មនុស្សកំពុងខឹង
ការខឹង គឺជាអារម្មណ៍មិនល្អម្យ៉ាង ដ៏ពុះកញ្ជ្រោល ដែលកើតឡើងដោយសារសកម្មភាពអ្វីមួយដែលបង្កឡើងដោយមនុស្ស ឬអ្វីផ្សេងទៀត ហើយពេលខ្លះក៏អាចចេញពីអារម្មណ៍ស្រមើស្រមៃផងដែរ។
ប្រសិនបើអ្នកមិនអាចទប់អារម្មណ៍ខឹងមួយឆាវរបស់អ្នកបាន រហូតឈានដល់ការប្រើអំពើហិង្សា ឬបោកប្រាស់របស់របរដែលនៅជុំវិញខ្លួន នោះហើយគឺជាផលអាក្រក់នៃការខឹង។ ចំណុចមិនល្អមួយទៀតនៃការខឹង គឺវាបានប៉ះពាល់ដល់សុខភាពយ៉ាងធ្ងន់ធ្ងរ ប៉ះពាល់ដល់ការងារ ការរកស៊ី ទំនាក់ទំនងផ្ទាល់ខ្លួន ក៏ដូចជាបាត់បង់នូវគុណភាពនៃជីវិតផងដែរ។
បើការខឹង ពិតជាមានផលមិនល្អច្រើនដូចខាងលើនេះមែន តើយើងត្រូវធ្វើយ៉ាងណាដើម្បីទប់ទល់ ឬគ្រប់គ្រងអារម្មណ៍ខឹង ប្រៀបបានទឹកពុះ១០០អង្សានេះបាន? ចម្លើយគឺមានដូចខាងក្រោម ៖
១- រាប់ឲ្យបានដល់១០
ប្រសិនបើទទួលអារម្មណ៍ខឹងក្រេវក្រោធនៅពេលណាមួយនោះ អ្នកត្រូវចាប់ផ្ដើមដោយការដកដង្ហើមវែងៗ មួយៗ ហើយរាប់រហូតដល់ ១០។ បើស្ដាប់មើលទៅ ដូចជារាងចម្លែកបន្ដិច ប៉ុន្ដែវាគឺជាវិធីទប់កំហឹងមួយដ៏ល្អប្រសើរដែលណែនាំដោយអ្នកជំនាញ ហើយវាក៏ជាវិធីសាស្រ្ដមួយដ៏ពេញនិយមផងដែរ ដែលអាចជួយបញ្ចុះកម្រិតនៃការខឹងបានមួយផ្នែកធំ។ ការរាប់ គឺអាចជួយឲ្យអ្នកត្រជាក់ចិត្ត ហើយនឹងនាំអ្នកឲ្យគិតសារជាថ្មី ពោលគឺមិនមែនខឹងដោយឥតហេតុផល។
២- ញ៉ាំទឹកត្រជាក់
ការញ៉ាំទឹកត្រជាក់មួយកែវ គឺពិតជាអាចជួយឲ្យអ្នកកាត់បន្ថយការខឹងបាន ដោយវាបាននាំយកភាពត្រជាក់ទៅក្នុងអារម្មណ៍ដែលកំពុងតែពុះយ៉ាងក្ដៅគគុកនៅក្នុងខ្លួនលោកអ្នក។ សូមចងចាំថា ទឹកត្រជាក់ មិនត្រឹមតែធ្វើឲ្យខ្លួនអ្នកត្រជាក់នោះទេ ក៏វាអាចធ្វើឲ្យអារម្មណ៍របស់លោកអ្នកត្រជាក់ផងដែរ ទោះមិនត្រជាក់ទាំងស្រុង ក៏អាចកាត់បន្ថយបានភាគច្រើនដែរ។
៣- ផ្ដោតលើអ្វីដែលវិជ្ជមាន
នៅពេលដែលអារម្មណ៍ខឹង បានកើនឡើងខ្លាំងទៅៗនោះ អ្នកត្រូវផ្ដោតទៅលើអ្វីដែលវិជ្ជមាន។ ការគិតក្នុងផ្លូវវិជ្ជមាន ឬធ្វើអ្វីដែលវិជ្ជមាន អាចធ្វើឲ្យអ្នកមានអារម្មណ៍សប្បាយរីករាយ ភ្លេចអស់នូវកំហឹងក្នុងខ្លួនអ្នក។ អ្នកអាចលេងជាមួយកូនៗជាទីស្រលាញ់របស់អ្នកប្រសិនបើមាន ឬស្ដាប់ចម្រៀងដែលអ្នកពេញចិត្ត ក៏ដូចជាមើលខ្សែភាពយន្ត និងសកម្មភាពផ្សេងទៀត ដែលអ្នកចូលចិត្តធ្វើ ព្រោះវាអាចជួយធ្វើឲ្យកំហឹងក្នុងខ្លួនអ្នកចាកចេញទៅ និងធ្វើឲ្យអ្នកមានអារម្មណ៍ស្រស់ស្រាយ។
៤- រកពេលស្ងប់ស្ងាត់ម្នាក់ឯង
ប្រសិនបើការសន្ទនារបស់អ្នកជាមួយនឹងអ្នកណាម្នាក់ ធ្វើឲ្យអ្នកខឹងដាច់ក្បាលដាច់កន្ទុយនោះ អ្នកមិនត្រូវឆ្លើយតបវិញនោះទេ។ អ្នកត្រូវចំណាយពេលនៅឲ្យឆ្ងាយពីហេតុការណ៍នោះ និងសម្រាកម្នាក់ឯងដោយស្ងៀមស្ងាត់ ដើម្បីពន្លត់នូវអារម្មណ៍ខឹង ដែលកំពុងឆេះសន្ធោសន្ធៅនោះ។
៥- ហាត់ប្រាណ
ការបញ្ចេញសកម្មភាពផ្នែកផ្លូវកាយ ពោលគឺការហាត់ប្រាណ ក៏អាចជួយឲ្យអ្នកបញ្ចុះកំហឹងបានដែរ។ អ្នកអាចដើរ ឬរត់យឺតៗ ក៏បានដែរ ព្រោះវាអាចបំលែងការខឹង ទៅជាសកម្មភាពនៃការហាត់ប្រាណ។ ការហាត់ប្រាណជាប្រចាំ អាចជួយបណ្ដុះបណ្ដាលរាងកាយ និងអារម្មណ៍របស់អ្នក ឲ្យឆ្លើយតបនូវអ្វីដែលកើតឡើងជុំវិញខ្លួនបានល្អ ដោយមិនយកកំហឹងទល់កំហល់។
សរុបមកវិញ ខាងលើនេះ គឺជាវិធីមួយចំនួនដែលលោកអ្នកអាចយកមកប្រើបានពេលដែលអ្នកជួបប្រទះនូវអារម្មណ៍ខឹងអ្វីមួយ ហើយត្រូវចងចាំនូវពាក្យចាស់មួយឃ្លា ដែលបានលើកឡើងថា "ខឹងខុស ខឹងខាត ខឹងខូច"។|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment