ស្រាក្រហម​ជួយ​ការ​ពារ​ជំងឺ​មហារីក​សុដន់​

ស្រ្ដីញ៉ាំស្រាក្រហម

យោងតាមការស្រាវជ្រាវថ្មីមួយបានបង្ហាញថា សារធាតុគីមីម្យ៉ាងដែលរកឃើញនូវក្នុងស្រាក្រហម អាចបញ្ឈប់នូវការវិវឌ្ឍទៅរកជំងឺមហារីកសុដន់។

ការធ្វើពិសោធន៍របស់ក្រុមអ្នកស្រាវជ្រាវអ៊ីតាលីនេះ បានបង្ហាញថា សារធាតុដែលរកឃើញនៅក្នុងសម្បកផ្លែទំពាំងបាយជូរ អាចជួយទប់ស្កាត់ការអភិវឌ្ឍនៃជំងឺមហារីកសុដន់បាន ដោយវាបានបង្អាក់ការរីកលូតលាស់នៃអ័រម៉ូនអូស្រ្ដូហ្សែន (oestrogen)។

អ្នកវិទ្យាសាស្រ្ដមួយក្រុមនេះបានថ្លែងថា ការរកឃើញដែលបោះពុម្ភនៅក្នុងព្រឹត្តិបត្រ The FASEB នេះ គឺជារបកគំហើញថ្មីដ៏សំខាន់មួយសម្រាប់អ្នកជំងឺមហារីកសុដន់។

លោកវេជ្ជបណ្ឌិត Sebastiano Ando មកពីសាកលវិទ្យាល័យ Calabria នៃប្រទេសអ៊ីតាលី បានបញ្ជាក់ប្រាប់ថា សារធាតុគីមី Resveratrol គឺជាសារធាតុដែលអាចទប់ស្កាត់ការវិវឌ្ឍនៃជំងឺមហារីកសុដន់បានយ៉ាងមានប្រសិទ្ធិភាព ហើយសារធាតុចម្បងនេះ ក៏ត្រូវបានរកឃើញនៅក្នុងផ្លែប៊្លូប៊ើរី(blueberries) ផងដែរ។

សូមបញ្ជាក់ផងដែរថា ជំងឺមហារីកសុដន់ គឺជាប្រភេទជំងឺមហារីកដែលគ្រោះថ្នាក់បំផុតសម្រាប់ស្រ្ដី ហើយក៏ច្រើនជាងប្រភេទនៃជំងឺមហារីកផ្សេងទៀតដែរ ដែលគ្រាន់តែនៅប្រទេសអង់គ្លេសមួយ មានករណីនៃជំងឺនេះចំនួន ៤៥០០០ ជារៀងរាល់ឆ្នាំ។

លោកវេជ្ជបណ្ឌិត Gerald Weissmann ដែលជានិពន្ធនាយកនៃព្រឹត្តិបត្រសុខភាព The FASEB បាននិយាយដែរថា ការរកឃើញនេះ គឺជារឿងដែលគួរឲ្យសប្បាយរីករាយបំផុត ប៉ុន្ដែមិនមែនមានន័យថា មនុស្សគ្រប់រូបត្រូវចេញទៅក្រៅ ដើម្បីផឹកស្រាក្រហមដើម្បីព្យាបាលជំងឺមហារីកសុដន់នោះទេ។

សារធាតុ Resveratrol ក៏ធ្លាប់ត្រូវបានគេឃើញថា មានប្រយោជន៍អាចជួយទប់ស្កាត់ ភាពចាស់ជ្រីវជ្រួញ ឬចាស់មុនអាយុផងដែរ។ សារធាតុគីមីមួយប្រភេទនេះ ត្រូវបានគេហៅថា ជាសារធាតុគីមីដែលមានប្រយោជន៍ចំពោះសុខភាពមួយ ក្នុងចំណោមសារធាតុដ៏មានប្រយោជន៍ជាច្រើនទៀតដែលមាននៅក្នុងស្រាក្រហម។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕