មនុស្ស​កាន់​តែ​ច្រើន​កើត​ជំងឺ​គេង​មិន​លក់​!

ការសិក្សាថ្មីមួយបានបង្ហាញថា មនុស្សច្រើនជាងពាក់កណ្ដាល បានជួបប្រទះនឹងបញ្ហាគេងមិនលក់ ដែលនេះគឺជាការព្រមានថ្មីមួយ ដោយសារតែការគេងមិនលក់នេះ បានបង្កឲ្យមានផលប៉ះពាល់សុខភាពជាច្រើន។

អ្នកជំនាញខាងការគេង គឺលោកសាស្រ្ដាចារ្យ Colin Espie មកពីសាកលវិទ្យាល័យ Glasgow រួមនឹងសហការីរបស់លោក បានធ្វើការសម្ភាសន៍មនុស្សពេញវ័យចំនួន១២០០នាក់នៅចក្រភពអង់គ្លេស ទាក់ទងនឹងការគេង។

អ្នកជំនាញរូបនេះ បាននិយាយថា ជំងឺគេងមិនលក់ បានប៉ះពាល់ដល់គុណភាពជីវិតរបស់មនុស្សម្នាក់ៗ នៅកំឡុងពេលថ្ងៃ មិនមែនប៉ះពាល់តែកំឡុងពេលយប់នោះទេ។ ប្រសិនបើយើងគេងមិនគ្រប់គ្រាន់ នោះសុខភាពយើងក៏អន់ថយទៅតាមនោះដែរ។

នៅក្នុងការស្រាវជ្រាវនេះ គេបានរកឃើញថា មនុស្សពេញវ័យដល់ទៅ៥១ភាគរយ បានកើតជំងឺគេងមិនលក់ ទោះបីជាប្រឹងគេងយ៉ាងណាក៏ដោយ។ ក្នុងនោះដែរ ស្រ្ដីគឺជាអ្នករងគ្រោះខ្លាំងជាងបុរស ពោលគឺមានអត្រាដល់ទៅ ៧៥ភាគរយ ចំពោះការគេងមិនលក់ ខណៈដែលបុរសមានតែ២៥ភាគរយប៉ុណ្ណោះ ។

លទ្ធផលនៃការស្រាវជ្រាវនេះក៏បានបង្ហាញដែរថា ៥៥ភាគរយនៃអ្នកគេងមិនលក់នោះ បានបណ្ដាលឲ្យបែកបាក់ទំនាក់ទំនងស្នេហា, ៦៤ភាគរយធ្វើការមិនសូវបានល្អ ៨៣ភាគរយមានបញ្ហាខួរក្បាល និង៩៣ភាគរយមិនសូវមានកម្លាំងក្នុងខ្លួន។

ការសិក្សាផ្សេងទៀត ក៏បានរកឃើញស្រដៀងគ្នានេះដែរ ពោលគឺមានមនុស្សដល់ទៅ ៧០ភាគរយកើតជំងឺគេងមិនលក់ ដោយ៥៧ភាគរយគេងមិនលក់ ដោយសារតែព្រួយបារម្ភពីបញ្ហាការងារ និងលុយកាក់។

លទ្ធផលក៏បានបង្ហាញទៀតថា ក្នុងចំណោមអ្នកគេងមិនលក់ទាំងនោះ ១០ភាគរយបានងើបមកឆែកអ៊ីម៊ែល ៦ភាគរយដាស់ដៃគូដែលគេងជាមួយ ២៦ភាគរយបើកចម្រៀងស្ដាប់ និង១៨ភាគរយរួមភេទ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕