ទះកំភ្លៀង

រូបភាពពីហ្គូហ្គល

បុរសខាងបច្ចេកទេសម្នាក់ និងចៅហ្វាយរបស់គាត់មានបេសកកម្មទៅតាមខេត្តរយៈពេល ២ ទៅ ៣ ថ្ងៃ។ អ្នកទាំងពីរជ្រើសរើសការធ្វើដំណើរតាមរថភ្លើង។ នៅលើរថភ្លើង កៅអីដែលអ្នកទាំងពីរអង្គុយគឺនៅចន្លោះទល់មុខគ្នារវាងនារីដ៏ស្រស់ស្អាត់ម្នាក់ និងយាយរបស់នាង។ ក្នុងកំឡុងពេលធ្វើដំណើរ បុរសក្មេង និងនារីស្អាតបានចាប់អារម្មណ៍គ្នាទៅវិញទៅមក លុះរថភ្លើងធ្វើដំណើរដល់រូងក្រោមដីធ្វើឲ្យក្នុងបន្ទប់រថភ្លើងងងឹត មើលមិនឃើញគ្នាទៅវិញទៅមក។ បន្តិចក្រោយមក សំឡេងនៃការថើបបានឭឡើង ព្រមជាមួយសំឡេងទះកំភ្លៀងក៏ឭឡើងដំណាលគ្នាផងដែរ។

បន្ទាប់ពីរថភ្លើងបានឆ្លងកាត់រូងក្រោមដីរួច អ្នកទាំងបួនមើលឃើញគ្នាទៅវិញទៅមក ប៉ុន្តែអ្នកទាំងអស់គ្នាពុំបាននិយាយអ្វីទាំងអស់។ លោកយាយបានគិតខ្លួនគាត់ថា ប្រហែលជាបុរសក្មេងនោះបានធ្វើអំពើពុំគប្បីមកលើចៅស្រីរបស់គាត់ហើយមើលទៅ តែសំណាងល្អនាងបានទះកំភ្លៀងគាត់។ ចៅហ្វាយរបស់បុរសក្មេងនោះបានគិតថា ខ្ញុំមិនដឹងថា បុរសខាងបច្ចេកទេសក្មេងនេះហ៊ានថើបនាងដូច្នេះសោះ ប៉ុន្តែក្មេងស្រីនោះបានច្រឡំមកទះខ្ញុំវិញ។ នារីស្អាតបានគិតខ្លួនឯងថា ប៉ុន្តែខ្ញុំសង្ឃឹមថា យាយរបស់ខ្ញុំពុំបានទះកំភ្លៀងគាត់ទេ។

បុរសក្មេងនោះបានអង្គុយញញឹមយ៉ាងពេញចិត្ត ហើយគាត់គិតថា ជីវិតអី្វក៏ស្រស់បំព្រងម្លេះហ្ន! តើមានច្រើនដែរឬទេ បើមានបុរសម្នាក់បានថើបនារីស្អាតម្នាក់ ហើយទះកំភ្លៀងចៅហ្វាយរបស់គេក្នុងពេលតែមួយ៕

អស់លោកអ្នក ដែលកំពុងទស្សនាគេហទំព័រនេះជាទីគោរព:
អាន ខ្មែរជាគេហទំព័រដែលផ្តល់ពហុអត្ថប្រយោជន៍ និងលើកស្ទួយ ការប្រើប្រាស់អក្សរសាស្រ្តខ្មែរតាមប្រព័ន្ធអ៊ិនធើណែត។ យើងខ្ញុំនឹងខិតខំស្រាវជ្រាវបន្ថែមទៀត ដើម្បីឲ្យគេហទំព័រនេះកាន់តែមានប្រយោជន៍សម្រាប់មនុស្សទូទៅ ពិសេសបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ សូមចូលរួមបរិច្ឆាគធនធានទៅតាមកំលាំងសទ្ធាជ្រះថ្លា ដោយចុចលើប៊ូតុងDonateនៅខាងឆ្វេងដៃ ដើម្បីទ្រទ្រង់គេហទំព័រនេះឲ្យមានដំណើរការជារៀងរហូត។ សូមអរព្រះគុណ និងសូមអរគុណ៕