ក្រុមអ្នកស្រាវជ្រាវជនជាតិអាមេរិកាំងមួយក្រុមបានរកឃើញថា ការញ៉ាំស្រា ឬស្រាបៀ ក្នុងកម្រិតមួយតិចល្មម ត្រឹមមួយទៅពីរកែវ ក្នុងមួយថ្ងៃ អាចកាត់បន្ថយហានីភ័យនៃការកើតជំងឺទាក់ទងនឹងខួរក្បាល ដែលមានដូចជាជំងឺសរសៃប្រសាទជាដើម។អ្នកស្រាវជ្រាវដែលមកពីសាកលវិទ្យាល័យ Loyola University Chicago Stritch School of Medicin បានធ្វើការវិភាគទៅលើការសិក្សាចំនួន ១៤០ផ្សេងគ្នា ដែលធ្វើចាប់តាំងពីឆ្នាំ១៩៧៧មក ហើយមានការចូលរួមចំនួន ៣៦៥០០០នាក់ ហើយជាលទ្ធផលពួកអ្នកវិទ្យាសាស្រ្ដទាំងនេះ បានរកឃើញថា អ្នកដែលញ៉ាំគ្រឿងស្រវឹង ដែលមានដូចជាស្រា ឬស្រាបៀជាដើម មានអត្រាកើតជំងឺសរសៃប្រសាទ ឆ្កួតរវើរវាយ ទាបជាងគេ ២៣ភាគរយ។
ការញ៉ាំគ្រឿងស្រវឹង ដែលចាត់ទុកថា តិចល្មម គឺច្រើនបំផុតត្រឹម ២កែវក្នុងមួយថ្ងៃសម្រាប់បុរស និងមួយកែវសម្រាប់ស្រ្ដី។
មិនត្រឹមតែកាត់បន្ថយរោគទាក់ទងនឹងខួរក្បាលប៉ុណ្ណោះទេ ការសិក្សាផ្សេងទៀត ក៏បានរកឃើញពីសារៈប្រយោជន៍នៃការញ៉ាំស្រាតិចផងដែរ ដោយក្នុងនោះ អាចកាត់បន្ថយការកើតជំងឺបេះដូងជាដើម។តាមរយៈការស្រាវជ្រាវនេះ ក៏បានបញ្ជាក់ដែរថា ទោះបីជាមានប្រយោជន៍ដូចគ្នា ក៏ស្រាហាក់ដូចជាល្អជាងស្រាបៀ ប៉ុន្ដែការស្រាវជ្រាវផ្សេងទៀត មិនបានបញ្ជាក់ត្រង់ចំនុចនេះទេ។
ទោះបីជាយ៉ាងណាក៏ដោយ ប្រសិនបើអ្នកញាំស្រាច្រើនលើសកម្រិតនោះ (បី ទៅ៥កែវក្នុងមួយថ្ងៃ ឬលើសពីនេះ) អ្នកនឹងប្រឈមនឹងការកើតជំងឺសរសៃប្រសាទវិញ។
អ្នកដឹកនាំការស្រាវជ្រាវនេះ គឺលោក Neafsey និងលោក Michael A. Collins ហើយបានបោះពុម្ភនៅក្នុងព្រឹត្តបត្រ Neuropsychiatric Disease។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment