ក្រុមអ្នកស្រាវជ្រាវជនជាតិអាមេរិកាំងមួយក្រុមបាននិយាយកាលពីថ្ងៃអង្គារម្សិលមិញនេះថា ការរួមភេទអាចធ្វើឲ្យកើននួវគ្រោះថ្នាក់នៃជំងឺគាំងបេះដូង ជាពិសេសគឺចំពោះមនុស្សដែលមិនហាត់ប្រាណទៀងទាត់ជាប្រចាំ។លោកវេជ្ជបណ្ឌិត Issa Dahabreh មកពីមជ្ឈមណ្ឌលឱសថសាស្រ្ដ Tufts ក្នុងទីក្រុងបូស្ដុន បានឲ្យដឹងថា មានវេជ្ជបណ្ឌិតជាច្រើនបានដឹងតាំងពីយូរមកហើយថាសិចអាចធ្វើឲ្យមានបញ្ហាបេះដូងធ្ងន់ធ្ងរ ប៉ុន្ដែការសិក្សាថ្មីនេះ អាចជួយកំណត់នូវកម្រិតគ្រោះថ្នាក់នេះ។
ក្រុមអ្នកស្រាវជ្រាវដដែលនេះ បានធ្វើការវិភាគទិន្នន័យបានមកពីការស្រាវជ្រាវចំនួន១៤ ដែលសិក្សាអំពីទំនាក់ទំនងរវាងការហាត់ប្រាណ សិច និងជំងឺគាំងបេះដូង។ ពួកគេបានរកឃើញថា មនុស្សដែលកំពុងរួមភេទមានអត្រាជំងឺគាំងបេះដូងលើសអ្នកមិនកំពុងរួមភេទចំនួន ២,៧ដង។
អ្នកស្រាវជ្រាវម្នាក់ទៀតដែលមកពីមជ្ឈមណ្ឌល Tufts ដែរនោះ គឺអ្នកស្រី Jessica Paulus បាននិយាយដែរថា គ្រោះថ្នាក់គឺមានកម្រិតខ្ពស់ ប៉ុន្ដែរយៈពេលនៃគ្រោះថ្នាក់គឺមិនយូរទេ ពោលគឺត្រឹមរយៈពេល ១ ទៅ ២ម៉ោង កំឡុងពេលរួមភេទ និងក្រោយពេលរួមភេទ។
សាស្រ្ដាចារ្យ Paulus បានថ្លែងទៀតថា ប្រសិនបើមានមនុស្ស មួយម៉ឺននាក់បានរួមភេទក្នុងមួយសប្ដាហ៍ នោះវាអាចមានការស្លាប់ដោយសារជំងឺគាំងបេះដូង ១ទៅ២ករណីក្នុងមួយឆ្នាំ។
អ្នកស្រីក៏បានបញ្ជាក់ដែរថា វាមានសារៈសំខាន់ណាស់ក្នុងការហាត់ប្រាណជាប្រចាំ ព្រោះវាអាចកាត់បន្ថយហានីភ័យនៃជំងឺគាំងបេះដូងបានរហូតដល់ ៣០ភាគរយ។ អ្វីដែលគ្រោះថ្នាក់បំផុតនោះគឺការគិតថា ហាត់ប្រាណមិនល្អចំពោះសុខភាព។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment