ដំឡូង​ ជា​អាហារ​បញ្ចុះ​សម្ពាធ​ឈាម​ដ៏​ល្អ​​

ដំឡូងនៅកម្ពុជា

តាំងពីយូរណាស់មកហើយដំឡូង ត្រូវបានគេលើកឡើងថាជាអ្នកដែលបង្កឲ្យមានមនុស្សធាត់ជាច្រើននៅអាមេរិក និងនៅប្រទេសផ្សេងទៀត។ ពេលនេះការស្រាវជ្រាវថ្មី មួយ បានរកឃើញផ្ទុយពីការអះអាងដែលថា ដំឡូងធ្វើឲ្យធាត់ ឬទឹកនោមផ្អែម ដោយបានរកឃើញថា ការបរិភោគដំឡូងរៀងរាល់ថ្ងៃ អាចជួយបញ្ចុះសម្ពាធឈាមបានដោយមិនមានការឡើងទម្ងន់នោះទេ។

ការស្រាវជ្រាវដែលដឹកនាំដោយលោក Joe Vinson សាស្រ្ដាចារ្យមកពីសាកលវិទ្យាល័យ Scranton នៅ Pennsylvania សហរដ្ឋអាមេរិកនេះ បានបង្ហាញថា ការញ៉ាំដំឡូងជារៀងរាល់ថ្ងៃ អាចបញ្ចុះសម្ពាធឈាមដែលឡើង បានយ៉ាងសក្ដិសិទ្ធិ ព្រមទាំងគ្មានការឡើងទម្ងន់ទៀតផង។

ទោះបីជា ក្រុមអ្នកស្រាវជ្រាវទាំងនេះបានប្រើប្រាស់ដំឡូងពណ៌ស្វាយ ដើម្បីធ្វើការសិក្សាក៏ដោយ ក៏ពួកគាត់បានអះអាងថា ដំឡូងប្រភេទផ្សេងទៀត ក៏មានប្រសិទ្ធភាពដូចគ្នាដែរ។

នៅក្នុងការសិក្សានេះ គេបានយកដំឡូងទៅចម្អិនដោយគ្មានប្រើប្រេង ឬគ្រឿងអ្វីផ្សេងលាយជាមួយនោះទេ ដែលធ្វើឲ្យគេរកឃើញថា តាមពិតទៅដំឡូងមិនមែនជាអាហារដែលមានកាឡូរីខ្ពស់នោះទេ គឺប្រសិនបើយើងមិនយកទៅបំពងក្នុងខ្លាញ់នោះទេ ដំឡូងមួយមានតែ ១១០កាឡូរីប៉ុណ្ណោះ ព្រមទាំងមានសារធាតុសំខាន់ៗចំពោះសុខភាពជាច្រើន រួមទាំងវីតាមីនផងដែរ។

លោកវេជ្ជបណ្ឌិត Vinson បានបន្តទៀតថា ដំឡូងបានបាត់បង់នូវសារជាតិដ៏ល្អរបស់វា នៅពេលដែលគេយកទៅចម្អិនដោយកម្ដៅខ្ពស់ ដូចជាការបំពង ឬចៀនជាដើម។

លទ្ធផលនៃការស្រាវជ្រាវបានធ្វើឲ្យមានការភ្ញាក់ផ្អើលផងដែរ ដោយសារតែអ្នកដែលចូលរួមក្នុងការស្រាវជ្រាវទាំងអស់ មិនមានអ្នកណាម្នាក់ឡើងទម្ងន់ដោយសារញ៉ាំដំឡូងនោះទេ។ ដូច្នេះក្រោយពីមានការស្រាវជ្រាវនេះ ដំឡូងអាចនឹងកើនប្រជាប្រិយភាពរបស់ខ្លួនជាក់ជាមិនខាននោះទេ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕