ការសិក្សារៀនសូត្រគឺមានសារៈសំខាន់ណាស់ព្រោះនៅពេលបញ្ចប់ការសិក្សាមនុស្សយើងម្នាក់សង្ឃឹមថានឹងបានធ្វើការងារមួយដែលអាចរកប្រាក់បានដើម្បីចិញ្ចឹមខ្លួនឯងផងនឹងគ្រួសារផង។ តែអ្វីដែលអ្នកមិនដឹងនោះគឺ ពិភពនៃការសិក្សា និងពិភពនៃការងារគឺវាមិនដូចគ្នាទាំងស្រុងនោះទេ ហើយមិនប្រាកដថាឲ្យតែអ្នកដែលបានបញ្ចប់ការសិក្សាសុទ្ធតែអាចរកការងារធ្វើបានទាំងអស់នោះទេ។ អ្នកខ្លះនៅពេលបញ្ចប់ការសិក្សាភ្លាម ក៏រកការងារបានភ្លាម តែចំណែកអ្នកខ្លះទៀតនៅពេលបញ្ចប់ការសិក្សាហើយ នៅតែមិនអាចរកងារបានធ្វើនឹងគេដដែល។ ភាពអត់ការងារធ្វើមិនបញ្ជាក់ថាអ្នកនោះគ្មានសមត្ថភាពក្នុងការធ្វើការងារនោះទេ នេះប្រហែលជាមកពីអ្នកនោះគ្មានឱកាស ឬក៏មិនចេះក្តាប់ឱកាសការងារ។ ហើយភាពគ្មានការងារនេះជាចំណុចចាប់ផ្តើមនៃការបរាជ័យដទៃទៀតនៅក្នុងជីវិតរបស់អ្នក។ដើម្បីជៀសឲ្យផុតពីភាពអត់ការងារធ្វើបន្ទាប់ពីរៀនចប់ យើងជាសិស្សដែលរៀននៅមហាវិទ្យាល័យមួយ មិនថាកូនអ្នកមាន ឬក៏កូនអ្នកក្រនោះទេ គឺត្រូវស្វះស្វែងរកការងារធ្វើក្រៅម៉ោងខណៈពេលដែលយើងកំពុងតែសិក្សានៅមហាវិទ្យាល័យនៅទ្បើយ ព្រោះថាធ្វើបែបនេះវាជួយឲ្យយើងយល់ដឹងពីពិភពនៃការសិក្សាផង និងពិភពនៃការងារខាងក្រៅផង។ ម្យ៉ាងទៀតធ្វើការងារធ្វើឲ្យយើងស្គាល់មនុស្សច្រើន កាលណាយើងស្គាល់គេច្រើន ឱកាសការងារក៏មានច្រើនដែរសម្រាប់យើងម្នាក់ៗ។
ខាងក្រោមនេះជាការងារទាំងប្រាំសម្រាប់សិស្សដែលកំពុងតែសិក្សានៅមហាវិទ្យាល័យ៖
សូមបញ្ជាក់ថា ការងារទាំងនេះសម្រាប់តែសិស្សរៀនជំនាញមួយតែប៉ុណ្ណោះ ចំពោះសិស្សដែលរៀននៅពីរមហាវិទ្យាល័យ មិនគួរធ្វើការងារដែលបានរៀបរាប់ទាំងនេះទេ ព្រោះថារៀនពីរមហាវិទ្យាល័យគ្មានពេលទំនេរទៅធ្វើការងារទេ។
ការងារទីមួយ ធ្វើជាអ្នកលក់របស់របរផ្សេងៗនៅក្នុងហាង។ ការងារនេះភាគច្រើនសម្រាប់សិស្សនារី ហើយវាមិនមានភាពសាំញុំាទេ ហើយក៏មិនហត់ដែរ ចំណែកឯប្រាក់កំរៃក៏បានគួរសមដែរ។ សិស្សនារីអាចរកការងារនេះធ្វើនៅតាមហាង ទំនើប ឬក៏តាម ម៉ាតតូចៗ ហើយអ្នកអាចធ្វើការម៉ោងណាក៏បានព្រោះថាម៉ាតមួយចំនួនគេបើក ២៤ម៉ោងក្នុងមួយថ្ងៃ។ ប្រសិនបើអ្នករៀនថ្ងៃអ្នក អាចធ្វើការពេលយប់ ឬក៏ពេលព្រឹកក៏បាន។ សិស្សនារីៗអាចធ្វើជាអ្នកលក់ខោអាវក៏បាន ឬក៏លក់ស្បែកជើងក៏បាន។
ការងារទីពីរ ធ្វើការងារនៅតាមអង្គការផ្សេងៗ។ មានអង្គការជាច្រើនដែលទទួលអ្នកស្ម័គចិត្តធ្វើការបម្រើ សង្គម ក្មេងកំព្រា និងជនគ្មានទីពឹង។ ការងារប្រភេទនេះគឺល្អខ្លាំងណាស់ព្រោះថា អ្នកអាចសិក្សាពីសង្គមបានច្រើន។ ទោះពេលខ្លះយើងមិនទទួលបានប្រាក់កំរៃពីអង្គការនោះ ក៏ដោយ ក៏យើងទទួលបានបទពិសោធន៍ដែរ។ បទពិសោធន៍វាល្អណាស់សម្រាប់ដាក់រកការងារធ្វើលើកក្រោយទៀត។ ការងារមួយនេះ សិស្សស្រីក៏ធ្វើបាន ហើយសិស្សប្រុសក៏ធ្វើបានដែរ អ្វីដែលសំខាន់នោះគឺត្រូវមានការអត់ធ្មត់។
ការងារទីបី ធ្វើជាអ្នកទទួលភ្ញៀវ ឬក៏ជាអ្នកបំរើតាមភោជនីដ្នានជាដើម។ ការងារនេះសិស្សភាគច្រើនមិនចង់ធ្វើទេ ព្រោះថាសិស្សខ្លះអាចមានអារម្មណ៍ខ្មាស់អៀនដោយសារតែមនុស្សនៅប្រទេសយើងភាគច្រើនមិនឲ្យតំលៃលើការងារប្រភេទនេះ ហើយវាទទួលបានប្រាក់កំរៃក៏តិចដែរ។ តែសម្រាប់សិស្សមួយចំនួនដែលត្រូវការលុយ ហើយមិនចង់ឲ្យខ្លួននៅទំនេរអាចជ្រើសរើសយកការងារនេះធ្វើបាន។ វាអាចជាចំណុចចាប់ផ្តើមដើម្បីឈានជើងរកងារផ្សេងទៀតធ្វើបាន។ ការងារនេះវាពិបាកហើយនឿហត់បន្តិចតែប្រសិនបើបានធ្វើការងារបែបនេះ នោះអ្នកនឹងយល់ពីអត្ថន័យនៃជីវិតបានច្រើន។
ការងារទីបួន ធ្វើការនៅពេលរាត្រីនៅតាម ក្លឹប ឬរង្គសាលជាដើម។ នៅទីនោះអ្នកអាចក្លាយ ជាអ្នកចម្រៀង ជាអ្នកក្រលុកស្រា ឬក៏ជាអ្នកលេងភ្លេង។ ការងារទាំងនេះតម្រូវឲ្យសិស្សដែលចង់ធ្វើការងារនេះមានជំនាញខ្លះៗដើម្បីអាចធ្វើការងារនេះបាន ហើយវាក៏ជាកញ្ចក់មួយសម្រាប់ឆ្លុះបញ្ជាំងពីចំណង់ចំណូលចិត្តរបស់អ្នក ថាតើអ្នកចង់ធ្វើអ្វីមួយឲ្យប្រាកដ។ ការងារប្រភេទនេះវាហត់ ហើយអត់ងងុយទៀតផង ហើយចំពោះអ្នកដែលធ្វើការងារនេះអាចប៉ះពាល់ដល់ការសិក្សាបន្តិច។
ការងារទីប្រាំ ធ្វើការងារឲ្យសាលា។ នៅតាមមហាវិទ្យាល័យនីមួយៗតែងតែមានការងារមួយចំនួនសម្រាប់សិស្សធ្វើជាមិនខាន មិនមែនជាការងារដែលសិស្សអាចរកលុយបានទេ គឺជាការងារដែលផ្តល់បទពិសោធន៍ដល់សិស្ស។ ការងារទាំងនោះមានដូចជា អ្នកអាចក្លាយជាបណ្ណរក្ស ឬក៏ក្លាយជាសមាជិកនៃគណកម្មការរៀបចំកម្មវិធីដែលគេបង្កើទ្បើងនៅក្នុងសាលានោះ។ ការងារនេះជួយឲ្យសិស្សយល់ដឹងច្រើនពីការធ្វើការងារជាក្រុម ហើយគេអាចរៀនសូត្រពីការទទួលខុសត្រូវនៃការងាររបស់គេដែលសាលាបានដាក់ឲ្យធ្វើ។
ការងារទាំង ៥ខាងលើនេះគឺល្អណាស់សម្រាប់សិស្សដែលកំពុងតែនៅក្នុងវ័យសិក្សានៅតាមមហាវិទ្យាល័យនានា។ ប្រសិនបើអ្នកធ្លាប់ធ្វើការនៅពេលដែលអ្នកកំពុងតែរៀនសូត្រ នោះនៅពេលអ្នករៀនចប់អ្នកមិនចាំបាច់បារម្ភពីកាពអត់ការងារធ្វើនោះទេ។ ព្រោះថាបើអ្នកមិនអាចរកការងារដែលអ្នកពេញចិត្តធ្វើក៏ដោយ ក៏អ្នកមានការងារផ្សេងធ្វើដែរ។ ហើយបើយើងមានការងារធ្វើហើយ ទោះការងារនោះល្អឬមិនល្អក្តី ក៏យើងមានក្តីសង្ឃឹមនៅក្នុងជិវិតដែរ ហើយនៅថ្ងៃណាមួយបំណងរបស់អ្នកពិតជាអាចក្លាយជាការពិតជាមិនខាន។
ការងារទាំងប្រាំនេះគ្រាន់តែជាការងារមួយចំនួនតែប៉ុណ្ណោះ សិស្សអាចរកការងារផ្សេងទៀតធ្វើ ទៅតាមចំណង់ចំណូលចិត្តរបស់ខ្លួន។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment