មានបុរសពីរនាក់ដែលមានឈ្មោះថា អាម៉ាប់ និងអាឆ្អឹង កំពុងតែអង្គុយផឹកស្រានៅក្នុងតូបលក់ស្រាមួយ។ ប៉ុន្មាននាទីក្រោយមកភ្លៀងក៏ចាប់ផ្តើមធ្លាក់យ៉ាងខ្លាំងនៅខាងក្រៅតូបស្រា។អាម៉ាប់៖ ផឹកស្រាស្តាប់ទឹកភ្លៀងបានវារ៉ូមែនទិច មិនថាអីចឹងអាឆ្អឹង។
អាឆ្អឹង៖ រ៉ូមែនទិចមែន តែអញឆ្ងល់ហេតុអ្វីបានជាអញផឹកស្រាចេះតែស្គមទៅៗ តែឯងផឹកកាន់តែធាត់ទៅៗ?
អាម៉ាប់៖ ស្គមល្អជាងធាត់ណា អាឆ្អឹង។ ថ្ងៃមុនយើងបានអានកាសែត គេប្រាប់ថា មនុស្សស្គមរស់នៅបានយូរជាងមនុស្សធាត់ ហើយអត់សូវជាមានជំងឺរាំរ៉ៃទេ តែបើឈើម្តងគឺឆាប់ងាប់ជាងអ្នកធាត់។
អាឆ្អឹង៖ កុំយកសេចក្តីស្លាប់មកនិយាយជាមួយនឹងយើង។
ផឹកបានប្រហែលជាពីរ បីថូស្រាប់តែប្រពន្ធអាឆ្អឹងទូរសព្ទហៅអាឆ្អឹងឲ្យវាត្រលប់ទៅផ្ទះវិញ ព្រោះថាភ្លៀងធ្លាក់ខ្លាំង ឲ្យមកជួយទុបទឹកកុំឲ្យទឹកលិចចូលផ្ទះ។ អាឆ្អឹងមិនហ៊ានទៅទេ ព្រោះថាខ្លាញរន្ទះបាញ់។
អាម៉ាប់ឮដូចនេះក៏ទាញទូរសព្ទពីអាឆ្អឹងហើយនិយាយជាមួយប្រពន្ធអាឆ្អឹងថា កុំបារម្ភវាទៅដល់ផ្ទះឥទ្បូវហើយ។
អាឆ្អឹង៖ ឯងស្រវឹងហើយអាម៉ាប់ អញមិនដើរទៅផ្ទះនៅពេលមានភ្លៀង ផ្គររន្ទះបែបនេះទេ។
អាម៉ាប់៖ ឯងកុំបារម្ភ អញហ៊ានធានាថាគ្មានរន្ទះបាញ់ទេ។
អាឆ្អឹង៖ ឯងហ្នឹងជាព្រះ ឬអា ម៉ាប់?
អាម៉ាប់៖ ថ្ងៃមុនយើងបានអានកាសែត គេប្រាប់ថា នៅតំបន់យើងនេះ រន្ទះបាញ់បាញ់ សម្លាប់មនុស្សមួយនាក់ជារៀងរាល់ឆ្នាំ នេះបើតាម ស្ថិតិ ដែលគេបានទទួលមក។
អាឆ្អឹង៖ អើម្នាក់នឹង អាចជាយើងក៏ថាបាន។
អាម៉ាប់៖ អត់ទេ សប្តាហ៍មុននេះអញអានកាសែត មានមនុស្សម្នាក់នៅក្នុងភូមិយើងនេះបានស្លាប់ដោយសាររន្ទះបាញ់រូចហើយ ដូចនេះឆ្នាំនេះអស់អ្នកងាប់ដោយសារតែរន្ទះបាញ់ទៀតហើយ។
អាឆ្អឹង៖ អញជឿឯងម្តងចុះ។
ពីរនាក់វានាំគ្នាដើរចេញពីតូបស្រាប្រហែលជាបាន ៥ជំហាន ក៏ស្រាប់តែមានរន្ទះបាញ់ផូងៗពេញផ្ទៃមេឃ។
អាឆ្អឹង៖ ឯងប្រាកដហើយថាអាម្នាក់ដែលត្រូវរន្ទះបាញ់ វាងាប់បាត់ហើយ?
អាម៉ាប់៖ អញធានា។
ពួកវាក៏បន្តដំណើរទៅមុខទៀត តែរំពេចនោះក៏មានរនទះបាញ់ បាញ់កាន់តែខ្លាំងទ្បើងៗ ហើយនៅក្បែរពួកវាទៀតផង។ អាម៉ាប់ អត់មានគិតយូរទេស្រាប់តែ រត់ចូលក្នុងតូបលក់ស្រាវិញយ៉ាងប្រញ៉ាប់។
អាឆ្អឹង៖ ចុះឯងថាធានាថាគ្មានរន្ទះបាញ់សម្លាប់មនុស្សទេ?
អាម៉ាប់៖ អញភ្លេចប្រាប់ឯងថា កាសែតនោះបានសរសេរថា នៅឆ្នាំខ្លះមានមនុស្សពីរនាក់ស្លាប់ដោយសារតែរន្ទះបាញ់ ប៉ុន្តែអាអ្នកសរសេរ វាមិនបានប្រាប់ថាឆ្នាំណាឲ្យប្រាកដនោះទេ។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment