វិធី​​ប្រាំ​យ៉ាង​ ដើម្បី​ថែបំប៉ន​សុខ​ភាព​បេះ​ដូង​

បន្លែ ផ្លែឈើ គ្រាប់ធញ្ញជាតិ និងត្រី

ជំងឺបេះដូង គឺជាជំងឺដ៏សាហាវបំផុត និងជាមេឃាតករនាំមុខគេក្នុងការផ្ដាច់យកជីវិតមនុស្សអស់ជាច្រើនលាននាក់នៅទូទាំងពិភពលោក។ ដើម្បីជៀសឲ្យផុតពីជំងឺនេះ អ្នកត្រូវចេះថែរក្សាសុខភាពបេះដូងរបស់អ្នក ដូចជាការគេងឲ្យបានគ្រប់គ្រាន់ គ្រប់គ្រងទម្ងន់ឲ្យបានល្អ ធ្វើលំហាត់ប្រាណឲ្យបានទៀងទាត់ និងការមិនជក់បារីជាដើម។

ទោះបីជាយ៉ាងណាក៏ដោយ ការរៀបចំអាហារឲ្យបានត្រឹមត្រូវ ក៏ជាវិធីដ៏សំខាន់មួយផងដែរ ក្នុងការធ្វើឲ្យបេះដូងរបស់យើងមានសុខភាពល្អ។ ការញ៉ាំអាហារដែលត្រឹមត្រូវមិនត្រឹមតែជួយថែបំប៉នបេះដូងរបស់អ្នកប៉ុណ្ណោះទេ ប៉ុន្ដែថែមទាំងអាចជួយបង្កើនគុណភាពជីវិតរបស់អ្នកបានទៀតផង។

ខាងក្រោមនេះ គឺជាគន្លឹះទាក់ទងនឹងអាហារ សម្រាប់ការពារជំងឺបេះដូង និងជួយថែរក្សាសុខភាពបេះដូង៖

១- ត្រូវផ្ដោតលើអាហារពេលព្រឹក

ទោះបីជារវល់ប៉ុណ្ណាក៏ដោយ អ្នកមិនត្រូវភ្លេចអាហារពេលព្រឹកនោះទេ ព្រោះវាជាវិធីល្អបំផុតក្នុងការចាប់ផ្ដើមថ្ងៃថ្មីរបស់អ្នក។ ការញ៉ាំអាហារពេលព្រឹកដែលមានជីវជាតិគ្រប់គ្រាន់ មិនត្រឹមតែជួយផ្ដល់ថាមពលដល់អ្នកប៉ុណ្ណោះទេ ប៉ុន្ដែវាក៏អាចជួយបញ្ចុះកូឡេស្ទេរ៉ូលបានទៀតផង។

២- កាត់បន្ថយអាហារលឿន (fast food)

អាហារដែលល្អចំពោះបេះដូង និងជួយកាត់បន្ថយហានីភ័យនៃជំងឺបេះដូង គឺជាអាហារដែលគ្មានជាតិធាត់ខ្លាំង។ អាហារដែលមានកម្រិតធាត់ខ្លាំងមានដូចជា ដំឡូងបារាំងចៀន និងអាហារលឿនៗដទៃទៀត ព្រោះវាអាចធ្វើឲ្យកម្រិតនៃកូឡេស្ទេរ៉ូលនៃរាងកាយរបស់យើងកើនឡើង ដែលជាការធ្វើឲ្យអ្នកប្រឈមនឹងជំងឺគាំងបេះដូង។

៣- គ្រាប់ធញ្ញជាតិ

គ្រាប់ធញ្ញជាតិដែលអ្នកអាចញ៉ាំបាន រួមមាន គ្រាប់ស្វាយចន្ទី គ្រាប់អាល់ម៉ុន (almond) គ្រាប់វ៉ាល់ណាត់ គ្រាប់ផ្លែអង្គារដី គ្រាប់កប្បាស ឬគ្រាប់សណ្ដែកដីជាដើម។ ការញ៉ាំគ្រាប់ទាំងអស់នេះ អាចជួយឲ្យអ្នកកាត់បន្ថយនូវកម្រិតហានីភ័យនៃជំងឺបេះដូងបាន។

យ៉ាងណាមិញ អ្នកត្រូវចងចាំផងដែរថា គ្រាប់ធញ្ញជាតិទាំងអស់នេះ មានកាឡូរីខ្ពស់ ដូច្នេះអ្នកគួរតែញ៉ាំវាក្នុងកម្រិតមួយតិចល្មមបានហើយ។ អ្នកជំនាញ បានផ្ដល់ដំបូន្មានថា អ្នកគួរតែញ៉ាំវាជាមួយនឹងអាហារពេលព្រឹក ឬជាអាហារញ៉ាំលេងក្រោយពេលញ៉ាំអាហារថ្ងៃត្រង់ហើយ។

៤- ញ៉ាំបន្លែ និងផ្លែឈើឲ្យបានច្រើន

ផ្លែឈើ និងបន្លែជាច្រើន មានកម្រិតកាឡូរីទាប និងមានហ្វៃប៊ើច្រើន ដែលអាចជួយឲ្យអ្នកមានសុខភាពបេះដូងល្អ។ វិធីដែលឆ្លាតបំផុត គឺការលាង និងកាត់ឲ្យរួចស្រេចនូវរាល់ផ្លែឈើ ឬបន្លែនៅក្នុងទូទឹកកក ដែលអាចឲ្យអ្នកយកញ៉ាំបានលឿន មិនចំណាយពេលច្រើន។

អ្នកត្រូវព្យាយាមបញ្ចូលផ្លែឈើ និងបន្លែឲ្យបានគ្រប់មុខម្ហូប ឬក៏បានច្រើនមុខ តាមតែអាចធ្វើទៅបាន។

៥- ញ៉ាំត្រីដើម្បីបេះដូង

ការញ៉ាំត្រី ពិតជាមានប្រយោជន៍ច្រើនណាស់ចំពោះបេះដូងរបស់យើង។ ត្រីដែលមានផ្សំទៅដោយ អូមេហ្កា៣ នឹងអាចជួយកាត់បន្ថយគ្រោះថ្នាក់នៃជំងឺបេះដូង ជាពិសេសគឺស្លាប់ដោយសារការគាំងបេះដូង។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕