ថ្នាំបំបាត់ការឈឺចាប់ធ្វើឲ្យលឹង្គ​ចុះ​ខ្សោយ​

បុរសដែលមានបញ្ហាសមត្ថភាពផ្លូវភេទ

យោងតាមការស្រាវជ្រាវថ្មីមួយបានឲ្យដឹងថាថ្នាំបំបាត់ការឈឺចាប់ពិតជាមានទំនាក់ទំនងជាមួយនឹងអសមត្ថភាពនៃលឹង្គ។

ក្រុមអ្នកស្រាវជ្រាវបានរកឃើញថា អ្នកប្រើប្រាស់ថ្នាំបំបាត់ការឈឺចាប់ដូចជា អាស្ពីរីនជាដើម នឹងមានអត្រា៣៨ភាគរយថយចុះសមត្ថភាពនៃលឹង្គ បើប្រៀបធៀបជាមួយអ្នកដែលមិនលេបថ្នាំនេះ។

លោកវេជ្ជបណ្ឌិត Joseph Gleason ដែលជាអ្នកជំនាញខាងផ្លូវភេទមកពីឡូសអ៊ែនជើលេស បានប្រាប់ថា ឱសថបំបាត់ការឈឺចាប់ទាំងនោះ បានទប់ស្កាត់អ័រម៉ូនម៉្យាងដែលធ្វើឲ្យលឹង្គរបស់មនុស្សប្រុសរឹង។ ដូច្នេះបើអ័រម៉ូនទាំងនោះឈប់ដំណើរការ នោះប្រដាប់ភេទរបស់បុរស មិនអាចមានរិទ្ធអំណាចអ្វីទៀតនោះទេ។

ប៉ុន្ដែលោកវេជ្ជបណ្ឌិតរូបនេះ ក៏បាននិយាយថាលទ្ធផលនៃការស្រាវជ្រាវរបស់គាត់នេះ មិនបានបង្ហាញថាឱសថបំបាត់ការឈឺចាប់ធ្វើឲ្យលឹង្គងាប់នោះទេ។ គាត់បានបន្ថែមថា អាចមានកត្តាផ្សេងទៀត ដែលគាត់ និងសហសេវិករបស់គាត់មិនទាន់បានរកឃើញ។

យ៉ាងណាក៏ដោយ ក៏គេសង្កេតឃើញមានបុរសជាច្រើនបានលេបថ្នាំអាស្ពីរីន ជាពិសេសគឺអ្នកដែលមានជម្ងឺបេះដូង ដែលនេះនឹងអាចប៉ះពាល់ដល់លឹង្គរបស់ពួកគេផងដែរ។

ចំណែកឯលោកវេជ្ជបណ្ឌិត Brant Inman មកពីសាកលវិទ្យាល័យ North Carolina ដែលមិនបានចូលរួមក្នុងការស្រាវជ្រាវនេះ បាននិយាយប្រាប់ផងដែរថា សរសៃឈាមនៅក្នុងប្រដាប់ភេទរបស់មនុស្សប្រុស តូចជាងសរសៃឈាមនៅក្នុងបេះដូង ដូច្នេះវាងាយស្រួលក្នុងការត្រូវបានគេរារាំងណាស់។ ប្រសិនបើសរសៃឈាមណាមួយមិនដំណើរការ នោះវានឹងទប់ស្កាត់នូវឈាមដែលធ្វើឲ្យលឹង្គមានចលនា និងរឹងបាន។

យោងតាមវិទ្យាស្ថានជាតិសុខាភិបាលរបស់អាមេរិកវិញ បានឲ្យដឹងដែរថា បុរសម្នាក់ក្នុងចំណោម ១០០នាក់ដែលស្ថិតក្នុងវ័យ៤០ឆ្នាំឡើងមានអសុពលភាពនៃលឹង្គ ហើយបុរសដែលមានអាយុ ៧៥ឆ្នាំឡើងមានស្ទើរតែពាក់កណ្ដាល។

សម្រាប់ការស្រាវជ្រាវនេះវិញ លោកវេជ្ជបណ្ឌិត Gleason និងសមាជិកគាត់ដទៃទៀត បានធ្វើការវិភាគនូវកម្រងសំនូរដែលត្រូវបានចោទសួរបុរសចំនួន ៨១ម៉ឺននាក់ ចាប់ពីអាយុ ៤៥ ដល់ ៦៩ឆ្នាំ។

ជាលទ្ធផល មានបុរសពាក់កណ្ដាលក្នុងចំណោមនោះ បានឆ្លើយថា ពួកគេតែងតែលេបថ្នាំបំបាត់ការឈឺចាប់ជាប្រចាំ ពោលគឺយ៉ាងហោចណាស់ក៏ ៥ដងដែរក្នុងមួយសប្ដាហ៍។ ប្រមាណ ៦៤ភាគរយនៃអ្នកទាំងនេះ បានប្រាប់ទៀតថា លឹង្គរបស់ពួកគេមិនអាចប្រើប្រាស់បានទៀតនោះទេ។

ទោះបីជាលទ្ធផលបង្ហាញយ៉ាងដូច្នេះក៏ដោយ ក៏ក្រុមអ្នកជំនាញបានប្រាប់ដែរថា កុំមានការភ័យខ្លាចក្រោយពីអានអត្ថបទនេះឲ្យសោះ ព្រោះការស្រាវជ្រាវនេះមិនបានសាកល្បងដោយផ្ទាល់លើថ្នាំបំបាត់ការឈឺចាប់នោះទេ ដូច្នេះការបាត់បង់សមត្ថភាពរបស់លឹង្គ មិនប្រាកដថាមកពីថ្នាំនេះដែរ។ ការស្រាវជ្រាវថ្មីៗទៀតនឹងមាន ចំពោះបញ្ហានេះ។

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕