មើល​ទូរទស្សន៍​ច្រើន​ កាត់​បន្ថយ​អាយុ​

ការសិក្សាថ្មីមួយបានធ្វើការព្រមានថា ការមើលទូរទស្សន៍ច្រើនពេក អាចធ្វើឲ្យអ្នកមានអាយុខ្លី ពោលគឺអ្នកនឹងថយអាយុដល់ទៅ៥ឆ្នាំ។ មិនត្រឹមតែការសិក្សានេះទេ ដែលរកឃើញពីផលប៉ះពាល់ដោយសារការមើលទូរទស្សន៍ច្រើនពេកនោះ ការស្រាវជ្រាវមុនៗ ក៏បានបញ្ជាក់ពីផលប៉ះពាល់ចំពោះសុខភាពផងដែរ ដូចជា កើតជំងឺភ្នែក ជំងឺបេះដូង ទឹកនោមផ្អែម ក៏ដូចជាការធាត់លើសទម្ងន់។

ការសិក្សាថ្មីចុងក្រោយបំផុត ដែលរកឃើញពីការស្លាប់មុនអាយុដោយសារការមើលទូរទស្សន៍ច្រើននេះ បានធ្វើឡើងដោយក្រុមអ្នកស្រាវជ្រាវជនជាតិអូស្រ្ដាលី។ លោកវេជ្ជបណ្ឌិត J. Lennert Veerman មកពីសាកលវិទ្យាល័យ Queensland និងសហការីរបស់គាត់ បានរកឃើញថា ការមើលទូរទស្សន៍ពីមួយម៉ោងទៅមួយម៉ោង បានធ្វើឲ្យអាយុសង្ឃឹមរស់របស់មនុស្សធ្លាក់ចុះចំនួន២២នាទី សម្រាប់អ្នកដែលមានអាយុចាប់ពី២៥ឆ្នាំឡើងទៅ។

ក្រោយពីធ្វើការវិភាពទៅលើទិន្នន័យនៃជនជាតិអូស្រ្ដាលីរួចមក ក្រុមអ្នកស្រាវជ្រាវទាំងនេះ បានបញ្ចេញឲ្យដឹងថា ការមើលទូរទស្សន៍រយៈពេល ៦ម៉ោងជារៀងរាល់ថ្ងៃ អាចធ្វើឲ្យអ្នកថយអាយុអស់៥ឆ្នាំ។ ការអង្គុយមើលទូរទស្សន៍យូរៗបែបនេះ គឺមិនសូវខុសគ្នាពីការមិនហាត់ប្រាណ ការធាត់ជ្រុល និងការជក់បារីប៉ុន្មាននោះទេ។

ដើម្បីរកឲ្យឃើញលទ្ធផលបែបនេះ ក្រុមអ្នកស្រាវជ្រាវនេះ បានធ្វើការសិក្សាទៅលើទិន្នន័យនៃអ្នកចូលរួមចំនួន ១១២៤៧នាក់ ដែលមានអាយុលើស២៥ឆ្នាំ។ ជាលទ្ធផលគឺដូចអ្វីដែលបានបញ្ជាក់ខាងលើហើយ ពោលគឺមើលទូរទស្សន៍មួយម៉ោង កាត់បន្ថយអាយុ២២នាទី។ ហើយបើគណនាទៅ អ្នកដែលមើលទូរទស្សន៍ជាមធ្យម៦ម៉ោងក្នុងមួយថ្ងៃ នឹងត្រូវខាតអាយុអស់ជិត៥ឆ្នាំ បើប្រៀបធៀបជាមួយអ្នកដែលមិនមើលទូរទស្សន៍ច្រើន។

សរុបមកវិញ ប្រសិនបើអ្នកមានពេលទំនេរច្រើន គួរតែហាត់ប្រាណ ឬធ្វើសកម្មភាពនានា ជំនួសឲ្យការអង្គុយសំលឹងកញ្ចក់ទូរទស្សន៍វិញ ទើបប្រសើរ ព្រោះការហាត់ប្រាណមានប្រយោជន៍ច្រើនណាស់ ដូចអ្វីដែលខ្មែរសារិកាបានលើកយកនិយាយក្នុងពេលកន្លងមកនោះ (ហាត់ប្រាណ១៥នាទីបង្កើនអាយុបានបីឆ្នាំ)។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕