អ្នក​ពន្លត់​អគ្គីភ័យ​នៅ​ថ្ងៃ១១ កញ្ញា​ កើត​មហារីកខ្ពស់​

អគារពាណិជ្ជកម្មពិភពលោកនៅថ្ងៃ ១១ កញ្ញា ២០០១

សល់តែប៉ុន្មានថ្ងៃទៀតទេ នឹងដល់ថ្ងៃខួបគម្រប់១០ឆ្នាំ នៃព្រឹត្តការណ៍វាយប្រហារលើអគារពាណិជ្ជកម្ម ពោលគឺថ្ងៃទី ១១ ខែកញ្ញា។ ទន្ទឹមនឹងគ្នានេះដែរ របាយការណ៍នៃការសិក្សាថ្មីមួយបានបង្ហាញថា ក្រុមអ្នកពន្លត់អគ្គីភ័យនៅអគារភ្លោះ ដែលទទួលរងនូវជាតិពុល និងផ្សែងជាច្រើននាពេលនោះ អាចប្រឈមមុខខ្ពស់នឹងជំងឺមហារីកគ្រប់ប្រភេទ។

ក្រុមអ្នកស្រាវជ្រាវរបស់អាមេរិកនេះ បានបង្ហាញកាលពីថ្ងៃព្រហស្បតិ៍ថា បើប្រៀបធៀបជាមួយនឹងអ្នកពន្លត់អគ្គីភ័យដូចគ្នាដែលមិនស្ថិតនៅក្នុងព្រឹត្តការណ៍នោះ អ្នកដែលចូលរួមពន្លត់ មានហានីភ័យខ្ពស់ជាងចំនួន ១៩ភាគរយ ក្នុងការកើតជំងឺមហារីក។

ការសិក្សានេះ គឺជាលើកទីមួយហើយ ដែលធ្វើឡើងដើម្បីដឹងពីអត្រានៃជំងឺមហារីកទៅលើអ្នកពន្លត់អគ្គីភ័យគ្រប់រូប ដើម្បីទទួលបាននូវការគាំពារពីរដ្ឋាភិបាល ចំពោះអ្នកដែលរងគ្រោះដោយសារតែជំងឺមហារីកក្នុងការវាយប្រហារដែលមានរយៈពេលជិតមួយទសវត្សនេះ។

លោកវេជ្ជបណ្ឌិត David Prezant ដែលមកពីនាយកដ្ឋានអគ្គីភ័យប្រចាំទីក្រុងញូវយ៉ក បាននិយាយថា ការសិក្សានេះបានបង្ហាញយ៉ាងច្បាស់ថា ការផ្ទុះឆេះអគារពាណិជ្ជកម្មពិភពលោកនាពេលនោះ បានធ្វើឲ្យអ្នកពន្លត់អគ្គីភ័យមានការប្រឈមមុខខ្ពស់ក្នុងការកើតជំងឺមហារីក។

ទោះបីជាយ៉ាងណាក្ដី ការសិក្សានេះមិនបានបង្ហាញថា មានការកើនឡើងហានីភ័យនៃជំងឺសួតនោះទេ ព្រោះថាជំងឺនេះ ត្រូវការពេលវេលាយូរដើម្បីអភិវឌ្ឍខ្លួន។

សូមបញ្ជាក់ផងដែរថា ក្រុមអ្នកពន្លត់អគ្គីភ័យជាច្រើននាក់ បានធ្វើការយ៉ាងសស្រាក់សស្រាំដើម្បីជួយសង្រ្គោះអគារពាណិជ្ជកម្មពិភពលោក ដែលត្រូវបានយន្តហោះពីរគ្រឿងហោះបុកកាលពីថ្ងៃទី ១១ ខែកញ្ញា ឆ្នាំ២០០១។ សារធាតុដែលជាភ្នាក់ងារចម្លងជំងឺមហារីក ដែលចេញពីការផ្ទុះឆេះនេះ រួមមាន polycyclic aromatic hydrocarbons, polychlorinated biphenyls និង dioxins។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕