ថ្នាំពេទ្យ Tylenol នេះគឺជាថ្នាំដែលគេនិយមប្រើច្រើននៅអាមេរិក ហើយនៅស្រុកខ្មែរយើងក៏មានអ្នកប្រើមួយចំនួនដែរ។ ថ្នាំនេះគេប្រើសំរាប់ បំបាត់ការឈឺចាប់ ដូចជា ឈឺក្បាល ផ្តាសសាយធម្មតា ឈឺខ្នង ឈឺធ្មេញ ឈឺសាច់ដុំ ហើយវាអាចជួយបញ្ចុះកំដៅនៅក្នុងខ្លួនយើងទៀតផង។ បានជាគេប្រើវាច្រើនមកពីវាជាថ្នាំងាយស្រួលលេប ហើយល្បីឈ្មោះនៅសហរដ្ឋអាមេរិកទៀតផង ហើយបើប្រើថ្នាំនេះ ភាគច្រើនគេមិនប្រើជាមួយថ្នាំដទៃទៀតទ្បើយ។នៅលើសំបក ឬកំប៉ុង នៃថ្នាំនេះ គេបានប្រាប់អ្នកប្រើប្រាស់ថា អ្នកអាចលេបថ្នាំនេះ ២គ្រាប់ក្នុងរយៈពេល ៤ ទៅ ៦ម៉ោង ដូចនេះអ្នកអាចលេបបាន ៨គ្រាប់ក្នុង១ថ្ងៃ គឺលេប ៦ម៉ោងម្តង។ ហើយនៅលើសំបក ឬកំប៉ុងនោះគេក៏បានប្រាប់ដែរថា បើប្រើលើសកំណត់ ឬលេប លើសពី ៨គ្រាប់ក្នុង១ថ្ងៃ វាអាចធ្វើឲ្យប៉ះពាល់ដល់ថ្លើមរបស់អ្នក ព្រោះថាថ្នាំនេះមានជាតិ acetaminophen។
តែថ្មីៗ មានព័ត៌មានមកថា ក្រុមហ៊ុន Johnson & Johnson បានប្រកាសថា ថ្នាំ Tylenol នឹងកាត់បន្ថយបរិមាណសំរាប់អ្នកប្រើប្រាស់មកត្រឹម ៦គ្រាប់វិញក្នុង ១ថ្ងៃ ដើម្បីការពារ ការប្រើប្រាស់លើសកំរិតដែលបណ្តាលឲ្យប៉ះពាល់ដល់ថ្លើម និងគ្រោះថា្នក់ផ្សេងៗទៀត។ ការកំណត់ថ្មីនេះគឺជាចម្លើយមួយសំរាប់ឆ្លើយតបទៅនឹងអ្នករងគ្រោះដោយសារតែប្រើថ្នាំនេះហូសកម្រិត។ នៅសហរដ្ឋអាមេរិកជាឧទាហរណ៍ស្រាប់ មានមនុស្សជាង ២០០នាក់បានស្លាប់ និង មានមនុស្ស ៥៦ ០០០នាក់បានបញ្ចូនទៅមន្ទីរពេទ្យរាល់ឆ្នាំ ដោយសារតែផឹកថ្នាំដែលមានជាតិ acetaminophen ហួសកម្រិត។
នៅរដូវស្លឹកឈើធ្លាក់នៅអាមេរិក ខាងមុខនេះ គឺនៅពាក់កណ្តាលខែ កញ្ញានេះតែម្តង ក្រុមហ៊ុន Johnson & Johnson នឹងចេញលក់ថ្នាំ Tylenol របស់ខ្លួនដែលមានបិទការណែនាំនៃការប្រើប្រាស់ថ្មីដល់អ្នកប្រើប្រាស់ គឺប្រើមិនឲ្យលើសពី ៦គ្រាប់ក្នុង១ថ្ងៃ។
សូមបញ្ជាក់ផងដែរ ថាមិនមែនតែថ្នាំ Tylenol តែមួយមុខទេដែលយើងគួរបន្ថយការប្រើប្រាស់ និយាយរួមទៅ ឲ្យតែថ្នាំ សំរាប់បំបាត់ការឈឺចាប់ ឬក៏ថ្នាំដែលមានជាតិ acetaminophen យើងមិនគួរលេបវាច្រើននោះទេ។ វាប៉ះពាល់ដល់សុខភាពរបស់យើង ជាពិសេសថ្លើមតែម្តង។
|
អស់លោកអ្នក ដែលកំពុងទស្សនាគេហទំព័រនេះជាទីគោរព:
|
0 comments:
Post a Comment