អ្នកណាៗក៏ដឹងដែរថា ការជក់បារី បណ្ដាលឲ្យប៉ះពាល់ដល់សុខភាព ប៉ុន្ដែមិនមានអ្នកណាដឹងថា ស្រ្ដី ឬ បុរសទេ ដែលគ្រោះថ្នាក់ជាង។ យោងតាមលទ្ធផលនៃការសិក្សាថ្មីមួយ បានបង្ហាញថា ស្រ្ដីដែលជក់បារី មានអត្រាគ្រោះថ្នាក់ខ្លាំងជាងបុរស ២៥ភាគរយ ក្នុងការប្រឈមមុខនឹងហានីភ័យនៃជំងឺបេះដូង។
លើសពីនេះទៀត ទោះបីជាស្រ្ដីជក់បារីប្រចាំថ្ងៃតិចជាងបុរសក៏ដោយ ក៏អត្រានៃការកើតជំងឺបេះដូង មានច្រើនជាងបុរសដែរ។
ដើម្បីរកឲ្យឃើញថាតើស្រ្ដី ឬបុរសដែលមានផលអាក្រក់ខ្លាំងជាងនេះ ក្រុមអ្នកស្រាវជ្រាវដែលមកពីសាកលវិទ្យាល័យមីនីសូតា និងចន ហបគីន នៃសហរដ្ឋអាមេរិក បានធ្វើការសិក្សាទៅលើការស្រាវជ្រាវមុនៗចំនួន៨៦ គ្របដណ្ដប់លើមនុស្សជាង ៤លាននាក់។
ក្នុងចំណោមការស្រាវជ្រាវទាំង៨៦នោះ មានការស្រាវជ្រាវចំនួន ៧៥ បានធ្វើការសិក្សាទៅលើហានីភ័យនៃជំងឺបេះដូង និងជំងឺសរសៃឈាមក្រហម។ អ្នកដែលកើតជំងឺគាំងបេះដូង មានចំនួន ៤៤០០០នាក់ ដែលក្នុងនោះស្រ្ដីដែលជក់បារី មានអត្រាខ្ពស់ជាងបុរសដែលជក់បារី ចំនួន ២៥ភាគរយ។
លោក Rachel Huxley មកពីសាកលវិទ្យាល័យមីនីសូតា បានថ្លែងថា កាលពីមុនយើងទាំងអស់គ្នាបានសន្មតថា ការជក់បារីគឺមានគ្រោះថ្នាក់ និងផលប៉ះពាល់ស្មើគ្នារវាងបុរស និងស្រ្ដី ប៉ុន្ដែបើតាមការសិក្សាថ្មីនេះ បានបង្ហាញថា ស្រ្ដីដែលជក់បារី មានហានីភ័យខ្ពស់ជាងបុរស ជាពិសេសគឺការកើតជំងឺគាំងបេះដូង។
លទ្ធផលនៃការសិក្សាស្រាវជ្រាវនេះ ត្រូវបានបោះពុម្ភផ្សាយនៅក្នុងព្រឹត្តបត្រសុខភាព The Lancet ។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment