ្ធប្រឆាំងនឹងបាក់តេរី ដែល ធន់នឹងថ្នាំ។

ក្រុមអ្នកស្រាវជ្រាវបានបង្កើតសូលុយស្យុងដែលផ្សំដោយប្រេងជីវ៉ាន់ស៊ុយ (ប្រេងដែលចម្រាញ់ពីស្លឹកជីវ៉ាន់ស៊ុយ) ហើយយកមកសាកល្បងទៅលើពពួកបាក់តេរីជាច្រើនប្រភេទ។ ជាលទ្ធផលការសាកល្បងនេះបានទទួលជោគជ័យ ដោយសូលុយស្យុងដែលផ្សំពីប្រេងជីវ៉ាន់ស៊ុយនេះ អាចសម្លាប់បាក់តេរីសាហាវៗបានដល់ទៅ ១២ប្រភេទផ្សេងគ្នា ដែលក្នុងនោះរួមមាន E. coli ដែលកំពុងរាតត្បាតផងដែរ។

អ្នកស្រាវជ្រាវទាំងនោះបានពន្យល់ថា នៅពេលដែលជីវ៉ាន់ស៊ុយវាយប្រហារបាក់តេរីទាំងនោះ វាបានជ្រាបចូលទៅដល់ក្នុងភ្នាសកោសិកានៃបាក់តេរី ដូច្នេះវាអាចបំផ្លាញ ឬសម្លាប់បាក់តេរីទាំងនោះបានទាំងស្រុងតែម្ដង។

លោកវេជ្ជបណ្ឌិត Fernanda Domingues ដែលដឹកនាំការស្រាវជ្រាវនេះបាននិយាយថា លទ្ធផលបានបង្ហាញថា ប្រេងដែលចម្រាញ់ពីស្លឹកជីវ៉ាន់ស៊ុយ អាចបំផ្លាញកោសិកាបាក់តេរីបាន ដូច្នេះការប្រើជីវ៉ាន់ស៊ុយនៅក្នុងម្ហូបគឺពិតជាល្អ។

នៅពេលនេះ ក្រុមអ្នកស្រាវជ្រាវកំពុងតែធ្វើការសិក្សាបន្ថែមទៅលើជីវ៉ាន់ស៊ុយនេះ ដើម្បីរិះរកវិធីល្អប្រសើរជាងនេះដើម្បីកំចាត់បាក់តេរីសាហាវៗទាំង១២មុខនេះ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕