នេះប្រហែលជាព័ត៌មានល្អសម្រាប់អ្នកដែលចូលចិត្តស្រាក៏ថាបាន ព្រោះការស្រាវជ្រាវថ្មីមួយ បានរកឃើញថា ការផឹកស្រា អាចការពារអ្នកពីជំងឺមហារីកស្បែកបាន។តាមពិតទៅ ការញ៉ាំស្រាដែលតិចល្មម ត្រូវបានគេរកឃើញថាមានប្រយោជន៍ចំពោះសុខភាពជាយូរមកហើយ ដូចជាការពារកូឡេស្ទេរ៉ូលដែលអាក្រក់ និងបញ្ហាជំងឺបេះដូងជាដើម។ រឹតតែពិសេសជាងនេះទៀត ការស្រាវជ្រាវមួយក៏បានរកឃើញដែរថា ការផឹកស្រាក្នុងកម្រិតមួយតិចល្មម គឺអាចពន្យារអាយុសង្ឃឹមរស់របស់បុរសបានពីរបីឆ្នាំទៀតផង។
ងាកមកការសិក្សាថ្មីនេះវិញ អ្នកស្រាវជ្រាវមកពីសាកលវិទ្យាល័យបាសេឡូណា នៃប្រទេសអេស្ប៉ាញ និងក្រុមប្រឹក្សាជាតិសម្រាប់ការស្រាវជ្រាវរបស់អេស្ប៉ាញ បានរកឃើញថា ការផឹកស្រាអាចការពារប្រឆាំងនឹងកាំរស្មីព្រះអាទិត្យបានដោយសារ អ្នកស្រាវជ្រាវទាំងនោះបានប្រទះឃើញថា ផ្លែទំពាំងបាយជូរ ដែលជាគ្រឿងផ្សំសំខាន់នៅក្នុងស្រា មានផ្ទុកនូវ
សារធាតុគីមីម្យ៉ាងដែរអាចការពារការខូចខាតកោសិកា ក៏ដូចជាផ្ដល់នូវការការពារប្រឆាំងនឹងជំងឺមហារីកស្បែក និងពន្យារភាពចាស់ជ្រីវជ្រួញបានទៀតផង។
សារធាតុគីមីនេះ មានឈ្មោះថា Flavonoids អាចការពារកោសិកាពីកាំរស្មី UV របស់ព្រះអាទិត្យបាន។ កាំរស្មី UV នេះ គឺជាបញ្ហាកំពូលក្នុងការនាំទៅដល់បញ្ហាផ្សេងៗទាក់ទងនឹងស្បែក ដែលរួមមានមហារីកស្បែកជាដើម។
ក្រៅពីស្រាដែលផ្សំពីទំពាំងបាយជូរ គ្រឿងសម្អាង និងថ្នាំដែលមានលាយជាតិទំពាំងបាយជូរក៏មាននោះដែរ តែរបៀបដែលគ្រឿងសម្អាង និងថ្នាំទាំងនោះ ជួយទប់ស្កាត់កាំរស្មីព្រះអាទិត្យ និងការការពារកោសិកា គឺមិនទាន់មានការពន្យល់ច្បាស់លាស់នៅឡើយទៅ គិតមកទល់បច្ចុប្បន្ននេះ។
អ្នកស្រី Cascante ដែលជាអ្នកដឹកនាំការស្រាវជ្រាវនេះ បានមានប្រសាសន៍ថា ការសិក្សាលើកនេះ ក៏ជាការជួយគាំទ្រនូវផលិតផលការពារស្បែកទាំងនោះផងដែរ ក៏ដូចជាបង្កើនការយល់ដឹងដល់មនុស្សគ្រប់រូបឲ្យចេះថែរក្សាស្បែកពីពន្លឺព្រះអាទិត្យ។ អ្នកស្រីបានបន្ថែមទៀតថា ការរកឃើញនេះ ក៏អាចជួយអភិវឌ្ឍក្រែមការពារស្បែក និងផលិតផលផ្សេងទៀត ដែលការពារស្បែកពីពន្លឺព្រះអាទិត្យបានទៀតនោះដែរ។
ទោះជាយ៉ាងណាក្ដី ការស្រាវជ្រាវនេះ បានបញ្ជាក់ច្បាស់ណាស់ថា ផឹកស្រាក្នុងកម្រិតមួយសមល្មម មិនមែនផឹកដល់ថ្នាក់ស្រវឹងលែងដឹងអ្វីនោះទេ។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment