Arn Khmer | អាន ខ្មែរ

11:33:00 PM

ប្រវត្តិខ្លះៗរបស់អំបិល និងសារៈសំខាន់របស់វា

Sunday, December 18, 2011

ប្រវត្តិនៃ អំបិលមានជាយូរណាស់មកហើយ។ យើងមិនអាចដឹងឲ្យបា្រកដនោះទេតែមនុស្សយើងបានសរសេររៀបរាប់ពីអំបិល ប្រហែលជា៤៧០០ ឆ្នាំមុននៅក្នុងប្រទេសចិន នៅក្នុងរាជវង្ស

Peng-Tzao-Kan-Mu ព្រោះថាវាមានសារៈសំខាន់ណាស់។

ប្រសិនបើអ្នកបានមើលរឿងកូរ៉េនៅតាមទូរទស្សន៍ អ្នកប្រាកដជាបានឃើញពីសារៈសំខាន់របស់អំបិល ព្រោះថានគរនៃប្រទេសកូរ៉េបានធ្វើជំនួញអំបិល។ វាមិនត្រឹមតែជា គ្រឿងផ្សំធ្វើម្ហូបប្រចាំថ្ងៃនោះទេ គេអាចយកវាទៅប្រើសម្រាប់រក្សាទុកម្ហូបអាហារឲ្យបានយូរទៀតផង។ មិនតែប៉ុណ្ណោះអំបិលមានសារៈសំខាន់ណាស់សម្រាប់មនុស្ស សត្វ និងរុក្ខជាតិផងដែរ។

សម្រាប់អ្នកកាន់សាសនាដូចជា សាសនាព្រះគ្រីស្ទ គេត្រូវការអំបិលសម្រាប់ធ្វើពីធីមួយចំនួន។

ប្រវត្តិរបស់អំបិលមួយទៀតដែលអ្នកគួរដឹងនោះ គឺនៅសម័យមុន នៅប្រទេសរ៉ូម គេយកអំបិលធ្វើជារបស់សំរាប់បើកប្រាក់ខែឲ្យទាហានរបស់ខ្លួន។ ភស្តុតាងស្រាប់គឺ ដូចជាភាសាអង់គ្លេសជាដើម គេប្រើពាក្យ Salary (ប្រែថា ប្រាក់ខែ) ដែលពាក្យ Salary នេះវាមានដើមកំណើតចេញពីពាក្យ Salt (ប្រែថាអំបិល)។

ដូចនេះយើងឃើញថាអំបិលបានសារៈសំខាន់ណាស់ មិនថានៅចិន កូរ៉េ ឬនៅប្រទេសរ៉ូមទេ នៅទីណាក៏ត្រូវការវាដែរ។ ហើយប្រទេសនីមួយៗមិនអាចខ្វះវាបានទ្បើយ។

អ្វីដែលចម្លែកជាងនេះទៅទៀតនោះគឺការសិក្សាថ្មីៗនេះ ដែលគេថា អំបិលអាចកាត់បន្ថយភាពតានតឹងនៅក្នុងខ្លួនយើងបាន។

តើអ្នកជឿដែរឬទេ?

ប្រសិនបើចង់ដឹងច្បាស់ អ្នកគួរធ្វើការស្រាវជ្រាវបន្ថែម។

11:31:00 PM

ដាក់ Password បែបណាទើបល្អបំផុត?

សព្វថ្ងៃនេះ ការលួចយកទិន្នន័យផ្ទាល់ខ្លួនរបស់អ្នកប្រើប្រាស់អ៊ីនធើណិតបានកើនឡើងកាន់តែច្រើនឡើងៗ ហើយការការវាយប្រហារថ្មីៗក៏បានកើតឡើងជារៀងរាល់ថ្ងៃដែរ។

ហេតុអ្វីបានជាមានអ្នកចាំលួចយក ពាក្យសម្ងាត់ (password) របស់យើងយ៉ាងដូច្នេះ? ចម្លើយយ៉ាងខ្លី គឺដើម្បីប្រាក់។ ពួកលួចយកលេខសម្ងាត់ទាំងនោះ ចង់បានលេខសម្ងាត់អ៊ីម៊ែលរបស់អ្នក ដើម្បីធ្វើជាចោរលួចអត្តសញ្ញាណរបស់អ្នក និងលួចឆ្មក់ចូលក្នុងគណនីធនាគាររបស់អ្នកផងដែរ។

Password ដែលត្រូវបានយកមកប្រើជាច្រើននោះគឺ ពាក្យដែលមានក្នុងវចនានុក្រមអង់គ្លេស ដូចជាពាក្យ "password" និងពាក្យដទៃទៀត ឬក៏ដាក់ឈ្មោះក្រុមបាល់ទាត់ល្បីៗជាដើម។ ការដាក់ពាក្យដែលមានក្នុងវចនានុក្រមបែបនេះ គឺជាការប្រថុយនឹងការលួចបំផុត។ ជាទូទៅពួក hackers បានប្រើប្រាស់វចនានុក្រមដើម្បីវាយប្រហារ ដោយសារតែពួកគេបានប្រើគ្រប់ពាក្យទាំងអស់នៅក្នុងវចនានុក្រម រហូតដល់ត្រូវ។

គោលការណ៍ដ៏ល្អបំផុត គឺកុំប្រើពាក្យក្នុងវចនានុក្រមបែបនេះឲ្យសោះ។ ការដាក់ Password គឺជាវិធីមួយដ៏សាមញ្ញ ដើម្បីធ្វើឲ្យប្រាកដថា password នោះ មានសុវត្ថិភាព ងាយស្រួលចងចាំ ប៉ុន្ដែពិបាកសម្រាប់ពួក hacker ក្នុងការ crack។

តើ password បែបណា ដែលល្អបំផុតសម្រាប់អ្នក? លោក Graham Cluely ដែលជាអ្នកប្រឹក្សាយោបល់ជាន់ខ្ពស់ផ្នែកបច្ចេកវិទ្យាមកពីក្រុមហ៊ុន Sophos (ក្រុមហ៊ុនជំនាញខាងសុវត្ថិភាពsoftware) សហរដ្ឋអាមេរិក បានលើកឡើងថា password ដែលល្អបំផុតគឺ ប្រយោគ (sentence)។ ឧទាហរណ៍ អ្នកអាចយកប្រយោគមួយឃ្លា មកកាត់ចេញជា password ដូចជា "My Friends And I Like To Play Football For Exercise" ចេញជា MF&IL2PF4E ជាដើម។

គោលការណ៍សំខាន់មួយទៀត គឺអ្នកមិនត្រូវប្រើ Password តែមួយដូចគ្នា នៅគ្រប់គេហទំព័រនោះទេ ដូច្នេះបើ hacker លួចបានក៏មិនមែនលួចបានគ្រប់គណនីរបស់អ្នកដែរ។

អ្វីដែលសំខាន់មួយទៀត គឺអ្នកត្រូវតែធ្វើបច្ចុប្បន្នភាព (update) នូវកម្មវិធីប្រឆាំងមេរោគនៅលើកុំព្យូទ័រអ្នកឲ្យបានញឹកញាប់ ព្រោះថា ការគម្រាមកំហែងធំបំផុតគឺ hackers អាចលួចយក password របស់អ្នកបាននៅពេលដែលអ្នកវាយ password ទាំងនោះចូលតែម្ដង។

សរុបមកវិញ អ្នកគួរតែប្រុងប្រយ័ត្នជានិច្ច ក្នុងការដាក់ពាក្យសម្ងាត់ ហើយប្រសិនជាអាចការផ្លាស់ប្ដូរលេខសម្ងាត់ ក៏គួរតែធ្វើផងដែរ។

11:26:00 PM

នេះគឺជាវីដេអូបង្ហាញពីភពព្រះអង្គារដែលថាមានទឹកហូរ

ខាងក្រោមនេះគឺជាវីដេអូដែលដកចេញពីវែបសាយ Youtube ដែលថតបង្ហាញពីសណ្ឋានដីរបស់ភពនេះដោយ វិទ្យាស្ថានស្រាវជ្រាវ NASA របស់សហរដ្ខអាមរិច។ រូបវីដេអូនេះត្រូវបានគេថត ទាញយកឲ្យជិតនៅត្រង់ភូមិសាស្រ្តមួយនៅតាមជំរាលភ្នំនៃភពព្រះអង្គារ។ អ្វីដែលគេចង់ពន្យល់យើងនោះគឺ ការផ្លាស់ប្តូររូបរាងរបស់សណ្ឋានដីនៃជំរាលនោះ ដែលឆ្លងពីរដូវមួយទៅរដូវមួយ សណ្ឋានដីត្រង់កន្លែងនោះផ្លាស់ប្តូរម្តងហើយម្តងទៀត។ ដោយការផ្លាស់ប្តូរសណ្ឋានដីនេះ បានបង្កើតជាស្នាម ឆូតៗនៅតាមជម្រាលនោះហាក់បីដូចជាមានទឹកហូរឆ្លងកាត់។ អ្នកវិទ្យាសាស្រ្តបានសង្ស័យថាទឹកដែលហូរឆ្លងកាត់នោះ ជាទឹកប្រៃព្រោះថាមានតែទឹកប្រៃទេដែលអាចរក្សាភាពរាវបាននៅក្នុងសីតុណ្ហភាពក្រោមសូន្យបាន។ ចូរលោកអ្នកធ្វើការអង្កេតដោយខ្លួនឯង។

11:20:00 PM

Computer និង internet ល្អ ឬអាក្រក់សំរាប់ការចងចាំរបស់យើង?

Internet មិនល្អប៉ុន្មានទេសំរាប់ការចងចាំរបស់អ្នក

បើគិតមួយភ្លែត យើងថាវាល្អណាស់សំរាប់ការចង់ចាំរបស់យើង តែបើគិតយូរៗទៅ វាដូចជាមិនសូវល្អសំរាប់ការចងចាំរបស់យើងសោះ។ ហេតុអ្វីបានជាថាដូចនេះ?

ឧទាហរណ៍ឲ្យងាយយល់ នៅលើ internet ក្តី ឬក៏ computer ក្តី ភាគច្រើនសុទ្ធតែមាន របាមួយសំរាប់ឲ្យអ្នកធ្វើការស្វែងរក។ របាស្វែងរកនេះហើយដែលធ្វើឲ្យយើងងាយស្រួលរកឯកសារ រូបថត វីដេអូ និងអ្វីៗច្រើនជាងនេះទៀត ឲ្យតែអ្នកចង់រកវា។ ដោយសារតែភាពងាយស្រួលនេះហើយ វាធ្វើឲ្យអ្នកប្រើប្រាស់វា លែងខ្វល់ និងមិនបាច់ចងចាំច្រើនទេនៅកន្លែងរបស់ឯកសារគាត់នីមួយៗ ព្រោះថាឲ្យតែចូលទៅក្នុងរបាស្វែងរកទៅ គឺយើងអាចរកវាបានភ្លាម។

មិនតែប៉ុណ្ណោះ វែបសាយមួយចំនួនដែល បានបង្ហោះនៅលើ internet ធ្វើឲ្យអ្នកប្រើមានភាពងាយស្រួលមែនទែន គឺគេអាចស្វែងរកអ្វីក៏ឃើញដែរឲ្យតែចាំឈ្មោះវាតែបន្តិច ឬក៏ឈ្មោះស្រដៀងៗគ្នា ក៏បានដែរ នោះវានឹងលេចចេញមកនូវទំព័រស្រដៀងៗគ្នាទៅនឹងអ្វីដែលអ្នកកំពុងតែរក។

យក វែបសាយរបស់ Google មកនិយាយ វាជាឧទាហរណ៍មួយដ៏សាកសមបំផុត។ មនុស្សភាគច្រើនដែលចូលចិត្តប្រើប្រាស់ Google គឺមកពីវែបសាយនេះវាងាយស្រួលប្រើ ងាយស្រួលស្វែងរក និងវាជាវែបសាយមួយដ៏ឆ្លាត គឺឆ្លាតជាងការគិតរបស់មនុស្សទៅទៀត។ នៅលើវែបសាយនេះអ្នកអាចស្វែងរកអ្វី ក៏បានដែរ ហើយវារហ័ស និងរកទៅឆាប់ឃើញទៀតផង។

នៅពេលយើងប្រើ internet និង computer ចំណេះដឹងរបស់យើងមិនមែនអត់ថយនោះទេ តែការចងចាំរបស់យើងទៅវិញទេដែល កាន់តែខ្សោយទៅៗ ព្រោះ internet និង computer បានធ្វើការជំនួសខួរក្បាលរបស់យើង ហើយការចងចាំរបស់យើងមួយចំនួនធំបានផ្ទេរឲ្យ internet និង computer។

សរុបមក internet និង computer មិនសូវជាល្អប៉ុន្មានទេសំរាប់ការចងចាំរបស់យើង។ ប្រើប្រាស់វាល្មមៗបានហើយ។

11:12:00 PM

តើអ្នកណាចង់រស់នៅជារាងរហូត?

ប្រសិនបើ ការទស្សន៍ទាយ របស់ Aubrey de Grey ពិតជាត្រឹមត្រូវមែន នោះមនុស្សដែលមានអាយុ ១៥០ឆ្នាំបានកើតមកហើយ ហើយមនុស្សដំបូងដែល អាចរស់នៅបាន ១០០០ឆ្នាំ អាចមានវ័យ២០ឆ្នាំកេ្មងជាង អ្នកអាយុ១៥០ឆ្នាំនោះទៅទៀត។

Aubrey de Grey គឺជាគ្រូបង្រៀនម្នាក់នៃវិទ្យាស្ថាន Britain's Royal Institution academy of science បានប្រាប់ឲ្យដឹងថា៖ យើងមានឱកាស ៥០/៥០ ដែលយើងអាចព្យាបាលជំងឺចាស់ នៅក្នុងអំទ្បុងពេល ២៥ឆ្នាំទៀត ឬក៏ច្រើនជាងនេះ គាត់បានហៅវាថា "decisive level of medical control" ដែលគាត់ពន្យល់ថា វាជាការគ្រប់គ្រងបែបលក្ខណៈពេទ្យ ដូចទៅនឹងការប្រើថ្នាំសំរាប់កំចាត់មេរោគឆ្លងផ្សេងៗដែរ។ បើផ្អែកលើសំដីរបស់គាត់ គឺគាត់ចង់រកថ្នាំ ឬក៏វិធីព្យាបាលណាដែលអាចមានសមត្តភាព សម្លាប់មេរោគដែលធ្វើឲ្យមនុស្សចាស់ និងសម្លាប់មេរោគដែលបង្កទ្បើងនៅពេលដែលមនុស្សកាន់តែចាស់ទៅៗ។

គំនិតរបស់គាត់ត្រូវបានគេរិះគន់ថា មិនល្អហើយមិនគួរយកមកពិភាក្សាទ្បើយ ព្រោះវាធ្វើឲ្យពិភពលោកសំបូរទៅដោយមនុស្សចាស់ៗច្រើន ហើយមានកំលាំងខ្សោយ វាធ្វើឲ្យសង្គមទាំងមូលជួបនឹងវិបតិ្តមនុស្សចាស់ច្រើន។

ប៉ុន្តែបើស្តាប់ការបកស្រាយរបស់លោកវិញ យើងឃើញថា គាត់មិនបានព្យាយាមធ្វើឲ្យមនុស្សចាស់ក្រស្លាប់នោះទេ អ្វីដែលគាត់ចង់បាននោះគឺ ចង់ឲ្យមនុស្ស ក្រចាស់ ហើយរកថ្នាំដែលអាចសំលាប់មេរោគដែលធ្វើឲ្យមនុស្សឆាប់ចាស់។ និយាយឲ្យខ្លីទៅគាត់ចង់ឲ្យមនុស្សយើងមានអាយុវែងជាងមុន និងមានសុខភាពមាំជាងមុន។

នេះគឺជាគំនិតថ្មី ហើយល្អទៀត ព្រោះមនុស្សលែងបារម្ភខ្លាចឆាប់ស្លាប់ទៀតហើយ។ បើមានអ្នកប្រាជ្ញវិញនោះ ឬក៏មនុស្សមានប្រយោជន៍ដល់សង្គម អ្នកទាំងនោះប្រហែលជាអាចជួយដល់សង្គមមនុស្សបានកាន់តែច្រើន ប្រសិនបើគាត់រស់នៅបានយូរដូចនេះ។

11:04:00 PM

រស់នៅតំបន់អេក្វាទ័រមានផលប្រយោជន៍អ្វីខ្លះ?

តំបន់អេក្វាទ័រគឺជាតំបន់ដែលមានអាកាសធាតុក្តៅ ព្រោះថាតំបន់នេះទទួលបានពន្លឺច្រើនជាង តំបន់ដែលនៅជិតតំបន់ប៉ូល។ ប្រទេសកម្ពុជាក៏ស្ថិតនៅជិតតំបន់អេក្វាទ័រនេះដែរ។ ដោយសារអាកាសធាតុអំណោយផលបែបនេះបានជាយើងរស់នៅបានដោយសុខសាន្ត មិនសូវខ្វល់ពីគ្រោះធម្មជាតិប៉ុន្មានទេ ចំណែកឯអាកាសធាតុក៏មិនសូវក្តៅខ្លាំង ឬក៏ត្រជាក់ខ្លាំងនោះដែរ។

ចំពោះប្រទេសមួយចំនួននៅអឺរ៉ុប មានមនុស្សជាច្រើននាក់ បានស្លាប់ដោយសារ រលកនៃកំដៅ (Heat Wave) ពីព្រោះប្រទេសនេះភាគច្រើនមានអាកាសធាតុត្រជាក់ ហើយនៅពេលមានការប្រែប្រួលអាកាសធាតុខ្លាំង ដូចជារលកកំដៅនេះជាដើម មនុស្សដែលមានប្រព័ន្ធការពាររាងកាយខ្សោយ ហើយភាគច្រើនមនុស្សចាស់ អាចឆាប់ទទួលរងគ្រោះថ្នាក់ អាចឈានទៅដល់ការបាត់បង់ជីវិត។

ចំពោះប្រទេសនៅតំបន់អេក្វាទ័រវិញ គ្រោះថ្នាក់ដែលបណ្តាលមកពី រលកកំដៅនេះមិនដែលកើតមានទ្បើយ ហើយបើសិនជាមាន ក៏មនុស្សនៅតំបន់នេះមិនខ្លាចដែរ ព្រោះគេធ្លាប់ឆ្លងកាត់កំដៅបែបនេះរូចមកហើយដែរ ហើយអាកាសធាតុក៏ក្តៅស្រាប់។

សព្វថ្ងៃអ្នកវិទ្យាសាស្រ្តកំពុងតែ សិក្សាពីព្រះអាទិត្យ ហើយមានលឺព័ត៌មានថា ព្រះអាទិត្យ របស់យើងមិនដូចមុនទ្បើយ ព្រោះវាមានបំរែបំរួលខ្លាំងជាងមុន ហើយនៅប៉ុន្មានឆ្នាំខាងមុខនេះ ផែនដីនឹងអាចជួបវិបត្តិដ៏ធ្ងន់ធ្ងរដែលបង្កទ្បើងដោយ ព្យុះព្រះអាទិត្យ ឬបន្ទុះផ្សេងៗរបស់ព្រះអាទិត្យ។ បើពិតជាវាអាចកើតទ្បើងមែន នោះប្រជាជននៅតំបន់អឺរ៉ុបអាច ប៉ះពាល់ជាងប្រជាជននៅតំបន់អេក្វាទ័រ ដោយសារតែពួកអឺរ៉ុបមិនធ្លាប់នៅអាកាសធាតុក្តៅ។

11:02:00 PM

រស់នៅជិតព្រលានយន្តហោះប៉ះពាល់អ្វីខ្លះ?

យន្តហោះចេញពីព្រលាន

ការរស់នៅជិតព្រលានយន្តហោះ មិនត្រឹមតែអាចរំខានដោយសារសម្លេងយន្តហោះទាំងថ្ងៃទាំងយប់ ដែលធ្វើឲ្យលោកអ្នកគេងមិនបានច្រើននាពេលយប់ប៉ុណ្ណោះទេ ប៉ុន្ដែថែមទាំងបណ្ដាលឲ្យលោកអ្នកជួបប្រទះនូវអាកាសធាតុដ៏អាក្រក់ផងដែរ នេះបើតាមអ្នកវិទ្យាសាស្រ្ដមួយក្រុមមកពីសហរដ្ឋអាមេរិក។

ការស្រាវជ្រាវរបស់ក្រុមអ្នកវិទ្យាសាស្រ្ដនេះ បានរកឃើញថា ការឡើងចុះនៃយន្តហោះ នឹងអាចបណ្ដាលឲ្យមានភ្លៀងញឹកញាប់នៅតំបន់ដែលនៅជុំវិញនោះ ឬអាចធ្លាក់ព្រិល (ចំពោះប្រទេសត្រជាក់) ទៀងផង។

ការប៉ះពាល់នៃយន្តហោះនៅលើពពក គឺស្រដៀងគ្នានឹងដំណើរការនៃការភ្លៀងផងដែរ ដោយយន្តហោះបានបង្កើតឲ្យមានដំណក់ទឹកនៅលើអាកាស ដែលបង្កើតឲ្យមានភ្លៀងធ្លាក់។ នេះបណ្ដាលមកពី

ពេលដែលយន្តហោះដែលហោះកាត់ពពក ខ្យល់ដែលនៅខាងក្រោយស្លាបយន្តហោះបានធ្វើឲ្យមានភាពត្រជាក់ដល់ពពក។

កន្លែងដែលប៉ះពាល់ជាងគេ គឺកន្លែងដែលនៅជុំវិញព្រលានយន្តហោះដែលមមារញឹកជាងគេនៅលើពិភពលោក ដូចជានៅ Heathrow ដែលមានយន្តហោះច្រើនជាង ១២០០គ្រឿង ឡើងចុះជារៀងរាល់ថ្ងៃ។

ការស្រាវជ្រាវនេះ ក៏បានរកឃើញដែរថា ស្រទាប់ពពកដែលត្រជាក់បំផុត មានរយៈចម្ងាយដល់៦៣ម៉ាយល៍ពីព្រលានយន្តហោះចម្បងរបស់ពិភពលោក។ ដុំពពកទាំងនោះ គឺស្ទើរតែស្រដៀងទៅនឹងពពកនៅតំបន់ប៉ូលខាងជើង និងខាងត្បូង (ត្រជាក់ខ្លាំង)។

ក្រុមអ្នកស្រាវជ្រាវបានមើលទៅលើរូបភាពដែលថតបានដោយផ្កាយរណបចំនួន២០ នៃពពកកាលពីឆ្នាំ២០០៧នៅតិចសាស់។ ប្រហោងនៃពពក (ចន្លោះពពកដែលយន្តហោះបើកកាត់) គឺ អាចស្ថិតនៅបានបួនម៉ោង ហើយមានចម្ងាយដល់ទៅ៦០ម៉ាយល៍ ។

ការរកឃើញនេះ អាចឲ្យគេដឹងថា យន្តហោះ បានប៉ះពាល់ទៅដល់អាកាសធាតុនៃផែនដីយើងផងដែរ។

ទោះយ៉ាងណាក៏ដោយ ការស្រាវជ្រាវនេះ បានរកឃើញពីផលប៉ះពាល់ទាក់ទងនឹងអាកាសធាតុចំពោះអ្នកនៅក្បែរព្រលានយន្តហោះ តែមិនបានបញ្ជាក់លម្អិតអំពីគ្រោះថ្នាក់នៃសុខភាពផ្សេងទៀតនោះទេ។

11:00:00 PM

ហេតុអ្វីក៏មិននាំគ្នាផឹកទឹកឲ្យបានច្រើន?

តើទឹកមានអ្វីមិនល្អ ហើយមានដែលគេមានជំងឺដោយសារផឹកទឹកឬអត់?

លក្ខណៈនៃទឹកមានដូចជា៖

ទឹកផឹកទៅមិនមានជំងឺ(កុំនិយាយពីទឹកមិនស្អាត)

ទឹកផឹកទៅមិនធ្វើឲ្យយើងធាត់

ទឹកគ្មានជាតិគីមី គ្មានក្លិន និងគ្មានពណ៌ ហើយងាយស្រួលផឹក

ទឹកផឹកទៅមិនធ្វើឲ្យមានក្លិនមាត់

ទឹកផឹកទៅធ្វើឲ្យបត់ជើង(តូច និងធំ)បានស្រួល

ទឹកជួយធ្វើឲ្យស្បែកយើងភ្លឺ ហើយមិនបែកស្រកា

ទឹកផឹកទៅធ្វើឲ្យសំលេងយើងនិយាយទៅច្បាស់ជាមុន មិនស្ងួតក

ទឹកផឹកទៅធ្វើឲ្យក្រពះយើងងាយកិនអាហារ

ទឹកមានតំលៃថោក ហើយងាយស្រួលទុកដាក់

ទឹកមានច្រើនណាស់លើលោកយើងនេះ ជាពិសេប្រទេសសកម្ពុជា រឹតតែសម្បូរទឹកទៅទៀត ព្រោះមានទន្លេរ និងបឹងច្រើន។

នៅពេលមានជំងឺទឹកជួយយើងបានច្រើនណាស់ដូចជា៖

ជួយកាត់បន្ថយ កំដៅក្នុងខ្លួន

រក្សាសីតុណ្ហភាពនៅក្នុងខ្លួនឲ្យបានថេរ

ហូបទឹកនៅពេលឈឺអាចជួយគ្រូពេទ្យពិនិត្យទៅឆាប់ដឹងពីអាការៈជំងឺ

ទឹកអាចកាត់បន្ថយជំងឺស្បែកបាន ៥០ភាគរយ

10:58:00 PM

ចំនុចមួយចំនួនអ្នកគួរយល់ដឹងពីការអាន

ការអានសៀវភៅ

ការអានមានច្រើនសណ្ឋានដូចជា ការអានសៀវភៅទូទៅ កាសែត ទស្សនាវដ្តី និងរូបភាព ឬរូបគំនូរជាដើម។ រូបភាព ឬរូបគំនូរ អត់មានអក្សរមែន តែយើងក៏ចាត់ទុកវាជាកាអានមួយដែរព្រោះយើងប្រើប្រាស់ ការគិត និងខួរក្បាលរបស់យើងដើម្បី បកប្រែអត្ថន័យនៃរូបភាពនោះ។ ចំពោះអ្នករៀន IT(Information Technology) គេអានអក្សរដែរ តែមិនមែនដូចអក្សរដែលយើងអាចធម្មតានោះទេ គឺគេមានភាសាផ្ទាល់ខ្លួនរបស់គេ។ ទាល់តែអ្នក រៀន IT ទើបចេះអានវា។ ហើយបើនិយាយពីអ្នកសិក្សាពីបុរាណវិទ្យាវិញគេអាន សញ្ញា មានដូចជារូបសត្វ ឬក៏រូបឧបករណ៍ ផ្សេងៗជាដើម។

មិនថាអ្នកអានតាមបែបណាមួយនោះទេ គោលដៅដែលសំខាន់ គឺអានដើម្បីយល់ពីអ្វីដែលបានគូរ ឬសរសេរ។

តើយើងគួរយល់ដឹងពីអ្វីខ្លះទៅ?

ចំនុចដែលសំខាន់ជាងគេ គឺអត្ថន័យ ឬព័ត៌មានដែលអ្នកនិពន្ធចង់ប្រាប់យើង។ ប៉ុន្តែនៅពេលខ្លះ អ្វីដែលអ្នកគិត មិនដូចអ្វីដែលអ្នកនិពន្ធចង់ប្រាប់អ្នកនោះទេ ព្រោះអ្នកអាន និងអ្នកនិពន្ធមានការគិតមិនដូចគ្នាទេ ហើយខួរក្បាលក៏មិននៅជាប់គ្នាដែរ។

ដូចនេះចំណុចដែលសំខាន់មួយទៀតគឺយើងត្រូវស្គាល់ និងសិក្សាពីអ្នកដែលបានសរសេរ ឬគូររូបដែលយើងបានអាននោះ។ ធ្វើបែបនេះវាសំខាន់ណាស់ រវាងអ្នកអាននិងអ្នកនិពន្ធ។ ទី១ អ្នកអានគួរឲ្យតំលៃអ្នកនិពន្ធ និងទី២អ្នកអានអាចយល់កាន់តែច្បាស់ ពីអត្ថន័យដែលបានសរសេរ និងយល់ពីមូលហេតុដែលអ្នកនិពន្ធខំសរសេរវាទ្បើង។

តើធ្វើម៉េចអានឲ្យបានលឿន?

សួរខ្លួនអ្នកថា តើអ្នកធ្លាប់មើលរូបភាពទេ ធ្លាប់មើលវីដេអូទេ ធ្លាប់មើលគេវៃប្រដាល់ទេ ធ្លាប់មើលគេប្រកួតបាល់ទាត់ទេ។ ទាំងអស់នេះ គេហៅថាមើល ព្រោះថាយើងប្រើប្រាស់ការគិតរបស់យើងតិចណាស់នៅពេលដែលយើងមើល វាមិនដូចការអាននោះទេ។ ដូច្នេះ ប្រសិនបើចង់អានលឿនត្រូវកុំអានអី គឺត្រូវមើលវាម្តង។ ប៉ុន្តែមើល សៀវភៅ វារាងយ៉ាប់ជាងមើលគេលេងបាល់បន្តិច។ យ៉ាប់ត្រង់ថា សៀវភៅវាមានអក្សរល្អិតៗ យើងមើលបាន តែពេលខ្លះ មើលទៅចេះតែរំលងអក្សរ បាត់ព័ត៌មានមួយចំនួន។ វាត្រឹមត្រូវហើយ យើងកុំភ្លេចថា មើលបាល់ទាត់ក៏អ្នកមិនប្រាកដថាមើលបានទាំងអស់ដែរ។ ពេលខ្លះអ្នករវល់មើលកីទ្បាករកំពុងបណ្តើរបាល់ ស្រាប់តែភ្លេចមើលអាជ្ញារកណ្តាលដើរបុកបង្គោលទី ឬក៏មិនបានមើលអ្នកចាំទីម្ខាងទៀតកំពុង ឈរជុះនោមក៏មាន។ និយាយឲ្យខ្លីទៅ មើលវាលឿនជាងអានតែ ព័ត៌មានមួយចំនួននឹងត្រូវបាត់បង់។

ចុះមើលសៀវភៅនឹងគេមើលយ៉ាងម៉េចទៅ?

ក្បួននៃការមើលសៀវភៅគឺ៖

ទី១ ហាមហាមាត់ គឺបិតមាត់អ្នកឲ្យជិត។ បើពិបាកបិតអ្នកអាចយកក្រណាត់ មករុំមាត់។

ទី២ ហាមដាច់ខាត អាននៅក្នុងចិត្ត។ អាននៅក្នុងចិត្តគឺដូចអានប្រើមាត់អីចឹងវាធ្វើឲ្យយើងយឺត។

ទី៣ ប្រើតែភ្នែក និងខួរក្បាលរបស់អ្នកបានហើយ។

ទី៤ ហាមមើលរកកំហុសរបស់អ្នកសរសេរ ទោះជាឃើញគេសរសេរខុសអក្ខរាវិរុទ្ធក៏ដោយក៏មិនត្រូវមានចិត្តចង់កែរដែរ។

ទី៥ អានតែនាមបានហើយ ចំពោះកិរិយាសព្ទ គុណនាម ឬគុណកិរិយាមិនសំខាន់ទេ។ ព្រោះនៅពេលអ្នកចង់អានលឿនអ្នកត្រូវការតែព័ត៌មានមួយមុខប៉ុណ្ណោះ ចំណែកឯរស់ជាតិ ទឹកដមនៃអត្ថបទអ្នកមិនត្រូវការទ្បើយ។

ចំណាំ៖

សៀវភៅ មនោសញ្ចេតនា និងរឿងសេហ្នាចេញ ហាមមើលជាដាច់ខាត ព្រោះគេសរសេរវាទ្បើងសំរាប់អានតែប៉ុណ្ណោះ។ បើយើងយកវាមកមើលវាខុសនឹងច្បាប់អន្តរជាតិ។ បើចង់មើល អាចមើលជាវីដេអូបាន។

9:31:00 PM

អ្វីទៅគ្រិស្តម៉ាស ឬបុណ្យណូអែល?

រូបភាពពី http://km.wikipedia.org

បុណ្យណូអែល (នៅភាសាអង់គ្លេសបុណ្យគ្រិស្តម៉ាស) ជាបុណ្យទិវាប្រសូតិរបស់ព្រៈយេស៊ូគ្រិស។ គ្រឹស្តសាសនិក ជននៅទូទាំងពិភពលោកតែងតែប្រារព្ធពិធីបុណ្យនេះ ជារៀងរាល់ឆ្នាំ នៅថ្ងៃទី ២៥ ខែធ្នូ ដែលជាខួបកំណើតរបស់ព្រះយ៉េស៊ូគ្រឹស្ត។ នៅទីក្រុងប៊ែតឡេហ៊ែម (ប៉ាឡេស្ទីន) ដែលជាទីកន្លែងបង្កើតគម្ពីគ្រឹស្តសាសនានៃកំនើតព្រះយ៉េស៊ូគ្រឹស្ត។

នៅស្រុកបារាំងគេហៅថា ណូអែល ដាណឺម៉ាក ថាជូល អ៊ីតាលីថា ណាតាលេ អេស្ប៉ាញ ថា ណាវីដាដ រុស្ស៊ីថា Roschdevtvo Kristovo ។ល។ ដែលមានន័យប្រហាក់ប្រហែលគ្នាថា ថៃ្ងកំណើត យេស៊ូគ្រិស្ត។ តាមលំដាប់ថ្នាក់សំខាន់នៃពិធីសូត្រមន្តរបស់សាសនាគ្រិស្ត គ្រិស្តម៉ាស មានសារៈសំខាន់ ទី ៤ បន្ទាប់ពីបុណ្យ អ៊ីស្ទ័រ ឬ ប៉ាក ដែលជាបុណ្យរំកថៃ្ងព្រះយេស៊ូគ្រិស្ត រស់ឡើងវិញបុណ្យផិនធិខស្ត ប៉ង់តឺកូត ឬ ថៃ្ងនក្ខត្តឫក្សគម្រប់ ៥០ថៃ្ង ដែលជាថៃ្ងព្រះមេត្រីចិត្ត យាងចុះមកប្រទានឥទ្ធិឫទ្ធិ ដល់សាវ័កព្រះយ៉េស៊ូគ្រឹស្ត ឲ្យអាចនិយាយបានច្រើនភាសា ដើម្បីសម្រួលដល់ការផ្សព្វផ្សាយសាសនានៅក្នុងលោកនេះ និងបុណ្យមួយទៀត គឺអេពីហ្វានី La fete des Rois ជាថៃ្ងសម្ភោធព្រះយេស៊ូ ត្រូវនឹងថៃ្ងទី ៦ ខែមករា ។

នេះបើតាមកំណត់នានា ខាងសាសនាគ្រិស្ត ដែល្សូមអនុញ្ញាត លើកយកមកជម្រាបដោយពិតទៅថៃ្ងកំណើត ឬ ទិវាប្រសូតិ ព្រះយេស៊ូ ពុំមាននរណាដឹងពិតប្រាកដថាជាថៃ្ងណាមែនទែននោះឡើយ៕

ប្រភពពី http://km.wikipedia.org