ការ​សើច​ ជួយ​ព្យាបាល​អ្នកកើត​​ជំងឺ​ខួរ​ក្បាល​

មនុស្សចាស់កំពុងសើច

ការសិក្សាថ្មីមួយដែលធ្វើឡើងដោយក្រុមអ្នកស្រាវជ្រាវជនជាតិអូស្រ្ដាលីបានបង្ហាញថា ការសើចគឺជាឱសថដ៏មានប្រសិទ្ធិភាពសម្រាប់ព្យាបាលអ្នកកើតជំងឺទាក់ទងនឹងខួរក្បាល ដូចជាជំងឺរវើរវាយ ឬជំងឺវិកលចរិកជាដើម។

ការសិក្សាដែលធ្វើឡើងដល់ទៅ៣ឆ្នាំនេះ បានធ្វើការស្ទង់មតិទៅលើគិលានុប្បដ្ឋាយិកាចំនួន ៣០នាក់ និងអ្នកជំងឺ៤០០នាក់។ វាត្រូវបានគេឲ្យឈ្មោះថា SMILE study ដែលផ្ដោតសំខាន់ លើការស្វែងរកឲ្យឃើញនូវតួនាទីនៃការសើច ចំពោះអ្នកកើតជំងឺវិកលចរិក។

លោក Jean-Paul Bell ដែលជាអ្នកជំនាញខាងជំងឺខួរក្បាល បានបញ្ជាក់ថា ការសើចអាចជួយព្យាបាលអ្នកជំងឺរវើរវាយ ឬ វិកលចរិកបានដល់ទៅ ២០ភាគរយ។

តាមពិតទៅ ២០ភាគរយគឺមិនសូវជាច្រើននោះទេ បើមើលតែមួយភ្លែត ប៉ុន្ដែធាតុពិតគឺវាច្រើន ព្រោះថា ឱសថដែលព្យាបាលជំងឺនេះ ក៏អាចកាត់បន្ថយបានតែ២០ភាគរយនោះដែរ។

ការដែលទទួលបានប្រសិទ្ធិភាព ដោយមិនចាំបាច់លេបថ្នាំនេះហើយ ដែលធ្វើឲ្យការសើច ជាជម្រើសថ្មី ព្រោះថាថ្នាំពេទ្យក៏មិនមែនល្អទាំងអស់នោះដែរ ពោលគឺជាអាវុធមុខពីរ។

ជំងឺរវើរវាយ ឬវិកលចរិក គឺជាជំងឺម្យ៉ាងដែលធ្វើឲ្យអ្នកបាត់បង់នូវសមត្ថភាពនៃការចងចាំ ការគិត ភាសា ជំនាញដោះស្រាយបញ្ហា ការវិនិច្ឆ័យ និងអត្តចរិត។

អ្នកដែលកើតជំងឺនេះ គឺបានទទួលរងនូវការភ្លេចភ្លាំង ហើយមិនសូវយល់នូវភាសាដែលអ្នកដទៃនិយាយមកកាន់ខ្លួន ដូច្នេះចាំបាច់ណាស់ អ្នកជំងឺត្រូវតែមានការមើលថែទាំឲ្យបានល្អ និងការគាំទ្រពីមិត្តភក្ដិ និងក្រុមគ្រួសារ។ ជំងឺនេះ ភាគច្រើនកើតឡើងចំពោះមនុស្សចាស់ ជាពិសេសគឺចាប់ពីអាយុ៨០ឆ្នាំឡើងទៅ។

យោងតាមការព្យាករណ៍របស់អ្នកជំនាញ បានឲ្យដឹងថា អ្នកកើតជំងឺនេះ បានកើតឡើងទ្វេដងរយៈពេល២០ឆ្នាំម្ដង ដែលឆ្នាំ២០៤០ នឹងមានអ្នកកើតជំងឺនេះ ៨១,១លាននាក់នៅទូទាំងពិភពលោក។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕