អ្នកណាត្រូវចេញលុយនៅថ្ងៃណាត់ជួបដំបូង?

ការណាត់ជួបដំបូង

អ្នកទាំងអស់គ្នាដឹងហើយថា សម័យនេះគឺជាសម័យដែល ប្រុស និងស្រីមានសិទ្ធស្មើគ្នាទាំងអស់។ បើដូច្នេះមែន តើអ្នកណានឹងត្រូវចេញលុយ ដែលភាសាសាម័ញ្ញថាប៉ាវ នៅថ្ងៃណាត់ជួបគ្នាជាលើកទីមួយនោះ? យោងតាមការស្ទង់មតិមួយដែលចេញផ្សាយកាលពីម្សិលមិញនេះ បានឲ្យដឹងថា ស្រ្ដីជនជាតិអង់គ្លេសច្រើនជាងពាក់កណ្ដាលបានឆ្លើយថា ពួកគេបានចំណាយលុយសម្រាប់ខ្លួនពួកគេផ្ទាល់នៅថ្ងៃណាត់ជួបដំបូង តែទោះយ៉ាងណាក្ដីក៏បុរសនៅតែទទូចចង់ចេញលុយទាំងអស់ដដែល។

ការបោះឆ្នោតស្ទង់មតិនេះ ធ្វើឡើយនៅអង់គ្លេស ដោយមានការចូលរួមពីមនុស្សពេញវ័យចំនួន ១៩២៤នាក់។ ជាលទ្ធផលបានឲ្យដឹងថា មានស្រ្ដីប្រមាណ ៥៨ភាគរយឆ្លើយថា

ពួកគេចង់ចែកគ្នាចេញលុយ ខណៈដែលមានបុរសតែ ២៨ភាគរយប៉ុណ្ណោះដែលឆ្លើយបែបនេះ។

ចំណែកឯស្រ្ដី ១៤ភាគរយទៀតបានឆ្លើយថា ភាគីណាជាអ្នកផ្ដួចផ្ដើមការណាត់ជួប គឺជាអ្នកចេញលុយ។

មានតែស្រ្ដីប្រមាណ ២៥ភាគរយ ប៉ុណ្ណោះដែលបានឆ្លើយថា ភាគីបុរសគួរតែជាអ្នកចេញលុយនៅថ្ងៃណាត់ជួបដំបូង ខណៈដែលស្រ្ដីដែលនៅលសល់បីភាគរយទៀត និយាយថាស្រ្ដីគួរតែជាអ្នកចេញលុយទាំងអស់នៅថ្ងៃនោះ ព្រោះកុំឲ្យបុរសគិតថាពួកគេអន់។

ចំណែកឯភាគីបុរសក្រៅពីបុរស ២៨ភាគរយដែលចង់ចេញពាក់កណ្ដាលម្នាក់ដូចខាងលើនោះ គឺមាន៥៥ភាគរយបានឆ្លើយថាពូកគេចង់ចេញលុយទាំងអស់ តែម្នាក់ឯងនៅថ្ងៃណាត់ជួបលើកទីមួយនេះ។ នៅប្រទេសអង់គ្លេស គិតជាមធ្យម បុរសចំណាយប្រាក់អស់ ៦៥ផោន (១០៤ដុល្លារអាមេរិក) ខណៈដែលស្រ្ដីចំណាយអស់ ៥០ផោន ក្នុងថ្ងៃណាត់ជួបដំបូងរបស់ពួកគេ។

តាមការស្ទង់មតិដដែលក៏បានឲ្យដឹងទៀតថា មិនត្រឹមតែភាគីបុរសចង់ចេញលុយច្រើននោះទេ សូម្បីតែការរៀបចំ និងការផ្ដួចផ្ដើមគំនិតក៏ជាការទទួលខុសត្រូវរបស់ភាគីបុរសដែរ។ ក្នុងនោះបុរស៩នាក់ក្នុងចំណោម ១០នាក់ (៩៤ភាគរយ) បានឆ្លើយថាពួកគេជាអ្នករៀបចំនូវការណាត់ជួបលើកទីមួយរបស់ពួកគេ ខណៈដែលមានស្រ្ដីចំនួន ៦៥ភាគរយឆ្លើយថាពួកគេជាអ្នករៀបចំ។

យ៉ាងណាមិញ ការចំណាយក៏ត្រូវបានត្បិតត្បៀតពីភាគីទាំងសងខាងផងដែរ។ ក្នុងចំណោមអ្នកឆ្លើយទាំងប្រុសទាំងស្រី មាន៣៨ភាគរយ (ប្រុស ៤១%, ស្រី៣៦%)បានឆ្លើយថា ពួកគេបានចូលកន្លែងណាដែលពួកគេមានប័ណ្ឌបញ្ចុះតម្លៃ។

ប្រិយមិត្តរបស់ខ្មែរសារិកាទាំងអស់ ក៏អាចចែករំលែកបទពិសោធន៍របស់ខ្លួនផងដែរចំពោះប្រធានបទមួយនេះ។ តើអ្នកគិតថា ការចេញលុយទាំងអស់ ការចេញទាំងពីរនាក់ និងការឲ្យគេចេញទាំងអស់មួយណាដែលអ្នកចង់បាន? ទទួលយករាល់មតិយោបល់ទាំងអស់ដោយរីករាយ!

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕