គេង​តិច​ពេក ប្រឈម​នឹង​ជំងឺ​លើស​ឈាម

គ្រូពេទ្យកំពុងវាស់សម្ពាធឈាម

បុរសវ័យចំណាស់ ដែលបានចំណាយពេលតិចតួចក្នុងការគេងលក់ស្កប់ស្កល់ អាចនឹងប្រឈមមុខនឹងគ្រោះថ្នាក់នៃការអភិវឌ្ឍទៅរកជំងឺសម្ពាធឈាមឡើងខ្ពស់ នេះបើយោងតាមការរកឃើញរបស់ក្រុមអ្នកវិទ្យាសាស្រ្ដសហរដ្ឋអាមេរិក។

ការសិក្សាដែលធ្វើឡើងលើអ្នកជំងឺ ៧៨៤នាក់នេះ បានបង្ហាញថា ការគេងលក់ស្កប់ស្កល់តិចតួចពេក មានហានីភ័យខ្ពស់ជាងអ្នកដែលគេងស្កប់ស្កល់បានយូរដល់ទៅ ៨៣ភាគរយឯណោះ ។ ទោះបីជាធ្វើឡើងតែចំពោះមនុស្សប្រុសក៏ដោយ ក៏ក្រុមអ្នកស្រាវជ្រាវដដែលនេះ បាននិយាយដែរថា ផលប៉ះពាល់អាចនឹងស្រដៀងគ្នាចំពោះស្រ្ដីផងដែរ។

ជំងឺសម្ពាធឈាមឡើងខ្ពស់ គឺជាជំងឺមួយដ៏សាហាវ ដែលវាអាចបង្កឲ្យមានជំងឺគាំងបេះដូង ជំងឺដាច់សរសៃឈាមក្នុងខួរក្បាល (ស្រ្ដូក) និងបញ្ហាសុខភាពដទៃទៀត។

ក្រោយពីបានធ្វើការវិភាពទៅលើ គុណភាពនៃការគេងរបស់ក្រុមអ្នកជំងឺជាបុរសដែលមានអាយុលើស ៦៥ឆ្នាំ ចំនួន ៧៨៤នាក់នោះរួចមក លទ្ធផលបានបង្ហាញថា ក្រុមអ្នកដែលគេងលក់ស្កប់ស្កល់តិចតួច មានអត្រាកើតជំងឺលើសឈាមខ្ពស់ បើប្រៀបធៀបទៅនឹងក្រុមដែលគេងលក់ស្កប់ស្កល់នាពេលយប់បានយូរ។

លោកសាស្រ្ដាចារ្យ Susan Redline ដែលជាអ្នកស្រាវជ្រាវម្នាក់មកពីសាកលវិទ្យាល័យ Harvard Medical School បាននិយាយថា ទោះបីជាស្រ្ដីមិនបានចូលរួមក្នុងការសិក្សានេះ ក៏ប្រហែលជាអាចទទួលរងផលប៉ះពាល់ពីការគេងបានតិចនេះដែរ ពោលគឺនឹងប្រឈមនឹងការលើសឈាម។

របាយការណ៍នៃការស្រាវជ្រាវនេះ ក៏មានបញ្ជាក់ដែរថា ការសិក្សាស្រាវជ្រាវផ្សេងទៀត នឹងចាំបាច់ត្រូវតែធ្វើ ដើម្បីដឹងឲ្យច្បាស់ថា តើការគេងលក់បានស្កប់ស្កល់ក្នុងរយៈពេលយូរ អាចកាត់បន្ថយហានីភ័យនៃជំងឺលើសឈាមបានឬក៏យ៉ាងណា។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕